കുട്ടിമോഷണത്തിന് കാരണവുമുണ്ട്

Kids

oi-Saritha

By Veena

Published: Wednesday, May 23, 2012, 14:53 [IST]

ചില കുട്ടികളില്‍ ചെറിയ മോഷണങ്ങള്‍ നടത്തുന്ന ശീലം കണ്ടുവരാറുണ്ട്. ആദ്യം ഇവര്‍ വീട്ടില്‍ നിന്നായിരിക്കും ഈ ശീലം തുടങ്ങുന്നത്. പിന്നീട് ക്ലാസില്‍ നിന്നോ കൂട്ടുകാരില്‍ നിന്നോ. ഇത്തരം ശീലങ്ങള്‍ ചെറുപ്പത്തിലെ മാറ്റിയില്ലെങ്കില്‍ വളരുമ്പോള്‍ ആപത്തായി തീരും.

ചിലപ്പോള്‍ ജന്മവാസനയാകാം ഇത്തരം പ്രവൃത്തികള്‍ക്ക് പുറകില്‍. അല്ലെങ്കില്‍ ചെറിയൊരു ദുശീലം. പ്രത്യേക കാരണമില്ലെങ്കിലും സാധനങ്ങള്‍ മോഷ്ടിക്കുന്നത് ക്ലെപ്‌റ്റോമാനിയ എന്നൊരു അവസ്ഥയുമാകാം.

ഇത്തരം മോഷണങ്ങള്‍ക്ക് പിന്നില്‍ കാരണങ്ങളും പലതാണ്. ഇത് പലപ്പോഴും ആവശ്യങ്ങള്‍ക്ക് വേണ്ടിയാകണമെന്നില്ല. കാരണം ക്ലെപ്‌റ്റോമാനിയ എന്ന അവസ്ഥ കണ്ടുവരുന്നവരില്‍ സാമ്പത്തിക സൗകര്യമുള്ള വീട്ടിലെ കുട്ടികളും ഉള്‍പ്പെടുന്നു.

ചിലപ്പോഴെങ്കിലും വേണ്ട രീതിയില്‍ മാതാപിതാക്കളുടെ ശ്രദ്ധ ലഭിക്കാത്തതാണ് കുട്ടികളെ ഈ അവസ്ഥയിലേക്ക് നയിക്കുന്നത്. ശ്രദ്ധ പിടിച്ചു പറ്റാനുള്ള മറ്റേതു മാര്‍ഗത്തെപ്പോലെയാണ് മോഷണവും കുട്ടികള്‍ കാണുന്നത്.

ഒന്നില്‍ കൂടുതല്‍ കുട്ടികളുള്ളപ്പോള്‍ മറ്റേയാള്‍ക്ക് തന്നേക്കാള്‍ ശ്രദ്ധ ലഭിക്കുന്നുവെന്ന തോന്നലും കുട്ടികളില്‍ ക്ലെപ്‌റ്റോമാനിയ എന്ന അവസ്ഥയുണ്ടാക്കുന്നുണ്ട്.

ഇഷ്ടമുള്ള സാധനങ്ങള്‍ സ്വന്തമാക്കാനുള്ള ആഗ്രഹവും ചില കുട്ടികളിലെ മോഷണ സ്വഭാവത്തിന് പുറകിലുണ്ട്.

കുട്ടികളിലെ മോഷണം കണ്ടെത്തിക്കഴിഞ്ഞാല്‍ അതിന് അവരെ ശകാരിക്കുകയോ ശിക്ഷിക്കുകയോ അല്ല ആദ്യം വേണ്ടത്. ഇതിന് അവരെ പ്രേരിപ്പിക്കുന്ന കാര്യമെന്തെന്ന് കണ്ടത്തണം. കുട്ടിയെ വിളിച്ചിരുത്തി സമാധാനമായി കാര്യങ്ങള്‍ ചോദിച്ച് മനസിലാക്കാം.

മാതാപിതാക്കളുടെ ശ്രദ്ധക്കുറവാണ് ഇതിന് കുട്ടികളെ പ്രേരിപ്പിക്കുന്നതെങ്കില്‍ ഇതിന് പരിഹാരം കണ്ടെത്താന്‍ മാതാപിതാക്കള്‍ക്കു തന്നെ കഴിയും.

കുട്ടികള്‍ പണം മോഷ്ടിച്ചെങ്കില്‍ കൂടുതല്‍ പോക്കറ്റ് മണി കൊടുത്ത് പ്രശ്‌നപരിഹാരത്തിന് ശ്രമിക്കുന്നവരുണ്ട്. ഇത് കുട്ടികളെ കൂടുതല്‍ വഷളാക്കാനേ ഉപകരിക്കൂ. ആവശ്യത്തില്‍ കൂടുതല്‍ പണം ഒരിക്കലും കുട്ടികള്‍ക്ക് നല്‍കരുത്.