പ്രസവാന്തരം പനി അണുബാധ കാരണവും

പ്രസവത്തിനു ശേഷം പനി സാധാരണയായി രണ്ടാമത്തെയോ പത്താമത്തെയോ ദിവസമാണ് ഉണ്ടാകാറ്. ശരീരോഷ്മാവ് 38 ഡിഗ്രയില്‍ കൂടുതലാകുമ്പോഴാണ് ശ്രദ്ധിക്കേണ്ടത്.

പലവിധ കാരണങ്ങളാലും പ്രസവശേഷം പനിയുണ്ടാകാം. പ്രധാനമായും അണുബാധയാണ് പനിയ്ക്കു കാരണമാകാറ്. സാധാരണ പ്രസവമാണെങ്കില്‍ യോനീഭാഗത്ത് ബാക്ടീരിയല്‍ ഇന്‍ഫെക്ഷനുണ്ടാകുന്നത് പനിക്കു കാരണമായേക്കാം. എന്‍ഡോമെട്രിയാസിസ്, യൂറിനറി ഇന്‍ഫെക്ഷന്‍ എന്നിവയും പനിക്കു കാരണമാകും.

ചില സ്ത്രീകളില്‍ മുലയൂട്ടലും പനിക്കു കാരണമാകും. പ്രസവത്തോടെ സ്തനങ്ങളിലുണ്ടാകുന്ന വ്യത്യാസങ്ങളും ചിലരില്‍ പനിക്കു കാരണമാകാറുണ്ട്. മുലപ്പാല്‍ കെട്ടിനില്‍ക്കുന്നതും കൂടുതല്‍ ഇറുകിയ അടിവസ്ത്രം ധരിക്കുന്നതു കാരണം രക്തസഞ്ചാരം കുറയുന്നതുമാണ് ഇത്തരത്തില്‍ പനിക്കു കാരണമാകുന്നത്.

ധാരാളം വെള്ളം കുടിയ്ക്കുക, ശരീരശുചിത്വം പാലിക്കുക, കുഞ്ഞിനെ ശരിയായ വിധത്തില്‍ മുലയൂട്ടൂക, പാകത്തിനുള്ള വസ്ത്രങ്ങള്‍ ധരിക്കുക എന്നിവ പനി വരാതിരിക്കാനുള്ള മുന്‍കരുതലുകളാണ്. പനിയുണ്ടെങ്കില്‍ ഡോക്ടറുടെ നിര്‍ദേശപ്രകാരമല്ലാതെ മരുന്നുകള്‍ കഴിയ്ക്കരുത്. പ്രത്യേകിച്ച് മുലയൂട്ടുന്നവരാണെങ്കില്‍. മരുന്നിന്റെ അംശം പാലിലൂടെ കുഞ്ഞുങ്ങളില്‍ എത്തുന്നത് പാര്‍ശ്വഫലങ്ങളുണ്ടാക്കാന്‍ സാധ്യതയുണ്ട്.

പനിയുള്ളപ്പോള്‍ കുഞ്ഞിനെ മുലയൂട്ടുന്നതു സംബന്ധിച്ച് ഡോക്ടറുടെ അഭിപ്രായം തേടുന്നതാണ് ഏറ്റവും ഉചിതമാവുക.