കുട്ടികളും വായിച്ചു പഠിക്കട്ടെ...

വായനാശീലം മുതിര്‍ന്നവര്‍ക്കു മാത്രമല്ലാ, കുട്ടികള്‍ക്കും അവശ്യം വേണ്ട ഒരു ഗുണമാണ്. അറിവു വര്‍ദ്ധിക്കുന്നതോടൊപ്പം കുട്ടികളില്‍ പഠിക്കാനുള്ള താല്‍പര്യം വളര്‍ത്തിയെടുക്കാനും ഇതുകൊണ്ടു കഴിയും. മാത്രമല്ലാ, കുട്ടികള്‍ ടിവി കാണുന്നതു കുറക്കാനും ഇത് നല്ലതാണ്. കുട്ടികളുടെ സംസാരം വ്യക്തമാകാനും വായനാശീലം സഹായിക്കും.

വായനാശീലം കുട്ടികളില്‍ വളര്‍ത്തിയെടുക്കുവാന്‍ ഏറ്റവും സഹായിക്കാനാവുക മാതാപിതാക്കള്‍ക്കാണ്. ഇത് അല്‍പം ബുദ്ധിമുട്ടേറിയ ജോലിയാണ്. സമയത്തോടൊപ്പം ക്ഷമയും ഇതിനാവശ്യമാണ്.

കുട്ടികള്‍ തീരെ ചെറുതായിരിക്കുമ്പോള്‍ തന്നെ അവരുടെ മുന്നില്‍ വച്ച് പത്രങ്ങളും മാസികകളും ഉറക്കെ വായിക്കുക. കുഞ്ഞുങ്ങളുടെ ശ്രദ്ധ ഇതിലേക്ക് തിരിയും.

ഉറക്കെ വായിക്കുമ്പോള്‍ കഴിവതും ഫോണെറ്റിക്‌സ് ഉപയോഗിക്കുക. കുട്ടിക്ക് വാക്കുകള്‍ എളുപ്പം മനസിലാക്കുവാന്‍ ഇത് സഹായിക്കും. കുട്ടിക്ക് സംസാരിക്കാനോ ഏതെങ്കിലും വാക്കുകള്‍ ഉച്ചരിക്കാനോ പ്രയാസമുണ്ടെങ്കില്‍ നിങ്ങള്‍ പറയുന്നത് ശ്രദ്ധിക്കുവാന്‍ പറയണം. ബുദ്ധിമുട്ടുള്ള വാക്കുകള്‍ ആവര്‍ത്തിച്ചു പറയിക്കണം.

കുട്ടികള്‍ക്ക് കഥാ, കാര്‍ട്ടൂണ്‍ പുസ്തകങ്ങള്‍ വാങ്ങിച്ചുകൊടുക്കണം. തനിയെ വായിക്കാന്‍ കഴിയാത്ത കുട്ടികള്‍ക്ക് മാതാപിതാക്കള്‍ വായിച്ചുകൊടുക്കണം. ചിത്രങ്ങളുള്ള പുസ്തകങ്ങളാണ് കുട്ടികളുടെ ശ്രദ്ധ പതിയാന്‍ നല്ലത്. വായിക്കാന്‍ തുടങ്ങുന്ന കുട്ടിക്ക് വലിയ അക്ഷരങ്ങളില്‍ കുറച്ചുമാത്രം വാക്കുകളുള്ള പുസ്തകങ്ങള്‍ വാങ്ങിക്കുക.ഒരുപാടു വരികളും ചെറിയ അക്ഷരങ്ങളുമുള്ള പുസ്തകങ്ങള്‍ കുട്ടികളുടെ വായനാതാല്‍പര്യം കുറച്ചേക്കും.

പുറത്തുപോകുമ്പോള്‍ പരസ്യബോര്‍ഡുകളിലെ വാക്കുകളും അക്ഷരങ്ങളും കുട്ടിയെക്കൊണ്ട് വായിപ്പിക്കുക. ഒരു വാക്കു പറഞ്ഞ് അത് എവിടെയാണെന്ന് കണ്ടുപിടിക്കാന്‍ കുട്ടിയോടാവശ്യപ്പെടാം. ഇത്തരം കാര്യങ്ങള്‍ സ്വാഭാവികമായും വായിക്കാനുള്ള താല്‍പര്യം കുട്ടികളില്‍ വളര്‍ത്തും.

വീട്ടിലെ സാധനങ്ങളില്‍ പേരെഴുതി ഒട്ടിക്കുക. ആവശ്യമുള്ള സാധനം കണ്ടുപിടിച്ചുകൊണ്ടു വരാന്‍ കുട്ടിയോടു പറയുക.

ടെലിവിഷനില്‍ പഠനപരിപാടികളുണ്ടെങ്കില്‍ കുട്ടിയില്‍ അത് കാണാനുളള താല്‍പര്യം വളര്‍ത്തിയെടുക്കുക. ഇത് വാക്കുകളുമായി പരിചയപ്പെടാന്‍ കുട്ടിയെ സഹായിക്കും.

ഒരിക്കലും വായനാശീലം കുട്ടികളില്‍ അടിച്ചേല്‍പ്പിക്കാനുള്ളതല്ലെന്നോര്‍ക്കുക. വായിക്കാന്‍ കുട്ടികളില്‍ താല്‍പര്യമുണ്ടാക്കുകയാണ് വേണ്ടത്.