സ്തനപരിരക്ഷ പ്രധാനം

Pregnancy Parenting

oi-Saritha

By Veena

Published: Saturday, December 24, 2011, 13:14 [IST]

സ്ത്രീകളില്‍ സ്തനാരോഗ്യ പ്രശ്‌നങ്ങള്‍ അസാധാരണമല്ല. എന്നാല്‍ പൊതുവെ സ്താര്‍ബുദം എന്നൊരു വാക്കില്‍ സ്തനപ്രശ്‌നങ്ങള്‍ അവസാനിപ്പിക്കുകയാണ് പതിവ്. എന്നാല്‍ ഇതല്ലാതെയും പ്രശ്‌നങ്ങളുണ്ട്.

സ്തനങ്ങളിലെ മുഴകള്‍ സ്താനാര്‍ബുദ ലക്ഷണമാണെന്നാണ് പറയാറ്. എന്നാല്‍ ഇത് ക്യാന്‍സര്‍ തന്നെയാവണമെന്നില്ല. ഹോര്‍മോണ്‍ വ്യതിയാനം കൊണ്ടും സ്തനങ്ങളില്‍ മുഴ കാണാം. ഇവ സാധാരണ ശസ്ത്രക്രിയയിലൂടെ മാറ്റുകയാണ് പതിവ്.

സ്തനങ്ങളില്‍ നിന്ന് പാല്‍ വരിക, രക്തം വരിക തുടങ്ങിയ പ്രശ്‌നങ്ങള്‍ ചില സ്ത്രീകളില്‍ കണ്ടുവരാറുണ്ട്. പ്രോലാക്ടിന്‍ എന്ന ഹോര്‍മോണിന്റെ അളവ് കൂടുമ്പോഴാണ് പാല്‍ വരുന്നത്. ഇതിന് ചികിത്സ ആവശ്യമാണ്. സ്തനത്തില്‍ നിന്നും രക്തം വരുന്നത് ഒരുപക്ഷേ ക്യാന്‍സര്‍ ലക്ഷണമാകാന്‍ വഴിയുണ്ട്. രക്തം വരുന്നതിനൊപ്പം മുഴകള്‍ കൂടിയുണ്ടെങ്കില്‍ ഉടന്‍ തന്നെ വൈദ്യസഹായം തേടുകയാണ് നല്ലത്.

ആര്‍ത്തവസമയത്തു മാത്രം ചിലരുടെ മാറിടത്തില്‍ മുഴകള്‍ കണ്ടുവരാറുണ്ട്. ഇത് ഫൈബ്രോസിസ്റ്റിക് എന്നാണ് അറിയപ്പെടുന്നത്. ഇത് തനിയെ മാറും.

കുഞ്ഞിന് പാലൂട്ടുന്ന നേരത്ത് ചില സ്ത്രീകളുടെ മുലക്കണ്ണു വിണ്ടു കീറി വേദനിക്കാന്‍ ഇടയുണ്ട്. ഗര്‍ഭിണിയായിരിക്കെ തന്നെ എണ്ണ പുരട്ടി മുലക്കണ്ണു പുറത്തേക്കു വലിക്കുന്നത് ഈ പ്രശ്‌നം ഒരു പരിധി വരെ പരിഹരിക്കും. കുഞ്ഞ് പാല്‍ കുടിക്കുമ്പോള്‍ മുലക്കണ്ണടക്കമുള്ള ഭാഗം കുഞ്ഞിന്റെ വായില്‍ വരാന്‍ ശ്രദ്ധിക്കണം.