നവജാത ശിശുക്കളിലെ തൂക്കക്കുറവ്, കാരണങ്ങള്‍

സാധാരണ ഗതിയില്‍ 5-7 ശതമാനം വരെയാണ് കുട്ടികളുടെ തൂക്കം കുറയാറ്. ഇത് സാധാരണവുമാണ്. മാസം തികയാതെയുള്ള പ്രസവമാണെങ്കിലോ പ്രസവത്തോടനുബന്ധിച്ച് അമ്മയുടെ ശരീരത്തില്‍ കൂടുതല്‍ മരുന്നുകളോ ഗ്ലൂക്കോസോ കുത്തിവച്ചിട്ടുണ്ടെങ്കിലോ ഭാരം 10 ശതമാനം വരെ കുറയാം. ഇതില്‍ കൂടുതല്‍ തൂക്കക്കുറവുണ്ടാകുകയാണെങ്കില്‍ മുലപ്പാല്‍ വേണ്ടവിധം ലഭിക്കാത്തതോ എന്തെങ്കിലും അസുഖമോ കാരണമാകാം.

കുഞ്ഞിന്റെ ഭാരം ഒരുപക്ഷേ വാട്ടര്‍ വെയ്റ്റു കൊണ്ടുമാകാം. ഗര്‍ഭാവസ്ഥയില്‍ ഹോര്‍മോണ്‍ വ്യത്യാസങ്ങള്‍ കൊണ്ട് അമ്മയുടെ ശരീരത്തില്‍ വെള്ളം കൂടുതലാകും. പോരാത്തതിന് അംമ്‌നിയോട്ടിക് ഫഌയിഡിലാണ് കുട്ടി കിടക്കുന്നത്. ഇത് കുഞ്ഞിന്റെ ശരീരഭാരം കൂട്ടാന്‍ വഴി വയ്ക്കും. ഈ വാട്ടര്‍ വെയ്റ്റ് പുറത്തു വരുമ്പോള്‍ തനിയെ നഷ്ടപ്പെടും.

ജനിച്ച് ആദ്യദിവസം തന്നെ കുഞ്ഞിന് ആവശ്യമുള്ള മുലപ്പാല്‍ ലഭിച്ചെന്നു വരില്ല. ആദ്യമായി കുഞ്ഞിന് ലഭിക്കുന്നത് കൊളസ്ട്രമാണ്. പാലിന് കുറവു വരുമ്പോള്‍ ഉപയോഗിക്കാനായി കൊളസ്ട്രത്തിലെ കൊഴുപ്പ് കുഞ്ഞിന്റെ ശരീരത്തില്‍ ശേഖരിച്ചു വയ്ക്കുന്നു. ഈ കൊഴുപ്പു നഷ്ടപ്പെടുമ്പോള്‍ കുഞ്ഞിന്റെ ശരീരഭാരവും സ്വാഭാവികമായി കുറയും.

കുഞ്ഞ് ശരിയായ രീതിയില്‍ മുലപ്പാല്‍ കുടിയ്ക്കാത്തോ മുലപ്പാലിന്റെ കുറവോ കുഞ്ഞിന്റെ ശരീരഭാരം കുറയുന്നതിന് ഇട വരുത്തും. ആദ്യമായി മുലപ്പാല്‍ കുടിച്ചു തുടങ്ങുമ്പോള്‍ ശരിയായി വലിച്ചു കുടിയ്ക്കാന്‍ അറിയാത്തതിനാല്‍ പാലിനൊപ്പം കുഞ്ഞിന്റെ ഉള്ളില്‍ വായുവും കയറും. ഇത് വിശപ്പു കുറയാനും പാല്‍ കുറവു കുടിയ്ക്കാനും ഇട വരുത്തുന്നു. ആവശ്യത്തിന് ഭക്ഷണം ലഭിക്കാത്തത് കുഞ്ഞിന്റെ തൂക്കം കുറയാന്‍ ഇട വരുത്തും.

ആരോഗ്യപ്രശ്‌നങ്ങളില്ലാത്ത കുഞ്ഞുങ്ങളാണെങ്കില്‍ ശരിയായി മുലപ്പാല്‍ കുടിച്ചു തുടങ്ങിയാല്‍ തൂക്കം സാധാരണ നിലയിലാകും.