കുട്ടിയുറങ്ങട്ടെ, തനിയെ

Kids

oi-Saritha

By Veena

Published: Friday, September 30, 2011, 12:47 [IST]

കുട്ടികളും ചിലപ്പോഴെങ്കിലും ഏകാന്തത ആഗ്രഹിക്കുന്നുണ്ടാകും. അവര്‍ക്ക് അവരുടേതായ ലോകമുണ്ട്, കാര്യങ്ങളുണ്ട്. എന്നാല്‍ കുട്ടിയെ തനിയെ കിടത്തി ഉറക്കുന്നത് ഭൂരിഭാഗം മാതാപിതാക്കളും ഇഷ്ടപ്പെടുന്നില്ല. തങ്ങളോടുള്ള കുഞ്ഞിന്റെ അടുപ്പം കുറയുമോയെന്ന ഭയമാണ് ഇതിനു പിന്നില്‍. നിങ്ങളുടെ കുഞ്ഞിനെ സ്വയംപര്യാപ്തമാക്കുന്നതിനുള്ള പ്രധാനമാര്‍ഗമാണിതെന്നറിയുക.

കുറച്ചു സമയമെങ്കിലും മാതാപിതാക്കളുടെ കണ്ണില്‍ നിന്നൊഴിഞ്ഞ് കാര്യങ്ങള്‍ ചെയ്യാന്‍ കുട്ടികളും ആഗ്രഹിക്കുന്നുണ്ടാകും. അവര്‍ക്കു ഡയറിയെഴുതണമെങ്കിലോ തനിയെ ഇരുന്നു വായിക്കണമെങ്കിലോ തനിച്ചൊരു മുറിയില്‍ കിടന്നുറങ്ങുമ്പോള്‍ സാധിക്കും. കുട്ടികളിലെ ഭാവന വളരുന്നതിനും തനിച്ചുറങ്ങുന്നത് സഹായിക്കും.

കുട്ടിയെ തനിയെ കിടത്തിയാല്‍ ഭയമുണ്ടാകുമോയെന്ന് സംശയിക്കാം. ഇത് സാവധാനം ശരിയായിക്കൊള്ളും. കുട്ടികള്‍ക്ക് ഭയമുണ്ടെങ്കില്‍ അത് മാറാനും തനിയെ ഉറങ്ങുന്നത് സഹായിക്കും. ആദ്യമൊക്കെ വേണമെങ്കില്‍ അവരുറങ്ങുന്നതുവരെ അമ്മക്കോ അച്ഛനോ കൂടെക്കിടക്കാം. കഥ പറഞ്ഞും പാട്ടുപാടിയും കുട്ടിയെ ഉറക്കാം. കുറച്ചു ദിവസങ്ങള്‍ കഴിഞ്ഞാല്‍ കുഞ്ഞിനിത് ശീലമാകും.

കുട്ടികളെ മാററിക്കിടത്തുന്നത് അവരുടെ മേലുളള നിയന്ത്രണം വിട്ടുപോയെങ്കിലോ എന്നു ഭയപ്പെടുന്ന മാതാപിതാക്കളുമുണ്ട്. ഒറ്റക്കുറങ്ങുന്നത് കുട്ടികളെ നിയന്ത്രിക്കാനുളള അധികാരത്തെ വിട്ടുകൊടുക്കുന്നില്ലെന്നു മനസിലാക്കണം. കുട്ടിയുടെ ഇഷ്ടവും കണക്കിലെടുക്കണം. അവരുടെ അഭിപ്രായങ്ങള്‍ക്കും വില കൊടുക്കണം.

ആദ്യം മാതാപിതാക്കള്‍ ഉറങ്ങുന്ന മുറിയില്‍ത്തന്നെ മറ്റൊരു കട്ടിലിലോ കിടക്കയിലോ കുട്ടിയെ തനിയെ കിടത്താം. ഇതു ശീലമായാല്‍ മറ്റൊരു മുറിയിലേക്ക് മാറ്റാം. മുറി അടച്ചിടാന്‍ കുട്ടിയെ ഒരിക്കലും അനുവദിക്കരുത്. കുട്ടിയുടെ മുറിയില്‍ ഒരു കാരണവശാലും ടിവി വക്കരുത്.