കുട്ടികളെ ഭാഷ പഠിപ്പിക്കൂ

Kids

oi-Saritha

By Veena

Published: Wednesday, August 8, 2012, 12:10 [IST]

ലോകം വളരുന്തോറും കുട്ടികള്‍ക്കുള്ള അടിസ്ഥാന കാര്യങ്ങളും കൂടുതല്‍ സങ്കീര്‍ണമാവുകയാണ്. മുന്‍പൊക്കെ സംസാരിച്ചു തുടങ്ങുന്ന കുട്ടി അച്ഛനമ്മമാരുടെ ഭാഷ പിന്‍തുടരുന്നതാണ് പതിവ്. എന്നാല്‍ മാതാപിതാക്കളും പലവിധ ഭാഷകള്‍ ഉപയോഗിക്കുന്നതോടെ ബുദ്ധിമുട്ടിലാകുന്നത് കുട്ടികളാണ്. ഏതു ഭാഷ വേണമെന്ന, എന്നാല്‍ ഒരു ഭാഷയും പൂര്‍ണമായി ഉള്‍ക്കൊള്ളാനാവാത്ത ഒരു അവസ്ഥ.

കുട്ടികള്‍ ഒന്നില്‍ കൂടുതല്‍ ഭാഷകള്‍ അറിഞ്ഞിരിക്കുന്നത് നല്ലതു തന്നെ. എന്നാല്‍ ഇവ പഠിപ്പിക്കുമ്പോഴും ശ്രദ്ധിക്കേണ്ട കാര്യങ്ങളുണ്ട്.

കുട്ടികള്‍ മുതിര്‍ന്നവരേക്കാള്‍ കൂടുതല്‍ ഭാഷ സ്വായത്തുമാക്കുമെന്നത് ശരി തന്നെ. എന്നാല്‍ ഒരു ഭാഷ മാത്രം സംസാരിച്ചു തുടങ്ങുന്ന കുട്ടിയെ പഠിപ്പിക്കുന്നതും അവരുമായുള്ള ആശയ വിനിമയത്തിന് ഉപയോഗിക്കുന്നതുമാണ് കൂടുതല്‍ നല്ലത്. കുടുംബാംഗങ്ങള്‍ ആശയവിനിമയത്തിന് ഉപയോഗിക്കുന്ന ഭാഷ മിക്കവാറും മാതൃഭാഷയാകും. ഇതുതന്നെ കുട്ടികളെ ആദ്യം പഠിപ്പിക്കുന്നതാണ് നല്ലത്.

ഒരേ സമയം രണ്ടു ഭാഷകള്‍ ഉപയോഗിക്കാന്‍ കുട്ടികളെ പ്രോത്സാഹിപ്പിക്കരുത്. ഉദാഹരണത്തിന് മലയാളവും ഇംഗ്ലീഷും ഇടകലര്‍ത്തി മംഗ്ലീഷ് ഭാഷ വേണ്ട. ഇത്തരം സംസാരം ഇരുഭാഷകളിലുമുള്ള കുട്ടികളുടെ അടിസ്ഥാനമില്ലാതാക്കും. എല്ലാമറിയാം, എന്നാല്‍ ഒന്നുമറിയില്ല എന്ന അവസ്ഥ വരുത്തരുത്.

മാതൃഭാഷ എഴുതാനും വായിക്കാനും സംസാരിക്കാനും കുട്ടികളെ നിര്‍ബന്ധമായും പഠിപ്പിച്ചിരിക്കണം. ഇംഗ്ലീഷേ അറിയൂ എന്നത് പൊങ്ങച്ചമായി കണ്ടിരുന്ന കാലഘട്ടം പോയി. സ്വന്തം സംസ്‌കാരത്തോടും മാതൃഭാഷയോടും കുട്ടിക്ക് ബഹുമാനം തോന്നാന്‍ ഇത് അത്യാവശ്യവുമാണ്.

സ്‌കൂളില്‍ പോകുന്ന കുട്ടികള്‍ മാതൃഭാഷ കൂടാതെ മറ്റു ഭാഷകള്‍ പഠിക്കും. ഇതു നല്ലതു തന്നെ. എങ്കിലും മാതൃഭാഷയോട് കുട്ടിക്ക് അകലം വരാതിരിക്കാന്‍ ശ്രദ്ധിക്കുക. വീട്ടില്‍ മാതൃഭാഷ മാത്രമെ പാടുള്ളൂവെന്ന നിര്‍ബന്ധം വയ്ക്കുക.

അക്ഷരങ്ങളുമായി അടുപ്പം വര്‍ദ്ധിപ്പിക്കാന്‍ സഹായിക്കുന്ന ഒന്നാണ് പുസ്തകങ്ങള്‍. പുസ്തകങ്ങളെ കുട്ടികളുടെ കൂട്ടുകാരാക്കുക.