കുഞ്ഞിനു നല്‍കാം സ്വാദിഷ്ടമായ ഭക്ഷണം

Baby

oi-Saritha

By Veena

Published: Tuesday, October 11, 2011, 13:48 [IST]

കുഞ്ഞുങ്ങള്‍ ഭക്ഷണം കഴിക്കാത്തതിനെ പറ്റി മിക്കവാറും അമ്മമാര്‍ പരാതിപ്പെടാറുണ്ട്. കുഞ്ഞ് ഒന്നും കഴിക്കുന്നില്ലെന്നും പിന്നെ എങ്ങിനെ വളരുമെന്നുമൊക്കെയാകും അവരുടെ ഉത്കണ്ഠകള്‍. എന്നാല്‍ തങ്ങള്‍ നല്‍കുന്ന ഭക്ഷണം എത്രത്തോളം സ്വാദിഷ്ടമാണെന്നും കുഞ്ഞുങ്ങളെന്താണ് ഇത് കഴിക്കാത്തതെന്നും അമ്മമാര്‍ ചിന്തിക്കാറില്ല. ഉണ്ടാക്കാന്‍ എളുപ്പമുളളതും കുഞ്ഞിന്റെ വയറിന് ദോഷം വരാത്തതുമായ ഭക്ഷണങ്ങളാണ് സാധാരണ നല്‍കാറ്. മിക്കവാറും ദിവസവും നല്‍കുന്നത് ഒരേ തരം ഭക്ഷണമായിരിക്കും. കുഞ്ഞാണെങ്കിലും മുതിര്‍ന്നവരെപ്പോലെ സ്വാദു തിരിച്ചറിയാനുളള കഴിവ് അവര്‍ക്കുമുണ്ട്.

കുഞ്ഞുങ്ങള്‍ക്കുള്ള ഭക്ഷണത്തില്‍ ഒരുപാടു പരീക്ഷണങ്ങളൊന്നും നടത്താന്‍ സാധ്യമല്ല. എരിവും മസാലകളും എണ്ണമയമുള്ളതുമായ ഭക്ഷണങ്ങള്‍ അവര്‍ക്ക് നല്‍കാനും സാധിക്കില്ല. എങ്കിലും വീട്ടില്‍ കുഞ്ഞുങ്ങള്‍ക്കു താല്‍പര്യമുണ്ടാക്കുന്ന ഭക്ഷണം തയ്യാറാക്കാം.

മുട്ട കുഞ്ഞിനുള്ള സമീകൃതാഹാരമാണ്. മുട്ട സാലഡ് കുഞ്ഞിനാവശ്യമായ പ്രോട്ടീനുകളും കാര്‍ബോഹൈഡ്രേറ്റുകളും അടങ്ങിയതുമാണ്. മുട്ടയും ഉരുളക്കിഴങ്ങും പുഴുങ്ങി ഒരുമിച്ചു ചേര്‍ത്തിളക്ക് അല്‍പം ഉപ്പും ഒരു തരി കുരുമുളകുപൊടിയും മയോണീസോ അല്ലെങ്കില്‍ വെണ്ണയോ ചേര്‍ത്ത് കുഞ്ഞിനു നല്‍കാം. കുഞ്ഞിനു മാത്രമല്ലാ, മുതിര്‍ന്നവര്‍ക്കും കഴിക്കാവുന്ന ഒന്നാന്തരം പോഷകാഹാരമാണിത്. അല്‍പം കട്ടിയുള്ളതു കൊണ്ട് കുഞ്ഞിനിത് നല്‍കാനും എളുപ്പമാണ്.

ധാന്യങ്ങളും പരിപ്പുവര്‍ഗങ്ങളും കുഞ്ഞിന്റെ വളര്‍ച്ചക്ക് അത്യന്താപേക്ഷിതമാണ്. ഇവ തനിയെ നല്‍കിയാല്‍ ഒരുപക്ഷേ കുഞ്ഞ് കഴിക്കാന്‍ മടിക്കും. ചെറുപയര്‍ പരിപ്പോ സാധാരണ പരിപ്പോ വേവിച്ച വെളളം ചോറിന്റെ കൂടെച്ചേര്‍ത്ത് നല്ലപോലെ കൂട്ടിയിളക്കി കുഞ്ഞിനു നല്‍കാം. ധാന്യത്തിന്റെയും പരിപ്പിന്റേയും ഗുണം കുഞ്ഞിനു ലഭിക്കും. വേണമെങ്കില്‍ ഇതിലല്‍പം ഉപ്പും നെയ്യും ചേര്‍ക്കാം. ഈ ഭക്ഷണം ദഹിക്കാനും എളുപ്പമാണ്.

ചെറിയ കുഞ്ഞാണെങ്കില്‍ പച്ചക്കറികള്‍ വേവിച്ചത് മുഴുവനോടെ കഴിക്കാന്‍ ബുദ്ധിമുട്ടാണ്. കടിക്കാന്‍ പല്ലില്ലാത്തതു തന്നെ പ്രധാന കാരണം. അരിയും പരിപ്പും കൂടെ പച്ചക്കറികളും വേവിച്ചുടച്ച് വെണ്ണ ചേര്‍ത്ത് കുഞ്ഞിനു കൊടുക്കാം. തക്കാളി, ബീന്‍സ്, കാരറ്റ്, ബീറ്റ്‌റൂട്ട്, ഗ്രീന്‍പീസ് തുടങ്ങിയ പച്ചക്കറികള്‍ ഇപ്രകാരം വേവിച്ചുനല്‍കാം.ദാല്‍കിച്ചരി എന്നാണ് ഈ ഭക്ഷണത്തിനു പറയുക. വ്യത്യസ്തമായ സ്വാദിനൊപ്പം കുഞ്ഞിനു നല്‍കാവുന്ന ഉത്തമാഹാരമാണിത്.