കുഞ്ഞുഭാവങ്ങള്‍ ഫോട്ടോയില്‍ പകര്‍ത്തൂ

Updated: Friday, November 16, 2012, 6:06 [IST]

കുഞ്ഞുങ്ങളുടെ ചിത്രം കാണാന്‍ ഇഷ്ടമില്ലാത്തവരുണ്ടാകില്ല. മുതിര്‍ന്നു കഴിഞ്ഞാലും തങ്ങളുടെ ചെറുപ്പത്തിലെ ചിത്രങ്ങള്‍ കാണാനായി ആഗ്രഹിക്കാത്തവരുണ്ടാകുമില്ല.

ജീവിച്ചിരിക്കുന്ന ഓര്‍മകളാണ് ആല്‍ബങ്ങളെന്നും പറയാം. നമ്മുടെ കുഞ്ഞുങ്ങള്‍ വളര്‍ന്നു കഴിയുമ്പോള്‍ ഇവരുടെ ചെറുപ്പം മുതലുള്ള ചിത്രങ്ങള്‍ കാണുന്നത് ആര്‍ക്കും സന്തോഷം നല്‍കും.

ഒരു കുഞ്ഞ് പിറക്കുമ്പോള്‍ മുതല്‍ ചിത്രങ്ങള്‍ എടുത്തു സൂക്ഷിക്കാം. ഒരോ ഘട്ടത്തിലുമുള്ള കുഞ്ഞിന്റെ വളര്‍ച്ചയെ കാണിക്കാന്‍ ഈ ചിത്രങ്ങള്‍ സഹായിക്കും. കുഞ്ഞുങ്ങള്‍ വളര്‍ന്നു കഴിയുമ്പോള്‍ അവര്‍ക്ക് നല്‍കാവുന്ന നല്ലൊരു സമ്മാനം കൂടിയാണ് ഇത്തരം ആല്‍ബങ്ങള്‍.

പല ഘട്ടങ്ങളിലൂടെയാണ് ഒരു കുഞ്ഞു വളരുന്നത്. വളര്‍ച്ചയുടെ ഓരോ ഘട്ടങ്ങളും ഫോട്ടോയിലാക്കി സൂക്ഷിക്കാം. കുഞ്ഞ് ആദ്യമായി നടക്കുന്നതും ഇരിക്കുന്നതുമെല്ലാം കഴിയുമെങ്കില്‍ ഫോട്ടെയെടുത്തു സൂക്ഷിക്കാം. ഇവയുപയോഗിച്ച് ആല്‍ബമുണ്ടാക്കാം. വെറുതെയിരിക്കുമ്പോള്‍ താളുകള്‍ മറിച്ചാല്‍ സന്തോഷം തോന്നും.

കുഞ്ഞ് ജനിച്ചയുടനെയുള്ള ചിത്രങ്ങളെടുത്തു സൂക്ഷിക്കാം. അമ്മയും കുഞ്ഞും ഒരുമിച്ചുള്ള ചിത്രം. തീര്‍ച്ചയായും ആല്‍ബത്തില്‍ ഉണ്ടായിരി്‌ക്കേണ്ട ഒരു ചിത്രമാണിത്.

കുഞ്ഞുറങ്ങുമ്പോള്‍ ശ്രദ്ധിച്ചിട്ടുണ്ടോ, ഈ ലോകത്തെ മുഴുവന്‍ നിഷ്‌കളങ്കതയും ആ കുഞ്ഞു മുഖത്തു കാണാം. ഇത് ആല്‍ബത്തില്‍ സൂക്ഷിക്കാന്‍ പറ്റിയ ചിത്രം.

കുളിപ്പിക്കുമ്പോള്‍ കുഞ്ഞിന്റെ മുഖത്തെ ഭാവങ്ങള്‍ കാണാന്‍ രസമാണ്. ഇതും ഒരു സ്‌നാപ്പിലാക്കാം.

കുഞ്ഞിന്റെ കൈകാലിട്ടടിച്ചുള്ള കളികള്‍ കണ്ടിരിക്കാന്‍ ആര്‍ക്കും താല്‍പര്യം തോന്നു. ഇതും ക്യാമറയിലാക്കാം.തന്നോടു തന്നെ യുദ്ധം ചെയ്യുന്ന ഭാവത്തിലുള്ള ഈ ചിത്രം നിങ്ങള്‍ക്ക് എക്കാലവും ഓര്‍ക്കാനുള്ള ഒന്നു തന്നെയായിരിക്കും.