പ്രസവാനന്തര പോഷകക്കുറവ്; കാരണങ്ങള്‍, പ്രതിവിധികള്‍

പ്രധാനമായൂം കുഞ്ഞിനെ മുലയൂട്ടുന്നതു തന്നെയാണ് അമ്മയുടെ പോഷകാഹാരക്കുറവിന് കാരണം. സാധാരണ കഴിക്കുന്നതിനേക്കാള്‍ 1000 കിലോ കാലറി അധികം മുലയൂട്ടുന്ന സമയത്ത് അമ്മ കഴിക്കണം. വിശപ്പു കാരണം കയ്യില്‍ കിട്ടുന്നതെന്തും ഈ സമയത്ത് കഴിക്കാനുളള പ്രേരണയുണ്ടാകുന്നു. ഇങ്ങനെ കഴിക്കുന്ന ഭക്ഷണത്തില്‍ വൈററമിനുകളോ പ്രോട്ടീനോ ഉണ്ടായിരിക്കണമെന്നില്ല. കഴിക്കുന്ന ഭക്ഷണം പോഷകാംശം നിറഞ്ഞതാകാന്‍ ശ്രദ്ധിക്കണം.

ഗര്‍ഭിണിയായിരിക്കുന്ന സമയത്ത് കഴിക്കുന്ന വൈററമിനുകള്‍ പ്രസവേശഷവും കഴിക്കണം. പ്രത്യേകിച്ച് ഫോളിക് ആസിഡ് തുടങ്ങിയവ പെട്ടെന്നു തന്നെ ശരീരത്തില്‍ നിന്ന് പുറന്തള്ളപ്പെട്ടുപോകുന്നവയാണ്. ഫോളിക് ആസിഡ് കുഞ്ഞിന്റെ വളര്‍ച്ചക്കും അത്യന്താപേക്ഷിതമാണ്. പ്രസവം കഴിഞ്ഞ് ആറുമാസക്കാലമെങ്കിലും ഇവയടങ്ങിയ ഭക്ഷണങ്ങളോ അല്ലെങ്കില്‍ ഡോക്ടറുടെ നിര്‍ദേശപ്രകാരം ഗുളികകളോ കഴിക്കാം.

പ്രസവശേഷം ചില സ്ത്രീകളില്‍ വിഷാദരോഗം (ഡിപ്രഷന്‍) കണ്ടുവരാറുണ്ട്. ഇതിന് പ്രത്യേകിച്ച് കാരണമൊന്നും വേണമെന്നില്ല. ഇത്തരം അവസ്ഥയില്‍ ഭക്ഷണം കഴിക്കുവാനും കാര്യമായ താല്‍പര്യമുണ്ടാവില്ല. ഇതും പോഷകക്കുറവിന് കാരണമായേക്കാം.

നല്ലപോലെ ഉറങ്ങിയാലേ പോഷകങ്ങള്‍ ശരീരം ആഗിരണം ചെയ്യൂ. നവജാത ശിശുക്കള്‍ ഇടയ്ക്കിടെ ഉണരുന്നതും കരയുന്നതും സാധാരണമാണ്. അപ്പോള്‍ അമ്മയ്ക്കും ഉറക്കം കുറയും. ചിലപ്പോള്‍ അഞ്ചുമണിക്കൂര്‍ പോലും തുടര്‍ച്ചയായി അമ്മയ്ക്ക് ഉറങ്ങാന്‍ സാധിച്ചെന്നു വരില്ല. കുഞ്ഞ് ഉറങ്ങുന്ന സമയം നോക്കി ഉറങ്ങുകയെന്നതു മാത്രമാണ് ഇതിനുള്ള പോംവഴി.

ഭക്ഷണത്തില്‍ ശ്രദ്ധിക്കുകയെന്നതാണ് പോഷകാഹാരക്കുറവ് ഒഴിവാക്കാനുള്ള പ്രധാനമാര്‍ഗം. ആവശ്യമെങ്കില്‍ ഡോക്ടറുടെ ഉപദേശം തേടാവുന്നതാണ്. അമ്മയുടെ ആരോഗ്യമായിരിക്കും കുഞ്ഞിന്റേയും ആരോഗ്യത്തിന്റെ പ്രധാന ഉറവിടമെന്ന് തിരിച്ചറിയുക.