ജോലിക്കു പോകുന്നോ, കുഞ്ഞിനെ ഒരുക്കൂ

Kids

oi-Saritha

By Veena

Published: Saturday, October 1, 2011, 10:42 [IST]

കുഞ്ഞുങ്ങളുണ്ടായ ശേഷം ജോലിക്കു തിരിച്ചുപോകുന്ന കാര്യം അമ്മമാര്‍ക്ക് ഏറെ പിരിമുറുക്കമുണ്ടാക്കും. ജോലിയും കുഞ്ഞുങ്ങളുടെ കാര്യവും വീട്ടിലെ ഉത്തരവാദിത്വങ്ങളും ബാലന്‍സ് ചെയ്തുപോകുകയെന്നത് കുറച്ചു ബുദ്ധിമുട്ടുതന്നെയാണ്. അമ്മ മാത്രമല്ലാ, കുഞ്ഞും ഈ സാഹചര്യവുമായി പൊരുത്തപ്പെട്ടു വരണം.

കുഞ്ഞിനെ വിട്ട് ജോലിക്കു പോകാന്‍ ആദ്യമേ മാനസികമായി ഒരുങ്ങണം. അവരെ ഇതിനായി ഒരുക്കുകയും വേണം. പെട്ടെന്നൊരു ദിവസം കുട്ടിയെ ഇട്ട് ജോലിക്കു പോയിത്തുടങ്ങിയാല്‍ കുഞ്ഞിനെ ഇത് മാനസികമായി ഇത് ഏറെ ബാധിക്കും.

ജോലിക്കു പോകുന്ന കാര്യം കുഞ്ഞിനോട് മുന്‍പേ പറയണം. കുറച്ചു മുതിര്‍ന്ന കുട്ടികള്‍ക്കിത് കുറേയൊക്കെ മനസിലാകും. തീരെ ചെറിയ കുഞ്ഞുങ്ങള്‍ക്കാകട്ടെനിങ്ങളെ വീട്ടില്‍ കാണാതാകുമ്പോള്‍ ഇക്കാര്യം ബോധ്യമാകും.

നിങ്ങള്‍ ചെയ്യാന്‍ പോകുന്ന ജോലിയെക്കുറിച്ച് കുഞ്ഞുങ്ങളോടു പറയാം. കഥാരൂപത്തില്‍ ഇത് പറഞ്ഞു മനസിലാക്കിക്കൊടുക്കാം. ഉദാഹരണമായി ഉറുമ്പിന്റെ കഥ പറയാം. ഭക്ഷണം ശേഖരിക്കാന്‍ വേണ്ടി കുഞ്ഞുറുമ്പിനെ വീട്ടില്‍ വിട്ടു പോയ രീതിയിലുള്ള കഥകള്‍ അമ്മ ജോലിക്കു പോകുന്നതിനെക്കുറിച്ചു മനസിലാക്കാന്‍ കുഞ്ഞുങ്ങളെ സഹായിക്കും.

ജോലിക്കു പോകുന്ന സമയത്ത് കുഞ്ഞുങ്ങളെ നോക്കുവാന്‍ ആരെങ്കിലും വീട്ടിലുണ്ടാകും. അല്ലെങ്കില്‍ ഡെ കെയറിലായിരിക്കും കുഞ്ഞിനെ വിട്ടിട്ടുപോകുക. രണ്ടായാലും ജോലിക്കു പോകുന്നതിന് ഒരാഴ്ച മുന്‍പ് ഈ രീതിയില്‍ കുഞ്ഞിനെ വിടുക. കഴിവതും നേരം കുഞ്ഞിനെ കൂടെ നിര്‍ത്താനായിരിക്കും അമ്മക്കു താല്‍പര്യം. എന്നാല്‍ പൊടുന്നനെ കുഞ്ഞിനെ മറ്റൊരാളുടെ കൂടെയാക്കുന്നത് കുഞ്ഞിന് ഉള്‍ക്കൊള്ളാന്‍ കഴിഞ്ഞെന്നു വരില്ല.

പുതിയ സാഹചര്യവുമായി പൊരുത്തപ്പെടാന്‍ കുഞ്ഞിന് സമയം വേണ്ടി വരും. തുടക്കത്തില്‍ എതിര്‍പ്പുകളും വാശിയും കുഞ്ഞുങ്ങളില്‍ നിന്നുണ്ടായെന്നു വരാം. ഇത് കുറച്ചു കഴിയുമ്പോള്‍ ശരിയാകും.

കുഞ്ഞുങ്ങളുടെ ഭക്ഷണം പ്രധാന പ്രശ്‌നമാണ്. മുലപ്പാല്‍ കുടിക്കുന്ന കുഞ്ഞുങ്ങള്‍ക്കാണ് ഏറെ ബുദ്ധിമുട്ടുണ്ടാകുക. ഇവരുടെ പ്രധാന ഭക്ഷണം ഇതായിരിക്കും. ജോലിക്കു പോകുന്നതിന് കുറച്ചു മുന്‍പു തന്നെ മറ്റു ഭക്ഷണങ്ങളോ കുപ്പിപ്പാലോ കുഞ്ഞിനെ ശീലിപ്പിക്കുക.

കുഞ്ഞിനെ നോക്കുന്നവര്‍ ചെറിയ വീഴ്ച വരുത്തുമ്പോള്‍ ദേഷ്യം വരാതെ കാര്യങ്ങള്‍ പറഞ്ഞുകൊടുക്കുവാന്‍ ശ്രമിക്കുക. പലരും മാറിവരുന്നതിനേക്കാള്‍ ഒരാള്‍ തന്നെ സ്ഥിരമായി കുഞ്ഞിനെ നോക്കാന്‍ നില്‍ക്കുന്നതായിരിക്കും നല്ലത്.