‍തൊഴില്‍മേഖല, കുട്ടികളെ സഹായിക്കാം

Kids

oi-Saritha

By Veena

Published: Saturday, September 24, 2011, 10:26 [IST]

കുട്ടികളുടെ ഭാവിയെപ്പറ്റി അച്ഛനമ്മമാര്‍ ഏറെ സ്വപ്‌നം കാണാറുണ്ട്. തങ്ങള്‍ വിചാരിക്കുന്ന രീതിയിലേക്ക് കുഞ്ഞുങ്ങളെ എത്തിക്കാന്‍ അവര്‍ പലപ്പോഴും സമ്മര്‍ദം ചെലുത്തുന്നു. എന്നാല്‍ ഓര്‍ത്തിരിക്കേണ്ട ഒരു കാര്യമുണ്ട്. പൂമൊട്ടിനെ ബലമായി വിടര്‍ത്തിയാല്‍ അതിന് മണവും ഗുണവുമുണ്ടാകില്ല. അതു താനേ വിരിഞ്ഞാലേ ഭംഗിയും മണവുമുണ്ടാകൂ. കുഞ്ഞുങ്ങള്‍ പൂക്കളെപ്പോലെയാണ്. അവര്‍ തങ്ങളുടെ രീതിയില്‍ വളര്‍ന്നു വരുതാകണം. എങ്കിലേ അവരുടെ ജീവിതത്തിനും ഭംഗിയൂണ്ടാകൂ.

മക്കളെ ഡോക്ടറോ എഞ്ചിനീയറോ ആക്കാനാണ് മാതാപിതാക്കള്‍ പരക്കം പായുന്നത്. അതിനു വേണ്ടി കളിച്ചുനടക്കേണ്ട കുട്ടികളെ കമ്പ്യൂട്ടറിനു മുമ്പില്‍ പിടിച്ചിരുത്തുന്ന 'സോഫ്റ്റ്‌വെയര്‍' ഡാഡിമാരുമുണ്ട്. കളിച്ചുനടക്കേണ്ട പ്രായത്തില്‍ കുഞ്ഞിനെപ്പടിച്ചു കമ്പ്യൂട്ടറിനു മുന്നിലിരുത്തുന്നത് ദോഷമേ ചെയ്യൂ. കുട്ടികളുടെ ഇഷ്ടവും താല്‍പര്യവുമറിയാതെ അവരെ തൊഴില്‍മേഖലയിലേക്ക് തള്ളിവിടരുത്.

കുട്ടികളുടെ കരിയര്‍ രൂപപ്പെടുത്തുവാന്‍ വേണ്ടി മാതാപിതാക്കളെ സഹായിക്കുന്ന ചില കാര്യങ്ങളിതാ;

ആദ്യമായി മനസിലാക്കേണ്ടത് ഡോക്ടര്‍, എഞ്ചിനീയര്‍ എന്നിവല്ലാതെ വേറെയും വളരെ നല്ല തൊഴില്‍ മേഖലകളുണ്ടെന്നതാണ്. മനസിനിണങ്ങിയ മേഖല തെരഞ്ഞെടുക്കാന്‍ കുട്ടികളെ സഹായിക്കുകയാണ് വേണ്ടത്, അല്ലാതെ നിര്‍ബന്ധിക്കുകയല്ല.

ബാല്യം പഠിപ്പിനൊപ്പം കളിക്കേണ്ടതും കൂടിയാണ്. കുട്ടികളെ കളിക്കാനും പാട്ടുപാടാനും നൃത്തംചെയ്യാനും അവര്‍ക്കിഷ്ടമുള്ള നല്ല കാര്യങ്ങള്‍ ചെയ്യാനും അനുവദിക്കുക. ഇത്തരം കാര്യങ്ങള്‍ കുട്ടികളില്‍ ഭാവനകള്‍ വളര്‍ത്താനും കാര്യങ്ങള്‍ മനസിലാക്കാനും സഹായിക്കും. പഠനത്തിന്റെ പിരിമുറുക്കത്തില്‍ നിന്നും കുട്ടികളുടെ മനസിനെ സ്വസ്ഥമാക്കാനും ഇത്തരം വിനോദങ്ങള്‍ക്ക് കഴിയും.

കുട്ടികളെ കുറച്ചുകാലം സൂക്ഷ്മമായി നിരീക്ഷിച്ചാല്‍ അവരുടെ താല്‍പര്യം എന്തിലാണെന്ന് അറിയാന്‍ കഴിയും. ഇതടിസ്ഥാനപ്പെടുത്തിയാണ് അവരുടെ തൊഴില്‍മേഖല ഏതെന്നു തീരുമാനിക്കേണ്ടത്. മനസിനിണങ്ങാത്ത ജോലി ഒരിക്കലും സന്തോഷത്തോടെ ചെയ്യാന്‍ കഴിയില്ല. ഒരു പരിധി കഴിഞ്ഞാല്‍ മടുപ്പുളവാകുകയും ചെയ്യും. പിന്നീട് ഒരു യന്ത്രം പോലെ ജോലി ചെയ്യേണ്ടി വരും.

മുതിര്‍ന്നവരെ ബഹുമാനിക്കാനും മറ്റുള്ളവരുമായി ഇടപഴകാനും കുട്ടികളെ ശീലിപ്പിക്കണം. ബന്ധുക്കളില്‍ നിന്നും കൂട്ടുകാരില്‍ നിന്നും ഇവരെ അകറ്റിനിര്‍ത്തരുത്. മറ്റുള്ളവരെപ്പററി പഠിക്കാനും ബന്ധങ്ങളുടെ മൂല്യം മനസിലാക്കാനും ഇത് സഹായിക്കും. ഭാവിയില്‍ ജോലിസ്ഥലത്തും ഇത് കുട്ടികള്‍ക്ക് സഹായകമാകും.

കുട്ടികളെ ഭരിക്കുന്നതിന് പകരം തെറ്റുകള്‍ ചൂണ്ടിക്കാട്ടി നല്ല സുഹൃത്തുക്കളാകാന്‍ മാതാപിതാക്കള്‍ ശ്രമിക്കണം. ഭാവിയില്‍ നി്ങ്ങളുടെ അഭിപ്രായങ്ങള്‍ മുഖവിലക്കെടുക്കാന്‍ കുട്ടികളെ ഇതു പ്രേരിപ്പിക്കും.