പനിയുള്ള കുട്ടിക്ക് പറ്റിയ ഭക്ഷണം

ഗോതമ്പ് എല്ലാവര്‍ക്കും പറ്റിയ സമീകൃതാഹാരമാണ്. പനിയുള്ള കുട്ടിക്ക് നുറുങ്ങിയ ഗോതമ്പരി വേവിച്ച് കഞ്ഞിയാക്കി നല്‍കാം. ഇവയില്‍ പച്ചക്കറികളും സ്വാദിന് അല്‍പം വെണ്ണയും ചേര്‍ക്കാം. ഇവ മൂന്നും പ്രഷര്‍കുക്കറില്‍ ഒരുമിച്ച് വേവിച്ചെടുക്കാം. കാര്‍ബോഹൈഡ്രേറ്റുകളും പ്രോട്ടീനും അടങ്ങിയ ഭക്ഷണമാണിത്. ചെറുചൂടോടെ ഇത് നല്‍കാം. നുറുക്കിയ ഗോതമ്പരി ദഹിക്കാനും എളുപ്പമാണ്.

സൂപ്പുകള്‍ പനിയുള്ളപ്പോള്‍ കൊടുക്കാന്‍ പറ്റിയ ഭക്ഷണമാണ്. പച്ചക്കറികള്‍ വെള്ളത്തിലിട്ട് വേവിച്ച് ഉടച്ച് വെജിറ്റബിള്‍ സൂപ്പുണ്ടാക്കാം. ഇതില്‍ അല്‍പം കുരുമുളകുപൊടിയും ഉപ്പും വേണമെങ്കില്‍ അല്‍പം നെയ്യും ചേര്‍ക്കാം. വെന്ത ശേഷം പച്ചക്കറികളുടെ കഷ്ണങ്ങള്‍ സൂപ്പിലുണ്ടെങ്കില്‍ കുട്ടിക്ക് കുടിക്കാനുള്ള എളുപ്പത്തിന് ഇവ നീക്കാം. മാംസാഹാരം ഇഷ്ടമുളള കുട്ടിക്ക് ആവശ്യമെങ്കില്‍ ചിക്കന്‍സൂപ്പും ഉണ്ടാക്കിക്കൊടുക്കാം. എന്നാല്‍ ദഹിക്കാന്‍ എളുപ്പം വെജിറ്റബില്‍ സൂപ്പാണ്.

കാരറ്റ്, ഗ്രീന്‍പീസ്, ബീന്‍സ്, ചോളം എന്നിവയെല്ലാം സൂപ്പുണ്ടാക്കാന്‍ ഉപയോഗിക്കാം. ചീര കൊണ്ടും സൂപ്പുണ്ടാക്കാം. നല്ലപോലെ വൃത്തിയാക്കിയ ചീര വേവിച്ച് ഉപ്പും കുരുമുളകും നെയ്യും വെണ്ണയും ചേര്‍ത്ത് നല്‍കാം.
പനിയുള്ളപ്പോള്‍ ശരീരത്തിന് കൂടുതല്‍ വെള്ളം ആവശ്യമാണ്. എപ്പോഴും വെളളം കുടിക്കുന്നതിന് പകരം ഇടയ്ക്കിടെ സൂപ്പ് നല്‍കിയാല്‍ കുട്ടിക്ക് ആവശ്യമായ പോഷകങ്ങള്‍ ലഭിക്കുകയും ചെയ്യും. കുട്ടിയുടെ തളര്‍ച്ച അകറ്റാനും സൂപ്പ് നല്ലതാണ്.

പനിയുള്ള സമയത്ത് കുട്ടിയുടെ ദഹനേന്ദ്രിയവും ശരിയായ രീതിയില്‍ പ്രവര്‍ത്തിക്കില്ല. അതുകൊണ്ട് പനിയുള്ളപ്പോള്‍ പാലും പാലുല്‍പന്നങ്ങളും ഒഴിവാക്കുന്നതാണ് നല്ലത്. പാല്‍ ദഹിക്കാന്‍ ബുദ്ധിമുട്ടുള്ള ഭക്ഷണമാണ്. ദഹനം ശരിയായില്ലെങ്കില്‍ കുട്ടിക്ക് ഛര്‍ദിയും വയറിളക്കവും ഉണ്ടാകാനുളള സാധ്യതയും കൂടുതലാണ്.