കുഞ്ഞ് മാസം തികയാതെ ജനിച്ചാല്‍

മാസം തികയാതെ ജനിച്ച കുട്ടികള്‍ക്ക് അമിതശ്രദ്ധ തന്നെ വേണം. കാരണം പ്രതിരോധശേഷി കുറവായതു കൊണ്ട് അസുഖങ്ങള്‍ വരാനുള്ള സാധ്യത ഇത്തരം കുട്ടികള്‍ക്ക് കൂടുതലാണ്.

തൂക്കക്കുറവ് ഇത്തരം കുട്ടികള്‍ക്കുണ്ടാകുന്ന ഏറ്റവും വലിയ പ്രശ്‌നമാണ്. ഇതിനും കുഞ്ഞിന് പ്രതിരോധശേഷി ലഭിക്കാനുമുള്ള ഏറ്റവും നല്ല മാര്‍ഗം മുലയൂട്ടല്‍ തന്നെയാണ്. ചിലപ്പോള്‍ ഇത്തരം കുഞ്ഞുങ്ങള്‍ക്ക് പാല്‍ വലിച്ചു കുടിയ്ക്കാന്‍ സാധിച്ചെന്നു വരില്ല. ഇത്തരം സന്ദര്‍ഭങ്ങളില്‍ മുലപ്പാല്‍ ശേഖറണമാണ് ഏറ്റവും നല്ല മാര്‍ഗം. ഇത്തരം രീതികള്‍ക്ക് ഡോക്ടറുടെ അഭിപ്രായം കണക്കിലെടുക്കണമെന്നു മാത്രം.

വളര്‍ച്ചയെത്താത്ത കുട്ടികളെ പാകത്തിനുള്ള തൂക്കമാകുന്നതു വരെ കുളിപ്പിക്കരുതെന്ന് ഡോക്ടര്‍മാര്‍ പറയാറുണ്ട്. എന്നാല്‍ കുഞ്ഞുങ്ങളുടെ ദേഹത്ത് മൃദുവായി മസാജ് ചെയ്യാം. ഇതിന് എണ്ണയോ ക്രീമുകളോ വേണമെന്നില്ല. കുഞ്ഞിന്റെ ശരീരത്തിലെ രക്തപ്രവാഹം വര്‍ദ്ധിക്കാന്‍ മാത്രമല്ല, കുഞ്ഞിനെ ഉറക്കാന്‍ കൂടി പറ്റിയൊരു മാര്‍ഗമാണിത്.

കുഞ്ഞ് എപ്പോഴും മലര്‍ന്നു തന്നെയാണ് കിടക്കുന്നതെന്ന് ഉറപ്പു വരുത്തുക. കമഴ്ന്നു കിടക്കുന്നത് കുഞ്ഞുങ്ങള്‍ക്ക്, പ്രത്യേകിച്ചും മാസം തികയാതെ ജനിച്ച കുഞ്ഞുങ്ങള്‍ക്ക് പല ബുദ്ധിമുട്ടുകളും, ശ്വാസം മുട്ടലടക്കമുള്ള അവസ്ഥകള്‍ വരുത്താന്‍ സാധ്യത കൂടുതലാണ്.

ഇത്തരം കുഞ്ഞുങ്ങള്‍ക്കടുത്ത് അസുഖമുള്ളവര്‍ പോകാതിരിക്കുക. അതുപോലെ തണുപ്പില്‍ നിന്നും കുഞ്ഞുങ്ങള്‍ക്ക് പ്രത്യേക സംരക്ഷണം നല്‍കുകയും വേണം.

ഡോക്ടറുടെ നിര്‍ദേശം ഇത്തരം കുഞ്ഞുങ്ങളുടെ കാര്യത്തില്‍ പൂര്‍ണമായും പ്രാവര്‍ത്തികമാക്കുന്നതാണ് നല്ലത്. ഇടയ്ക്കിടെയുള്ള വൈദ്യപരിശോധനയും നല്ലതു തന്നെ.