കുട്ടികളിലെ പ്രമേഹത്തിന് ഭക്ഷണനിയന്ത്രണം

അരിഭക്ഷണം കഴിച്ചാല്‍ പ്രമേഹം കൂടുമെന്നുള്ളത് കൊണ്ട് ചോറ് ഒരു നേരം മാത്രം കൊടുക്കുക. തവിടു കളയാത്ത അരിയായിരിക്കും കൂടുതല്‍ നല്ലത്. ഗോതമ്പ്, ഓട്‌സ് തുടങ്ങിയവ കുട്ടികള്‍ക്ക് പകരം നല്‍കാം.

പച്ചക്കറികളും ഫലവര്‍ഗങ്ങളും കഴിയ്ക്കുന്നതു കൊണ്ട് കുഴപ്പമില്ല. കുക്കുമ്പര്‍, തണ്ണിമത്തന്‍, ഓറഞ്ച്, പപ്പായ, ആപ്പിള്‍, പെയര്‍, മുന്തിരി, തക്കാളി തുടങ്ങിയവ നല്ലതാണ്.

കടല്‍വിഭവങ്ങള്‍ കുട്ടികളുടെ വളര്‍ച്ചയ്ക്ക് വളരെ നല്ലതാണ്. ഇവ വറുത്തു നല്‍കരുത്. ബേക്ക് ചെയ്ത് കഴിക്കുന്നതാണ് നല്ലത്.

കൊഴുപ്പില്ലാത്ത ഇറച്ചി പ്രമേഹമുള്ള കുട്ടികള്‍ക്ക് നല്‍കാം. കൊഴുപ്പു കലര്‍ന്ന ആട്, പോത്ത് തുടങ്ങിയവ ഒഴിവാക്കുന്നതാണ് നല്ലത്. ഇവ തടി വര്‍ദ്ധിപ്പിക്കും. തടി കൂടിയാല്‍ പ്രമേഹം വര്‍ദ്ധിക്കാനുള്ള സാധ്യതയുണ്ട്. ചിക്കന്‍, ടര്‍ക്കി തുടങ്ങിയവ നല്ലതാണ്. ഇവയും വറുക്കുന്നതിന് പകരം ഗ്രില്‍ ചെയ്‌തോ ബേക്ക് ചെയ്‌തോ കഴിയ്ക്കാം.

പാലും വെണ്ണയും കുട്ടികള്‍ കഴിച്ചിരിക്കേണ്ട ഭക്ഷണങ്ങളാണ്. ഇവയും കൊഴുപ്പു കുറഞ്ഞവ നോക്കി തെരഞ്ഞെടുക്കാം. ഐസ്‌ക്രീം മിക്കവാറും എല്ലാ കുട്ടികള്‍ക്കും ഇഷ്ടമുള്ള ഭക്ഷണമാണ്. മധുരം കഴിവതും കുറഞ്ഞ ഐസ്‌ക്രീം കൊടുക്കുക. ഇവ വീട്ടിലുണ്ടാക്കി നല്‍കുകയാണെങ്കില്‍ വളരെ നല്ലത്. ചോക്കലേറ്റുകള്‍ കഴിയ്ക്കുന്നതും കുറയ്ക്കുക.

കുട്ടികള്‍ക്ക് എല്ലാ ഭക്ഷണങ്ങളും പാകത്തിന് കൊടുക്കുന്നത് പ്രമേഹനിയന്ത്രണത്തിന് സഹായിക്കും.