ക്രമരഹിത ആര്‍ത്തവം, കാരണങ്ങള്‍

സാധാരണ ഗതിയില്‍ 28 ദിവസമാണ് ഒരു ആര്‍ത്തവചക്രം. ചിലരില്‍ ഇത് 35 വരെയാകാം. രണ്ടു മുതല്‍ ഏഴു ദിവസം വരെ രക്തസ്രാവവുമുണ്ടാകാം. 60-100 വരെയാണ് നഷ്ടപ്പെടുന്ന രക്തത്തിന്റെ ഏകദേശ അളവ്. ഇവയില്‍ നിന്നും കാര്യമായ വ്യത്യാസങ്ങളുണ്ടെങ്കില്‍ അത് ക്രമം തെറ്റിയ ആര്‍ത്തവത്തിന്റെ ഗണത്തില്‍ പെടുത്താം.

ക്രമരഹിതമായ ആര്‍ത്തവത്തിന്റെ ഒരു കാരണം ഗര്‍ഭധാരണം നടക്കുന്നതാണ്. ഗര്‍ഭം ധരിച്ചാല്‍ ആര്‍ത്തവം ഉണ്ടാകില്ല. ഇങ്ങനെ വരുമ്പോള്‍ പ്രഗനന്‍സി ടെസ്റ്റ് നടത്തേണ്ടതാണ്. ചിലരില്‍ മാസമുറ തെറ്റി കുറച്ചു ദിവസങ്ങള്‍ക്ക് ശേഷം ബ്ലീഡിംഗ് ഉണ്ടാകും. യൂട്രസിന് പുറത്ത് ഗര്‍ഭധാരണം നടന്നാലും ഇത്തരത്തില്‍ ക്രമരഹിതമായ ആര്‍ത്തവം ഉണ്ടാകാം.

പ്രസവശേഷവും ക്രമരഹിതമായ ആര്‍ത്തവം സാധാരണയാണ്. കുഞ്ഞിന് മുലയൂട്ടുന്ന സമയത്ത് സാധാരണഗതിയില്‍ ആര്‍ത്തവം ഉണ്ടാകില്ല. എന്നാല്‍ ഈ സമയത്ത് ഗര്‍ഭധാരണ സാധ്യതയുണ്ട്.

ആര്‍ത്തവവിരാമം അഥവാ മെനോപോസ് സമയത്തും ക്രമരഹിതമായ ആര്‍ത്തവം ഉണ്ടാകാം. ചിലരില്‍ കൂടുതല്‍ രക്തസ്രാവം ഉണ്ടാകുകയും മറ്റു ചിലരില്‍ രക്തത്തിന്റെ അളവ് കുറയുകയും ചെയ്യാം.

ചില ഗര്‍ഭനിരോധന മാര്‍ഗമങ്ങളും ആര്‍ത്തവക്രമക്കേടുകള്‍ ഉണ്ടാക്കുന്നുണ്ട്. കോണ്‍ട്രാസെപ്റ്റീവ് പില്‍സ്, കോപ്പര്‍ ടി പോലുള്ള ഇന്‍ട്രാ യൂട്രൈന്‍ ഡിവൈസസ് എന്നിവയും ആര്‍ത്തവക്രമക്കേടിന് വഴിയൊരുക്കുന്നു. ആര്‍ത്തവസമയത്തെ അമിതരക്തസ്രാവത്തിന് ഇവ ചിലപ്പോള്‍ ഇടയാക്കുന്നുണ്ട്.

അമിതവണ്ണവും പെട്ടെന്ന് മെലിയുന്നതും മാസമുറ സമയത്തെ പ്രശ്‌നങ്ങള്‍ക്ക് കാരണമാകും. പോളിസിസ്റ്റിക് ഓവറി,തൈറോയ്ഡ് പ്രശ്‌നങ്ങള്‍, എന്നിവ ചില സ്ത്രീകളില്‍ അമിതവണ്ണം വരുത്തുന്നുണ്ട്. ഇതും ആര്‍ത്തവക്രമക്കേടുകള്‍ ഉണ്ടാക്കും. ക്യാന്‍സര്‍ പോലുള്ള രോഗങ്ങളും ആര്‍ത്തവക്രമക്കേടുകള്‍ ഉണ്ടാക്കും. അതുകൊണ്ടു തന്നെ ഈ പ്രശ്‌നം നിസാരമായി തള്ളിക്കളയരുത്.