നിങ്ങളുടെ കുട്ടി കള്ളം പറയുന്നോ?

ഏതു പ്രായത്തിലുളള കുട്ടികളും കള്ളം പറയും. എന്തുകൊണ്ടാണ് കുട്ടികള്‍ കള്ളം പറയുന്നതെന്ന് ആദ്യം കണ്ടെത്തണം. നിങ്ങളുടെ കുട്ടി തീരെ ചെറുതാണെങ്കിലും കാര്യമില്ലാതെയാണ് കള്ളം പറയുന്നതെന്ന് കരുതരുത്. കള്ളം പറയേണ്ടതിന്റെ ആവശ്യകത ബോധ്യമായിട്ടായിരിക്കണം കുട്ടി കള്ളം പറയുന്നത്.

ചില സമയത്ത് സത്യം പറയാന്‍ പേടിച്ചിട്ടായിരിക്കും കുട്ടികള്‍ കള്ളം പറയുന്നത്. തെറ്റു ചെയ്‌തെന്നു ബോധ്യമുള്ളപ്പോള്‍ അവര്‍ ചിലപ്പോള്‍ കള്ളം പറഞ്ഞേക്കും. ഉദാഹരത്തിന് നിങ്ങളുടെ നെയില്‍ പോളിഷ് പൊട്ടിച്ചു കളഞ്ഞതിന് അവര്‍ എന്തെങ്കിലും കള്ളം പറഞ്ഞെന്നു വരാം. അവരെ വഴക്കുപറയുകയോ അടിക്കുകയോ ചെയ്യുമോയെന്നു പേടിച്ചാണ് മിക്കപ്പോഴും ഇത്തരം കാര്യങ്ങള്‍ക്ക് കുട്ടികള്‍ കള്ളം പറയുന്നത്.

കാര്യമില്ലാതെയും കുട്ടികള്‍ കള്ളം പറയാം. സ്‌കൂളില്‍ എന്തുണ്ടായെന്ന ചോദ്യത്തിന് ഒരു ഉപഗ്രഹജീവി സ്‌കൂളില്‍ വന്നെന്നു കുട്ടി പറഞ്ഞാല്‍ അത് അവരുടെ ഭാവനയാണു കാണിക്കുന്നത്. ഇതിന് അവരെ വഴക്കുപറയുകയോ തല്ലുകയോ ചെയ്യരുത്.

കുട്ടി എന്തിനാണ് കള്ളം പറഞ്ഞതെന്ന് ചിലപ്പോള്‍ നിങ്ങള്‍ക്ക് അറിയാമായിരിക്കും. എന്നിട്ടും ഇതെപ്പറ്റി വീണ്ടും വീണ്ടും ചോദിച്ചാല്‍ അത് നിങ്ങള്‍ കൂടുതല്‍ കാര്‍ക്കശ്യത്തിലേക്കു നീങ്ങുന്നുവെന്നാണ് കാണിക്കുന്നത്. നിങ്ങള്‍ തന്നെ നിങ്ങളെപ്പററി വിലയിരുത്തേണ്ട സന്ദര്‍ഭമാണിത്.

മുതിര്‍ന്നിട്ടും കള്ളം പറയുന്ന ശീലം തുടരുകയാണെങ്കില്‍ ഇത് കുറച്ചു ഗൗരവമായിത്തന്നെ എടുക്കണം. കള്ളം പറയുന്നത് നല്ലതല്ലെന്ന് കുട്ടികളെ പറഞ്ഞു മനസിലാക്കണം. ഇത് കഥകളിലൂടെ പറഞ്ഞുകൊടുത്താല്‍ കുട്ടികള്‍ക്ക് എളുപ്പം മനസിലാകും.

കുട്ടികള്‍ നിങ്ങളോട് എന്തെങ്കിലും ചോദിച്ചാല്‍ കഴിവതും സത്യം മാത്രം പറയാന്‍ ശ്രദ്ധിക്കുക. ചിലപ്പോള്‍ അറിയാവുന്ന കാര്യം തന്നെയായിരിക്കും കുട്ടി ചോദിക്കുക. നിങ്ങളുടെ തെററായ മറുപടി കള്ളം പറയാന്‍ കുട്ടിക്കുള്ള പ്രേരണയാകുമെന്നു മറക്കേണ്ട.