കുട്ടികളിലെ തലയിലെ താരന്‍ അകറ്റാം

Kids

oi-Saritha

By Veena

Published: Saturday, October 29, 2011, 10:30 [IST]

കുട്ടികളിലെ താരന്‍ സാധാരണയായി കണ്ടുവരുന്ന ഒരു പ്രശ്‌നമാണ്. മുതിര്‍ന്നവരേക്കാളേറെ ഇത് കുട്ടികള്‍ക്ക് ബുദ്ധിമുട്ടുണ്ടാക്കുന്നു. ചൊറിച്ചിലും തുടര്‍ന്ന് ശിരോചര്‍മത്തിലുണ്ടാകുന്ന പ്രശ്‌നങ്ങളും കാര്യം ഗുരുതരമാക്കുകയും ചെയ്യും. മുതിര്‍ന്നവര്‍ക്ക് താരനുപയോഗിക്കാന്‍ കഴിയുന്ന വീര്യമേറിയ ഷാംപൂ കുട്ടികള്‍ക്ക് ഉപയോഗിക്കുവാനും സാധിക്കില്ല. അതുകൊണ്ട് ഒരിക്കല്‍ വന്നുകഴിഞ്ഞാല്‍ താരന്‍ മാറ്റുവാനും ബുദ്ധിമുട്ടാണ്.

താരന്‍ വരാനുള്ള പ്രധാന കാരണം ശിരോചര്‍മത്തിന് വൃത്തിയില്ലാത്തതും വരണ്ട ശിരോചര്‍മവുമാണ്. വെളിച്ചെണ്ണ ചൂടാക്കി കുട്ടിയുടെ തലയോടില്‍ നല്ലപോലെ മസാജ് ചെയ്യുക. ഇത് ഈ പ്രശ്‌നത്തിന് നല്ലൊരു പരിഹാരമാണ്. കെമിക്കല്‍ ഷാംപൂ കഴിവതും ഉപയോഗിക്കാതിരിക്കുകയാണ് നല്ലത്. ഇത് തലയോടിനെ ഒന്നുകൂടി വരണ്ടതാക്കും. ഹെര്‍ബല്‍ ഷാംപൂ ഉപയോഗിക്കുക. അധികം ഷാംപൂ തേയ്ക്കാതിരിക്കുകയാണ് നല്ലത്. എണ്ണ തേച്ച് മസാജ് ചെയ്ത ശേഷം മുടി ചീകുന്നതും നല്ലതാണ്.

തൈരും ഉലുവാപ്പൊടിയും കൂട്ടിച്ചേര്‍ത്ത് തലയോടില്‍ തേയ്ക്കുന്നത് നല്ലതാണ്. ഇത് തലയിലെ ജലാംശം നിലനിര്‍ത്തുമെന്ന് മാത്രമല്ലാ, ബാക്ടീരിയ കാരണമുണ്ടാകുന്ന അണുബാധ തടയുകയും ചെയ്യും. കെമിക്കല്‍ അംശം അടങ്ങിയിട്ടില്ല എന്നൊരു ഗുണം കൂടി ഇതിനുണ്ട്.

കുട്ടികളുടെ ശിരോചര്‍മത്തില്‍ ചിലപ്പോള്‍ വട്ടച്ചൊറി, ഫംഗസ് ബാധ തുടങ്ങിയവയുമുണ്ടാകാറുണ്ട്. ഇതിന് സ്വയം ചികിത്സയേക്കാള്‍ ഡോക്ടറുടെ ഉപദേശം തേടുകയാണ് നല്ലത്. ആര്യവേപ്പെണ്ണ തലയില്‍ പുരട്ടുന്നത് ഫംഗസ് ബാധ മാററാന്‍ നല്ലതാണ്.

ഷാംപൂ ഉപയോഗിക്കണമെങ്കില്‍ കുട്ടികള്‍ക്കുള്ള ഷാംപൂ വാങ്ങി ഉപയോഗിക്കുക. മുതിര്‍ന്നവര്‍ക്കുള്ള ഷാംപൂ യാതൊരു കാരണവശാലും കുട്ടികളുടെ തലയില്‍ തേയ്ക്കരുത്.

കുട്ടികള്‍ കളിക്കുമ്പോഴും ഓടിച്ചാടി നടക്കുമ്പോഴും വിയര്‍ത്ത് തലയില്‍ അഴുക്ക് വരാന്‍ സാധ്യതയുണ്ട്. താരനും മറ്റു പ്രശ്‌നങ്ങളുടേയും പ്രധാന ഉറവിടം ഇതാണ്. എപ്പോഴും അവരുടെ മുടി വൃത്തിയാക്കി വയ്ക്കണം.

കുട്ടികള്‍ക്കായി പ്രത്യേകം ചീപ്പ് വേണം. ഇത് ഇടയ്ക്കിടെ വൃത്തിയാക്കുകയും വേണം. താരനുള്ളവര്‍ ഉപയോഗിക്കുന്ന തലയിണയോ ടവലോ കുട്ടികള്‍ ഉപയോഗിക്കാതെ ശ്രദ്ധിക്കുക.