മഞ്ഞുകാലത്ത് കുഞ്ഞിന് വസ്ത്രങ്ങള്‍ തെരഞ്ഞെടുക്കൂ

Baby

oi-Saritha

By Veena

Published: Tuesday, November 8, 2011, 14:09 [IST]

മഞ്ഞുകാലത്ത് കുഞ്ഞുവാവയ്ക്ക് ചൂടു പകരുവാനാകുന്ന വസ്ത്രങ്ങള്‍ വേണം. കുഞ്ഞുപാദങ്ങളും കൈകളുമെല്ലാം മൂടിയിരിക്കണം. ധാരാളം അസുഖങ്ങള്‍ വരുന്ന കാലാവസ്ഥയായതു കൊണ്ട് ചൂടിനൊപ്പം രോഗത്തില്‍ നിന്ന് രക്ഷിക്കുകയെന്നതും പ്രധാനം തന്നെ.

കുഞ്ഞിന് ഉടുപ്പെടുക്കുമ്പോള്‍ ഭംഗിയേക്കാളേറെ സൗകര്യമാണ് നോക്കേണ്ടത്. തണുപ്പു മാറ്റുന്ന, അതേ സമയം കുഞ്ഞിന് അലോസരമുണ്ടാക്കാത്ത മൃദുവായ വസ്ത്രങ്ങള്‍ വേണം തെരഞ്ഞെടുക്കുവാന്‍.

മഞ്ഞുകാലമാണ് തണുപ്പുണ്ടെന്ന കരുതി കൂടുതല്‍ വസ്ത്രങ്ങള്‍ കുഞ്ഞിനെ ഇടുവിക്കരുത്. ഇത് കുഞ്ഞിന് അസ്വസ്ഥതയുണ്ടാക്കും. അയഞ്ഞ വസ്ത്രങ്ങള്‍ തെരഞ്ഞെടുക്കുക. അധികം ഹുക്കുകളും ബട്ടനുകളുമില്ലാത്ത വസ്ത്രങ്ങളാണ് നല്ലത്. ഇടുവിക്കുവാനും ഊരിയെടുക്കാനും എളുപ്പമായിരിക്കും. കൈകാല്‍ മൂടുന്ന വിധത്തിലുള്ള വസ്ത്രങ്ങളായിരിക്കും മഞ്ഞുകാലത്ത് നല്ലത്.

മഞ്ഞുകാലത്ത് കമ്പിളി കൊണ്ടുണ്ടാക്കിയ വസ്ത്രങ്ങളോ സെറ്റ്വറോ ഉപയോഗിക്കാം. എന്നാല്‍ ഇത് നേരിട്ട് കുഞ്ഞിനെ ഇടുവിക്കരുത്. ആദ്യം കോട്ടനുടുപ്പ് ഇടുവിച്ച ശേഷം അതിന് മുകളിലായി കമ്പിളിയുടുപ്പ് ഇടുവിക്കാം. അല്ലെങ്കില്‍ കുഞ്ഞിന്റെ ചര്‍മത്തിന് അലര്‍ജിയുണ്ടാകാന്‍ സാധ്യതയുണ്ട്.

കുഞ്ഞിനുള്ള വസ്ത്രങ്ങള്‍് ഇളംനിറത്തിലാകുന്നതാണ് നല്ലത്. അഴുക്കായാല്‍ പെട്ടെന്ന് തിരിച്ചറിയുവാനും മാറ്റുവാനും സാധിയ്ക്കും.

നല്ല മഞ്ഞും തണുപ്പുമുള്ളപ്പോള്‍ ചെറിയ കഷണം പഞ്ഞി കുഞ്ഞിന്റെ ചെവിയില്‍ വയ്ക്കുന്നത് നന്നായിരിക്കും. അല്ലെങ്കില്‍ ചെവി മൂടുന്ന വിധത്തിലുള്ള സ്‌കാര്‍ഫോ തൊപ്പിയോ ഉപയോഗിക്കാം. ഇത് ചെവിയിലൂടെ തണുപ്പു കയറി അസുഖങ്ങള്‍ വരുത്താതിരിക്കാന്‍ നല്ലതാണ്.

കുഞ്ഞ് ഉറങ്ങുമ്പോള്‍ കട്ടി കൂടിയ പുതപ്പ് പുതപ്പിച്ച് അസ്വസ്ഥതയുണ്ടാക്കാതിരിക്കുക. വസ്ത്രത്തിന് പുറമെ കുഞ്ഞിന്റെ കയ്യിലും കാലിലും സോക്‌സ് ഇടുവിക്കാം.

കുഞ്ഞിന് അസ്വസ്ഥതയുണ്ടാവുകയാണെങ്കില്‍ അതിന് കാരണമായ വസ്ത്രമോ പുതപ്പോ മാറ്റാന്‍ മടിക്കരുത്.