അമ്മയ്ക്ക് അസുഖം, കുഞ്ഞിന് പാല്‍ കൊടുക്കാമോ?

Post Natal

oi-Saritha

By Veena

Updated: Tuesday, July 24, 2012, 11:24 [IST]

മാതൃത്വത്തിന്റെ മഹനീയ ഭാവങ്ങളിലൊന്നാണ് മുലയൂട്ടല്‍. എന്നാല്‍ എല്ലാക്കാര്യങ്ങളിലുമെന്ന പോലെ ഇക്കാര്യത്തിലും ചില വാസ്തവങ്ങളും വിശ്വാസങ്ങളുമുണ്ട്.

മുലയൂട്ടല്‍ സ്തനസൗന്ദര്യത്തെ ബാധിക്കുമെന്നു കരുതി കുഞ്ഞിന് പാലു കൊടുക്കാത്തവരുണ്ട്. എന്നാല്‍ ഇത് തികച്ചും തെറ്റിദ്ധാരണയാണ്. സ്തനസൗന്ദര്യത്തെ മുലയൂട്ടല്‍ യാതൊരു വിധത്തിലും ബാധിക്കില്ല.

ചില സ്ത്രീകളില്‍ പാലൂട്ടല്‍ ലൈംഗികോത്തേജനമുണ്ടാക്കുമെന്നു പറയുന്നുണ്ട്. എന്നാല്‍ ഇതിനെ അസാധാരണ പ്രതിഭാസമായി കണക്കാക്കേണ്ടതില്ല. കുഞ്ഞിന് പാല്‍ കൊടുക്കുമ്പോള്‍ ഓക്‌സിടോസിന്‍ എന്നൊരു ഹോര്‍മോണ്‍ ശരീരം പുറപ്പെടുവിക്കുന്നുണ്ട്. ഇത് ഓര്‍ഗാസം സംഭവിക്കുമ്പോള്‍ ഉണ്ടാകുന്ന ഹോര്‍മോണാണ്.

സ്‌ട്രെസ്, ടെന്‍ഷന്‍ എന്നിവ മുലപ്പാല്‍ ഉല്‍പാദനം കുറയ്ക്കുമെന്ന് പറയാറുണ്ട്. എന്നാല്‍ ഇത് ശരിയല്ല. ടെന്‍ഷന്‍ സമയമാണെങ്കിലും പാലൂട്ടുമ്പോള്‍ ഓക്‌സിടോസിന്‍ ശരീരം പുറപ്പെടുവിക്കും. ഇത് ശരീരത്തെ റിലാക്‌സ് ചെയ്യിക്കും. മുലപ്പാലുണ്ടാവുകയും ചെയ്യും. എന്നാല്‍ സാവധാനത്തില്‍ മാത്രമെ മുലപ്പാല്‍ ഉല്‍പാദനം നടക്കുകയുള്ളൂവെന്നു മാത്രം. എന്നാല്‍ ടെന്‍ഷന്‍ മുലപ്പാല്‍ ഉല്‍പാദനത്തെ ബാധിക്കുകയില്ല.

അമ്മയ്ക്ക് പനി മുതലായ അസുഖങ്ങളുള്ളപ്പോള്‍ കുഞ്ഞിന് പാല്‍ കൊടുക്കരുതെന്നൊരു വിശ്വാസമുണ്ട്. കുഞ്ഞിനും അസുഖം പകരുമെന്നതാണ് ഇതിന് കാരണമായി പറയാറ്.

അമ്മയുടെ അസുഖം പ്രത്യക്ഷമാകുന്നതിനു മുന്‍പു തന്നെ ചിലപ്പോള്‍ കുഞ്ഞിലേക്കു പകര്‍ന്നിരിക്കാം. അതുകൊണ്ട് മുലപ്പാല്‍ കൊടുക്കുന്നതു നിര്‍ത്തിയിട്ടു കാര്യമില്ല. മാത്രമല്ല, മുലപ്പാല്‍ കൊടുത്താല്‍ കുഞ്ഞിന്റെ പ്രതിരോധശേഷി വര്‍ദ്ധിക്കുകയാണ് ചെയ്യുക. അസുഖമാണെങ്കിലും മുലപ്പാല്‍ കൊടുക്കുന്നത് നിര്‍ത്തേണ്ടതില്ലെന്നര്‍ത്ഥം.