കുഞ്ഞുകരച്ചില്‍ എന്തിന്?

ആദ്യമായി മാതാപിതാക്കളാകുന്നവര്‍ക്ക് കുഞ്ഞൊന്നു കരഞ്ഞാല്‍ ആകെ പരിഭ്രമമായിരിക്കും. എന്തിനാണ് കുഞ്ഞു കരയുന്നതെന്നായിരിക്കും ഇവരുടെ സംശയവും. ഈ സംശയത്തിന്റെ പുറത്ത് തങ്ങളെക്കൊണ്ടാവുന്നതെല്ലാം ഇവര്‍ ചെയ്യും. എങ്കിലും കുഞ്ഞ് കരച്ചില്‍ നിര്‍ത്തിയെന്നു വരില്ല.

കുഞ്ഞ് കരയുന്നതിന് പല കാരണങ്ങളുമുണ്ടാകാം. സംസാരിക്കാത്ത കുഞ്ഞിന് തന്റെ ആശയവിനിമയത്തിനുള്ള ഏക വഴിയാണ് ഈ കരച്ചിലെന്നു തിരിച്ചറിയുക.

വിശക്കുമ്പോഴും കുഞ്ഞുങ്ങള്‍ കരയും. തങ്ങള്‍ക്കു വിശക്കുന്നെന്ന് അറിയിക്കാനുള്ള ഒരു വഴിയാണ് ഈ കരച്ചില്‍. വിശക്കുന്നതാണ് പ്രശ്‌നമെങ്കില്‍ കുഞ്ഞുങ്ങള്‍ വിശപ്പു മാറുന്നതോടെ കരച്ചില്‍ നിര്‍ത്തുകയും ചെയ്യും.

കുഞ്ഞിന് അസുഖം വരുമ്പോഴും കുഞ്ഞുങ്ങള്‍ കരയും. മുലയൂട്ടിയിട്ടും ഭക്ഷണം നല്‍കിയിട്ടും കുഞ്ഞുങ്ങള്‍ കരച്ചില്‍ നിര്‍ത്തിയില്ലെങ്കില്‍ ശാരീരിക അസ്വാസ്ഥ്യവും കാരണമാകാം. ചെവിവേദന, വയറുവേദന തുടങ്ങിയ അസ്വസ്ഥതതകള്‍ കുഞ്ഞുങ്ങള്‍ക്ക് പതിവാണ്.

ഡയപ്പര്‍ നനഞ്ഞാലും ചില കുഞ്ഞുങ്ങള്‍ കരയും. നനവ് കുഞ്ഞുങ്ങള്‍ക്ക് അസ്വസ്ഥതയുണ്ടാക്കുന്ന ഒന്നാണ്.

പാല്‍ കുടിച്ചു കഴിഞ്ഞാലും ചില കുഞ്ഞുങ്ങള്‍ കരയും. പാല്‍ കുഞ്ഞുങ്ങള്‍ക്ക് ഗ്യാസ് പ്രശ്‌നങ്ങളുണ്ടാക്കാറുണ്ട്. പാല്‍ കൊടുത്തു കഴിഞ്ഞാല്‍ കുഞ്ഞിന്റെ പുറത്തു തട്ടി ഗ്യാസ് കളയേണ്ടത് അത്യാവശ്യമാണ്.

ചിലപ്പോള്‍ മാതാപിതാക്കളുടെ ശ്രദ്ധ പിടിച്ചു പറ്റാനും കുഞ്ഞുങ്ങള്‍ കരയും. ഇത് കുഞ്ഞിനെ എടുത്താലോ ഓമനിച്ചാലോ മാറുകയും ചെയ്യും.

കുഞ്ഞാണെങ്കിലും കുറേ സമയം ഒരിടത്തു തന്നെ ഇരിക്കുന്നതും കിടക്കുന്നതുമെല്ലാം കുഞ്ഞിനേയും ബോറടിപ്പിക്കും. ഇതിന് കുഞ്ഞിനെ കളിപ്പിക്കുന്നതോ എടുത്തു കൊണ്ട് അല്‍പം നടക്കുന്നതോ ഒക്കെയായാരി്ക്കും പരിഹാരം.