ഭക്ഷണം കഴിക്കുമ്പോള്‍ ഇരിക്കാനുള്ള ശരിയായ ദിശ, വാസ്തുശാസ്ത്രം പറയുന്നത് ഇത്‌

നമ്മുടെ ജീവിതത്തെ ആഴത്തില്‍ സ്വാധീനിക്കുമെന്ന് പറയപ്പെടുന്ന പുരാതന ശാസ്ത്രമാണ് വാസ്തു ശാസ്ത്രം. ഇത് ജ്യോതിഷം, ശാസ്ത്രം, കല, ജ്യോതിശാസ്ത്രം എന്നിവയുമായി ഏകീകരണമുള്ള ഒന്നാണ്. വാസ്തു ശാസ്ത്ര ഗ്രന്ഥങ്ങളില്‍, ആരോഗ്യവും വാസ്തുവും അല്ലെങ്കില്‍ ദിശകളും തമ്മില്‍ പരസ്പരം ബന്ധപ്പെട്ടിരിക്കുന്നുവെന്ന് കൃത്യമായി പരാമര്‍ശിച്ചിട്ടുണ്ട്. ഒരു വ്യക്തി താമസിക്കുന്ന വീട് അതിന്റേതായ സ്പന്ദനവും ഊര്‍ജ്ജവും ഉള്‍ക്കൊള്ളുന്ന ഒന്നാണ്. വീടിന്റെ ഓരോ മൂലയും ശരീരത്തിന്റെ ഒരു പ്രത്യേക അവയവത്തെ നിയന്ത്രിക്കുന്ന തരത്തില്‍ ബന്ധമുണ്ട്. അത് അസന്തുലിതാവസ്ഥയുണ്ടെങ്കില്‍, ശരീരാവയവത്തെ അത് ബാധിക്കും.

ഒരു വീടിന്റെ എല്ലാ ദിശകളും പ്രകൃതിയുടെ അഞ്ച് ഘടകങ്ങളായ വായു, ജലം, അഗ്നി, ഭൂമി, ആകാശം എന്നിവയാല്‍ നിയന്ത്രിക്കപ്പെടുന്നു. വാസ്തു പ്രകാരം, ഭക്ഷണം കഴിക്കുമ്പോള്‍ ഒരാള്‍ ഇരിക്കുന്ന ദിശ അയാളുടെ ആരോഗ്യത്തെയും ശരീരത്തെയും അനുകൂലമായും പ്രതികൂലമായും ബാധിക്കുമെന്ന് പറയുന്നു. സന്തോഷകരവും ആരോഗ്യകരവുമായ ജീവിതം നയിക്കാന്‍ ഒരാള്‍ ഭക്ഷണം കഴിക്കുമ്പോള്‍ അഭിമുഖീകരിക്കേണ്ട കൃത്യമായ ദിശ ഏതെന്ന് അറിയാന്‍ ലേഖനം വായിക്കൂ.

ദിശകളുടെ പ്രാധാന്യം

വാസ്തു ശാസ്ത്രമനുസരിച്ച്, ഭക്ഷണം കഴിക്കുമ്പോള്‍ ഇരിക്കുന്ന ദിശ ഒരാളുടെ ആരോഗ്യത്തിലും ശരീരത്തിലും നല്ലതോ ചീത്തയോ ആയ ഫലങ്ങള്‍ നല്‍കുന്നു. നിങ്ങളുടെ ആരോഗ്യത്തെക്കുറിച്ച് നിങ്ങള്‍ക്ക് ആശങ്കയുണ്ടെങ്കില്‍, ഭക്ഷണം കഴിക്കുമ്പോള്‍ ദിശകള്‍ ഉണ്ടാക്കുന്ന ആരോഗ്യ അപകടങ്ങളെക്കുറിച്ച് അറിഞ്ഞിരിക്കേണ്ടതാണ്.

കിഴക്ക് ദിശ

വാസ്തു ശാസ്ത്ര പ്രകാരം, കിഴക്കോട്ട് അഭിമുഖമായി ഇരുന്ന് ഭക്ഷണം കഴിക്കുമ്പോള്‍ നിങ്ങളുടെ തലച്ചോറിന് ഊര്‍ജ്ജം ലഭിക്കുകയും ദഹനം മെച്ചപ്പെടുകയും ചെയ്യുന്നു. നമുക്കെല്ലാവര്‍ക്കും അറിയാവുന്നതുപോലെ, ദഹനമാണ് ശരീരത്തിന്റെ എല്ലാ പ്രശ്‌നങ്ങള്‍ക്കും മൂലകാരണം. അതിനാല്‍ എപ്പോഴും ഈ ദിശയില്‍ ഇരുന്നു വേണം ഭക്ഷണം കഴിക്കാന്‍.

ദഹനവ്യവസ്ഥ ദുര്‍ബലമായവര്‍ക്ക് കിഴക്ക് ദിശയാണ് ഏറ്റവും അനുയോജ്യം. ആയുര്‍വേദ ഗ്രന്ഥങ്ങളില്‍ കിഴക്കോട്ട് അഭിമുഖമായി ഇരുന്ന് ഭക്ഷണം കഴിക്കാന്‍ ഉപദേശിച്ചിട്ടുണ്ട്. ഇത് ദീര്‍ഘായുസ്സ് നല്‍കുന്നു. ഭക്ഷണം കഴിക്കുമ്പോള്‍ കിഴക്കോട്ട് അഭിമുഖീകരിക്കുന്നത് രോഗവും മാനസിക സമ്മര്‍ദ്ദവും അകറ്റുന്നു. ഭക്ഷണത്തിന്റെ ശരിയായ ദഹനത്തിനും ഇത് സഹായിക്കുന്നു.

പടിഞ്ഞാറ് ദിശ

ലാഭത്തിന്റെ ദിശയായി കണക്കാക്കുന്നതിനാല്‍ ഭക്ഷണം കഴിക്കുന്നതിനും ഇത് ഒരു നല്ല ദിശയാണ്. നിങ്ങള്‍ പടിഞ്ഞാറോട്ട് അഭിമുഖമായി ഇരിക്കുമ്പോള്‍, അത് നിങ്ങളുടെ മനസ്സിനെ ചലിപ്പിക്കുന്നു. വാസ്തു ശാസ്ത്രം അനുസരിച്ച്, ഈ ദിശ ബിസിനസ്സ്, തൊഴില്‍ അല്ലെങ്കില്‍ എഴുത്ത്, ഗവേഷണം, വിദ്യാഭ്യാസം എന്നീ മേഖലകളിലെ പ്രൊഫഷണലുകള്‍ക്ക് നല്ലതായി കണക്കാക്കപ്പെടുന്നു. പടിഞ്ഞാറ് ദിശയിലേക്ക് നോക്കി ഭക്ഷണം കഴിക്കുമ്പോള്‍ അത് നിങ്ങളുടെ ലാഭ സാധ്യത വര്‍ദ്ധിപ്പിക്കുമെന്ന് വാസ്തുശാസ്ത്രം പറയുന്നു. കച്ചവടം ചെയ്യുന്നവരും ജോലി ചെയ്യുന്നവരും പടിഞ്ഞാറ് ദിശയിലേക്ക് നോക്കി ഭക്ഷണം കഴിക്കണം.

വടക്ക് ദിശ

അറിവും പണവും അന്വേഷിക്കുന്നവര്‍ക്ക് ഈ ദിശ അനുയോജ്യമാണ്. നിങ്ങള്‍ക്ക് പണവും അറിവും ആത്മീയ ശക്തിയും ലഭിക്കണമെങ്കില്‍ വടക്കോട്ട് തിരിഞ്ഞ് ഭക്ഷണം കഴിക്കുക. വിദ്യാര്‍ത്ഥികള്‍ക്കും മത്സര പരീക്ഷകള്‍ക്ക് തയ്യാറെടുക്കുന്നവര്‍ക്കും ഭക്ഷണം കഴിക്കാന്‍ വടക്ക് ദിശ അനുയോജ്യമാണ്. കരിയറിന്റെ പ്രാരംഭ ഘട്ടത്തിലുള്ളവര്‍ക്ക് ഭക്ഷണം കഴിക്കാനും ഈ ദിശ നിര്‍ദ്ദേശിക്കപ്പെടുന്നു.

തെക്ക് ദിശ

ഭക്ഷണം കഴിക്കാന്‍ ഇതാണ് ഏറ്റവും മോശമായ ദിശ. മരിച്ചവരുടെ ദിശയാണ് തെക്ക് ദിശ. അതിനാല്‍ ഈ ദിശയില്‍ ഭക്ഷണം കഴിക്കുന്നത് ഒഴിവാക്കണമെന്ന് വാസ്തു ശാസ്ത്രം നിര്‍ദ്ദേശിക്കുന്നു. ഇത് യമരാജന്റെ ദിശയാണ്, അതിനാല്‍ ഇത് ഒഴിവാക്കണമെന്ന് വാസ്തു പറയുന്നു. പ്രത്യേകിച്ചും മാതാപിതാക്കള്‍ ജീവിച്ചിരിപ്പുണ്ടെങ്കില്‍, ഈ ദിശയില്‍ ഇരുന്നുകൊണ്ട് നിങ്ങള്‍ ഒരിക്കലും ഭക്ഷണം കഴിക്കരുത്.

ഡൈനിംഗ് റൂമിന്റെ ശരിയായ ദിശ

വാസ്തു ശാസ്ത്ര പ്രകാരം ഊണുമുറി എപ്പോഴും വീടിന്റെ പടിഞ്ഞാറ് ദിശയിലായിരിക്കണം. ഈ ദിശ ശുഭകരവും ലാഭകരവുമായി കണക്കാക്കപ്പെടുന്നു, ആളുകള്‍ ഈ ദിശയില്‍ ഭക്ഷണം കഴിക്കുമ്പോള്‍ അത് നല്ല ആരോഗ്യം വളര്‍ത്തുന്നു. ഭക്ഷണത്തിനും മറ്റ് വിലയേറിയ വസ്തുക്കള്‍ക്കും നിങ്ങള്‍ക്ക് ഒരു കുറവും ഉണ്ടാകില്ല.