കുഞ്ഞുടുപ്പും കുഞ്ഞുകാര്യങ്ങളും

സംസാരിക്കാന്‍ തുടങ്ങാത്ത കുഞ്ഞിന്റെ ആശയവിനിമയത്തിനുള്ള മാര്‍ഗമാണ് ചിരിയും കരച്ചിലും.കുഞ്ഞുങ്ങള്‍ കരയുന്നതിന് പല കാരണങ്ങളുണ്ടായിരിക്കും. വിശപ്പോ മറ്റെന്തെങ്കിലും അസ്വസ്ഥതകളോ അസുഖങ്ങളോ കുഞ്ഞുങ്ങളുടെ കരച്ചിലിനു
പുറകിലുണ്ടായിരിക്കും.

ധരിച്ചിരിക്കുന്ന വേഷം സുഖപ്രദമല്ലെങ്കിലും കുഞ്ഞിന് അസ്വസ്ഥകളുണ്ടാകും. അതുകൊണ്ടുതന്നെ കുഞ്ഞുടുപ്പുകള്‍ തെരഞ്ഞെടുക്കുമ്പോള്‍ ഭംഗിയേക്കാളേറെ പല കാര്യങ്ങളും ശ്രദ്ധിക്കാനുണ്ട്
കുഞ്ഞുങ്ങളുടെ ചര്‍മം വളരെ മൃദുലമാണ്. കോട്ടണ്‍ വസ്ത്രങ്ങളായിരിക്കും കുഞ്ഞുങ്ങള്‍ക്കു ധരിക്കാന്‍ ഏറെ സുഖം. സിന്തറ്റിക് വസ്ത്രങ്ങള്‍ അലര്‍ജിക്ക് കാരണമായേക്കാം.

ബട്ടനുകളുള്ള ഉടുപ്പാണ് കുഞ്ഞുങ്ങള്‍ക്ക് നല്ലത്. ഉടുപ്പ് എളുപ്പം മാറ്റാന്‍ ഇത് നല്ലതാണ്. കുഞ്ഞുടുപ്പുകളില്‍ ഇലാസ്റ്റിക് ഇല്ലാതിരിക്കുന്നതാണ് നല്ലത്. അസ്വസ്ഥതയുണ്ടാക്കുന്ന തരം ഞൊറികളും കുഞ്ഞുടുപ്പില്‍ ഇല്ലാതിരിക്കുകയാണ് നല്ലത്.

പുതിയ ഉടുപ്പ് ധരിപ്പിക്കുന്നതിന് മുന്‍പ് കഴുകുന്നത് നല്ലതാണ്. കുഞ്ഞുടുപ്പ് ചൂടുവെള്ളത്തില്‍ കഴുകാന്‍ ശ്രദ്ധിക്കണം. നല്ല വായുസഞ്ചാരവും വെയിലുമുള്ളിടത്തിട്ട് ഉണക്കിയെടുക്കണം. ഇവ ഇസ്തിരിയിടുകയാണെങ്കില്‍ രോഗാണുക്കള്‍ പൂര്‍ണമായും നശിക്കും.

നല്ല ചൂടുന്ന കാലാവസ്ഥയിലാണ് നിങ്ങള്‍ ജീവിക്കുന്നതെങ്കില്‍ കട്ടികുറഞ്ഞ കയ്യില്ലാത്ത ഉടുപ്പുകള്‍ ഇടുവിക്കുന്നതായിരിക്കും നല്ലത്. ഇത്തരം കാലാവസ്ഥയില്‍ കുഞ്ഞിനെ പുതപ്പിക്കേണ്ട ആവശ്യവുമില്ല. ചൂട് കുഞ്ഞുങ്ങള്‍ക്കും അസ്വസ്ഥതയു ണ്ടാക്കും. തണുപ്പാണെങ്കില്‍ ദേഹം മുഴുവനും മൂടുന്ന ഉടുപ്പിടുവിക്കാം. ചെവി മൂടുന്ന തൊപ്പിയിടുവിക്കുന്നതും കുഞ്ഞുങ്ങള്‍ക്ക് കാററടിച്ചുണ്ടാകുന്ന അസ്വസ്ഥകള്‍ തടയാന്‍ നല്ലതാണ്.

കുഞ്ഞുങ്ങള്‍ക്ക് നാപ്പികള്‍ ഒഴിവാക്കാനാവാത്തവാണ്. കോട്ടന്‍ തുണി കൊണ്ടുള്ള നാപ്പികളാണ് കുട്ടികള്‍ക്ക് ഏറ്റവും അനുയോജ്യം. വീട്ടിനുള്ളില്‍ കുഞ്ഞുങ്ങളെ ഡയപ്പറിനു പകരം തുണി കൊണ്ടുള്ള നാപ്പികള്‍ ധരിപ്പിക്കാം. അഴുക്കായാല്‍ ഉടന്‍ ഇവ മാറ്റുകയും ചൂടുവെള്ളത്തില്‍ കഴുകിയുണക്കുകയും വേണം.