കുട്ടികളുടെ ബുദ്ധിക്ക് ഭക്ഷണവും

Kids

oi-Saritha

By Veena

Published: Monday, June 4, 2012, 15:28 [IST]

കുട്ടികളുടെ വളര്‍ച്ച കൊണ്ട് ഉദ്ദേശിക്കുന്നത് ശരീരവളര്‍ച്ച മാത്രമല്ലാ, തലച്ചോറിന്റെ വളര്‍ച്ച കൂടിയാണ്. ബുദ്ധി കൂടുതല്‍ വികസിക്കുന്നതും കുട്ടികളില്‍ തന്നെ. ശരിയായി പഠിക്കാനും കളിക്കാനും ബുദ്ധിവികാസം വളരെ അത്യാവശ്യവുമാണ്.

പഠിക്കുന്നതോടൊപ്പവും കളിയ്ക്കുന്നതോടൊപ്പവും കുട്ടികളിലെ ബുദ്ധി വികാസത്തില്‍ ഭക്ഷണവും കാര്യമായ പങ്കു വഹിക്കുന്നുണ്ട്. ചില പ്രത്യേകതരം ഭക്ഷണങ്ങള്‍ കുട്ടികളുടെ ബുദ്ധിവികാസത്തെ സഹായിക്കും.

പാലുല്‍പന്നങ്ങള്‍ കുട്ടികളുടെ ബുദ്ധിവളര്‍ച്ചക്ക് വളരെ പ്രധാനപ്പെട്ടതാണ്. പാലും തൈരും വെണ്ണയും നെയ്യുമെല്ലാം ഗുണം ചെയ്യും. ഇതില്‍ കാല്‍സ്യ, പ്രോട്ടീന്‍, പൊട്ടാസ്യം, വൈറ്റമിന്‍ ഡി തുടങ്ങിയ എല്ലാതരം ധാതുക്കളും അടങ്ങിയിട്ടുണ്ട്. ഇവ ന്യൂറോ മസ്‌കുലാര്‍ സിസ്റ്റം, ന്യൂറോ ട്രാന്‍സ്മിറ്ററുകള്‍, എന്‍സൈമുകള്‍, ബ്രെയിന്‍ ടിഷ്യൂ എന്നിവയുടെ വളര്‍ച്ചക്ക് പ്രധാനമാണ്. ചെറിയ കുട്ടികള്‍ക്ക് മാത്രമല്ലാ, കൗമാരപ്രായക്കാര്‍ക്കും ഇവ നല്ല ഭക്ഷണങ്ങളാണ്.

സ്‌ട്രോബെറി, ബ്ലൂബെറി, ചെറി, ബ്ലാക്് ബെറി എന്നിവ ബ്രെയിന്‍ ബെറി എന്നാണ് അറിയപ്പെടുന്നത്. ഇവ കുട്ടികളുടെ ബുദ്ധിവികാസത്തിന് വളരെ ഗുണം ചെയ്യും. ഇവയിലെ ആന്റി ഓക്‌സിഡന്റുകളും വൈറ്റമിന്‍ സിയുമെല്ലാം ബുദ്ധിവികാസത്തിന് സഹായിക്കും. ബ്രെയിന്‍ കോശങ്ങളുടെ വളര്‍ച്ചക്ക് ഇവ സഹായിക്കും.

നട്‌സും കുട്ടികളിലെ ബുദ്ധിവളര്‍ച്ചയെ സഹായിക്കും. ബദാം, പിസ്ത, ഉണക്കമുന്തിരി, നിലക്കടല തുടങ്ങിയവയെല്ലാം ഇതിലുള്‍പ്പെടും. ഇവയില്‍ കൊളീന്‍ എന്നൊരു പദാര്‍ത്ഥമുണ്ട്. തലച്ചോറിലെ മെമ്മറി കോശങ്ങളുടെ ഉല്‍പാദനത്തിന് ഇവ സഹായിക്കുന്നു. ക്ഷീണവും തളര്‍ച്ചയും കുറയ്ക്കാനും ഇത് നല്ലതാണ്. ഇവയിലെ വൈറ്റമിന്‍ ഡിയും കുട്ടികളിലെ ബുദ്ധിവികാസത്തിന് ഗുണം ചെയ്യും.

ധാന്യങ്ങളും കുട്ടികള്‍ക്ക് നല്‍കണം. തവിടു കളയാത്ത അരി, ഓട്‌സ്, കോണ്‍ഫ്‌ളെക്‌സ് എന്നിവയെല്ലാം ബുദ്ധിവളര്‍ച്ചക്ക് നല്ലതാണ്. ഇവയിലെ വൈറ്റമിന്‍ ബി തലച്ചോറിലേക്കുള്ള രക്തപ്രവാഹം വര്‍ദ്ധിപ്പിക്കും. ശരീരം എപ്പോഴും ഉണര്‍വോടെയിരിക്കാന്‍ സഹായിക്കും.

സാല്‍മണ്‍ അഥവാ കോര എന്ന മത്സ്യവും കുട്ടികള്‍ക്ക് നല്‍കുന്നതു നല്ലതാണ്. ഇത് കുട്ടികളിലെ ബുദ്ധിവളര്‍ച്ചക്ക് ഏറെ ഗുണം ചെയ്യും. ഈ മത്സ്യം ഓര്‍മശക്തിക്ക് നല്ലതാണെന്നു തെളിഞ്ഞിട്ടുണ്ട്.

ഇവയ്ക്കു പുറമെ പച്ചക്കറികളും പഴവര്‍ഗങ്ങളും അടങ്ങിയ ഡയറ്റാണ് കുട്ടികളുടെ ബുദ്ധിവളര്‍ച്ചക്ക് സഹായം ചെയ്യുക.