75-ാമത് റിപ്പബ്ലിക് ദിനം; ഭരണഘടന അംഗീകരിച്ച സുപ്രധാന ദിനം, നിങ്ങള്‍ അറിഞ്ഞിരിക്കേണ്ട കാര്യങ്ങള്‍

ജനുവരി 26-ന് ഇന്ത്യ 75-ാമത് റിപ്പബ്ലിക് ദിനം ആഘോഷിക്കുന്നു. 1950-ല്‍ രാഷ്ട്രം ഔപചാരികമായി ഭരണഘടന അംഗീകരിച്ച സുപ്രധാന നിമിഷത്തെയാണ് ഈ ദിവസം അടയാളപ്പെടുത്തുന്നത്. ഈ ചരിത്ര മുഹൂര്‍ത്തം വളരെ ആവേശത്തോടെയും ദേശസ്‌നേഹത്തോടെയുമാണ് വര്‍ഷാവര്‍ഷം രാജ്യമെമ്പാടും കൊണ്ടാടുന്നത്. ന്യൂഡല്‍ഹിയിലെ രാജ്പഥില്‍ (ഇപ്പോള്‍ കര്‍ത്തവ്യ പാത എന്നറിയപ്പെടുന്നു) നടക്കുന്ന റിപ്പബ്ലിക് ദിന പരേഡാണ് ഈ ദിവസത്തെ ഹൈലൈറ്റ്. ഈ പരേഡില്‍ രാജ്യത്തെ സൈനിക ശക്തി പ്രദര്‍ശിപ്പിക്കുകയും വിവിധ സംസ്ഥാനങ്ങളെ അടിസ്ഥാനമാക്കിയുള്ള ഫ്‌ളോട്ടുകള്‍ അവതരിപ്പിക്കുകയും ചെയ്യുന്നു.

പരേഡിന് പുറമേ ഇന്ത്യന്‍ രാഷ്ട്രപതി, സൈനികര്‍ക്ക് പരമവീര ചക്രം, അശോക ചക്രം, വീര ചക്രം തുടങ്ങിയ സൈനിക ബഹുമതികളും ഈ ദിവസം സമ്മാനിക്കും. വിവിധ മേഖലകളില്‍ സിവിലിയന്‍മാരുടെ മികച്ച സംഭാവനകള്‍ പരിഗണിച്ചാണ് പത്മ പുരസ്‌കാരങ്ങള്‍ നല്‍കുന്നത്. ഈ വര്‍ഷത്തെ മുഖ്യാതിഥി ഫ്രാന്‍സ് പ്രസിഡന്റ് ഇമ്മാനുവല്‍ മാക്രോണ്‍ ആണ്. കഴിഞ്ഞ വര്‍ഷം ഈജിപ്ഷ്യന്‍ പ്രസിഡന്റ് അബ്ദുല്‍ ഫത്താഹ് എല്‍ സിസി വിശിഷ്ടാതിഥിയായിരുന്നു. രാവിലെ 9.30ന് റിപ്പബ്ലിക് ദിനാഘോഷങ്ങള്‍ ആരംഭിക്കും.

രാജ്യത്തെ റിപ്പബ്ലിക് ദിന ആഘോഷങ്ങള്‍

റിപ്പബ്ലിക് ദിനം രാജ്യമെമ്പാടും വലിയ ആവേശത്തോടെ ആഘോഷിക്കുന്നു. വിവിധ സര്‍ക്കാര്‍ ഓഫീസുകള്‍, സ്‌കൂളുകള്‍, പൊതു ഇടങ്ങള്‍ എന്നിവിടങ്ങളില്‍ ദേശീയ പതാക ഉയര്‍ത്തുകയും സാംസ്‌കാരിക പരിപാടികള്‍ സംഘടിപ്പിക്കുകയും ചെയ്യുന്നു. ജനാധിപത്യത്തിന്റെ ശക്തിയും രാജ്യത്തിന്റെ ഭാഗധേയം രൂപപ്പെടുത്തുന്നതില്‍ പൗരന്മാരുടെ പങ്കും ഊന്നിപ്പറയുന്ന ഭരണഘടനയില്‍ പ്രതിപാദിച്ചിരിക്കുന്ന മൂല്യങ്ങളുടെ ഓര്‍മ്മപ്പെടുത്തലാണ് ഈ ദിനം.

ഇന്ത്യന്‍ ഭരണഘടനയുടെ ചരിത്രം

1946 ഡിസംബര്‍ 9 ന് ഭരണഘടനാ അസംബ്ലി ആദ്യമായി ന്യൂഡല്‍ഹിയില്‍ ഭരണഘടനാ ഹാളില്‍ യോഗം ചേര്‍ന്നു. അതിനുശേഷം ഒരു കരട് സമിതിയെ നിയോഗിക്കുകയും സമിതിയുടെ ചെയര്‍മാനായി ഡോ. ബി.ആര്‍ അംബേദ്കറെ നിയമിക്കുകയും ചെയ്തു. സ്വതന്ത്ര ഇന്ത്യയ്ക്കായുള്ള ഭരണഘടനയുടെ കരട് തയ്യാറാക്കാന്‍ കോണ്‍സ്റ്റിറ്റുവന്റ് അസംബ്ലി ഏകദേശം മൂന്ന് വര്‍ഷമെടുത്തു. കൃത്യമായി പറഞ്ഞാല്‍ രണ്ട് വര്‍ഷം, പതിനൊന്ന് മാസം, പതിനേഴ് ദിവസം. 1949 നവംബര്‍ 26 ന് ഇന്ത്യന്‍ ഭരണഘടനാ അസംബ്ലി ഭരണഘടന അംഗീകരിച്ചു. 1950 ജനുവരി 26 മുതല്‍ ഇത് പ്രാബല്യത്തില്‍ വന്നു.

ആദ്യ റിപ്പബ്ലിക് ദിനം

1950 ജനുവരി 26 ന് രാവിലെ 10:18 ന് ഇന്ത്യ റിപ്പബ്ലിക്കായി. ഏതാനും മിനിറ്റുകള്‍ക്ക് ശേഷം 10:24 ന് ഡോ. രാജേന്ദ്ര പ്രസാദ് ഇന്ത്യയുടെ ആദ്യ രാഷ്ട്രപതിയായി സത്യപ്രതിജ്ഞ ചെയ്തു. ഇന്ത്യയുടെ ആദ്യത്തെ ഭരണഘടന ഹിന്ദിയിലും ഇംഗ്ലീഷിലുമുള്ള കൈയ്യക്ഷരപ്രതിയായിരുന്നു. 1950 ജനുവരി 24 ന് ഭരണഘടനാ അസംബ്ലി അംഗങ്ങള്‍ ഇതില്‍ ഒപ്പുവച്ചു. ഈ പകര്‍പ്പുകള്‍ ഇപ്പോഴും പാര്‍ലമെന്റിന്റെ ലൈബ്രറിയില്‍ സൂക്ഷിച്ചിട്ടുണ്ട്.

ആഘോഷത്തിന്റെ വേദി

1950 നും 1954 നും ഇടയില്‍ റിപ്പബ്ലിക് ദിനാഘോഷത്തിന് ഇന്ത്യക്ക് ഒരു നിശ്ചിത വേദി ഉണ്ടായിരുന്നില്ല. തുടക്കത്തില്‍ അത് ചെങ്കോട്ടയിലും പിന്നീട് നാഷണല്‍ സ്റ്റേഡിയം, കിംഗ്സ്വേ ക്യാമ്പ്, രാംലീല മൈതാനം എന്നിവിടങ്ങളിലായി നടന്നു. ഒടുവില്‍ 1955 ല്‍ ഡല്‍ഹി രാജ്പഥ് സ്ഥിരം വേദിയായി തിരഞ്ഞെടുത്തു. ആദ്യത്തെ റിപ്പബ്ലിക് ദിന പരേഡും ഇവിടെയായിരുന്നു. സൈനിക പരേഡ് രാഷ്ട്രപതി ഭവനില്‍ തുടങ്ങി രാജ്പഥില്‍ കൂടി ചരിത്ര പ്രസിദ്ധമായ ചെങ്കോട്ടയില്‍ എത്തി അവസാനിക്കുന്നു.

റിപ്പബ്ലിക് ദിന ചടങ്ങുകള്‍

റിപ്പബ്ലിക് ദിനത്തിന്റെ തലേദിവസം രാഷ്ട്രപതി രാജ്യത്തെ അഭിസംബോധന ചെയ്യുന്ന പതിവുണ്ട്. രാജ്യത്തെ ജനങ്ങള്‍ ഉറ്റുനോക്കുന്നതാണ് ഈ അഭിസംബോധന. റിപ്പബ്ലിക് ദിന പരേഡിന് മുമ്പ് രാഷ്ട്രപതി ചെങ്കോട്ടയില്‍ ദേശീയ പതാക ഉയര്‍ത്തുകയും 21 റൈഫിള്‍ സല്യൂട്ട് സ്വീകരിക്കുകയും ചെയ്യുന്നു. ജനുവരി 26 മുതല്‍ 29 വരെ മൂന്ന് ദിവസം മുഴുവന്‍ ആഘോഷം നീണ്ടുനില്‍ക്കും. രാഷ്ട്രപതി പതാക ഉയര്‍ത്തുന്നതോടെ ആഘോഷങ്ങള്‍ ആരംഭിക്കുകയും വിജയ് ചൗക്കിലെ ബീറ്റിംഗ് ദി റിട്രീറ്റോടെ ആഘോഷങ്ങള്‍ അവസാനിക്കുകയും ചെയ്യുന്നു.

മുഖ്യാതിഥി

എല്ലാ വര്‍ഷവും റിപ്പബ്ലിക് ദിനത്തില്‍ മറ്റു രാജ്യങ്ങളില്‍ നിന്നുള്ള പ്രധാന വ്യക്തികളെ വിശിഷ്ടാതിഥിയായി ഇന്ത്യയിലേക്ക് ക്ഷണിക്കുന്ന പതിവുണ്ട്. 1950ല്‍ ഇന്തോനേഷ്യന്‍ പ്രസിഡന്റ് സുകര്‍ണോ ആയിരുന്നു അതിഥി. ഈ വര്‍ഷത്തെ മുഖ്യാതിഥി ഫ്രാന്‍സ് പ്രസിഡന്റ് ഇമ്മാനുവല്‍ മാക്രോണ്‍ ആണ്.

റിപ്പബ്ലിക് ദിന പരേഡ്

ജനുവരി 26ന് ദിവസം രാവിലെ ഒന്‍പതിന് പതാക ഉയര്‍ത്തുകയും തുടര്‍ന്ന് 9.30 ന് റിപ്പബ്ലിക് ദിന പരേഡ് ആരംഭിക്കുകയും ചെയ്യുന്നു. കരസേന, നാവികസേന, വ്യോമസേന പരേഡ് എന്നിവ കൂടാതെ ഇന്ത്യയിലെ ഓരോ സംസ്ഥാനങ്ങളില്‍ നിന്നുമുള്ള വര്‍ണ്ണാഭമായ ഫ്ളോട്ടുകള്‍ റിപ്പബ്ലിക് ദിന പരേഡിന്റെ പ്രത്യേകതയാണ്. പരേഡിന് മുമ്പ്, യുദ്ധത്തില്‍ ജീവന്‍ നഷ്ടപ്പെട്ട സൈനികരുടെ സ്മരണയ്ക്കായി പ്രധാനമന്ത്രി ഇന്ത്യാ ഗേറ്റിനടുത്തുള്ള ദേശീയ യുദ്ധസ്മാരകത്തില്‍ പുഷ്പാര്‍ച്ചനയും നടത്തുന്നു.

റിപ്പബ്ലിക് ദിന പരേഡ്: ഓണ്‍ലൈനായി ടിക്കറ്റുകള്‍ എങ്ങനെ വാങ്ങാം

റിപ്പബ്ലിക് ദിന പരേഡ് ടിക്കറ്റുകള്‍ക്ക് സീറ്റിന്റെ അടിസ്ഥാനത്തില്‍ 500 രൂപ (റിസര്‍വ് ചെയ്ത ടിക്കറ്റുകള്‍), 200 രൂപ, 20 രൂപ എന്നിങ്ങനെയാണ് നിരക്ക്.
ഘട്ടം 1: പ്രതിരോധ മന്ത്രാലയത്തിന്റെ ഔദ്യോഗിക വെബ് പോര്‍ട്ടലിലേക്ക് പോകുക: www.aamantran.mod.gov.in. ലോഗിന്‍ ചെയ്യുക. ഒരു പുതിയ അക്കൗണ്ട് സൃഷ്ടിക്കുക.
ഘട്ടം 2: പേര്, ജനനതീയതി, മൊബൈല്‍ നമ്പര്‍ മുതലായവ പോലുള്ള വ്യക്തിഗത വിശദാംശങ്ങള്‍ പൂരിപ്പിക്കുക. നിങ്ങളുടെ രജിസ്റ്റര്‍ ചെയ്ത മൊബൈല്‍ നമ്പറില്‍ നിങ്ങള്‍ക്ക് ഒരു OTP ലഭിക്കും. നിങ്ങളുടെ അക്കൗണ്ട് വെരിഫൈ ചെയ്യാന്‍ അത് ഉപയോഗിക്കുക.
ഘട്ടം 3: FDR (ഫുള്‍ ഡ്രസ് റിഹേഴ്‌സല്‍), റിപ്പബ്ലിക് ദിന പരേഡ്, റിപ്പബ്ലിക് ദിന പരേഡ്, ബീറ്റിംഗ് ദി റിട്രീറ്റ് എന്നിങ്ങനെയുള്ള ഓപ്ഷനുകളുടെ ലിസ്റ്റില്‍ നിന്ന് 'റിപ്പബ്ലിക് ഡേ പരേഡ്' എന്ന ഓപ്ഷന്‍ തിരഞ്ഞെടുക്കുക.
ഘട്ടം 4: പാന്‍ കാര്‍ഡ്, ആധാര്‍ കാര്‍ഡ് മുതലായവ പോലുള്ള തിരിച്ചറിയല്‍ കാര്‍ഡുകള്‍ ഉപയോഗിച്ച് ഐഡന്റിറ്റി പ്രൂഫ് ഫയല്‍ ചെയ്തുകൊണ്ട് പങ്കെടുക്കുന്നയാളുടെ വിവരങ്ങള്‍ നല്‍കുക.
ഘട്ടം 5: ഓണ്‍ലൈന്‍ പേയ്മെന്റ് നടത്തി രജിസ്‌ട്രേഷന്‍ പൂര്‍ത്തിയാക്കുക.

ഓഫ് ലൈനായി എങ്ങനെ ടിക്കറ്റ് വാങ്ങാം

ഡല്‍ഹി ടൂറിസം ഡെവലപ്മെന്റ് കോര്‍പ്പറേഷന്‍ (ഡിടിഡിസി) കൗണ്ടറുകള്‍, ഇന്ത്യ ടൂറിസം ഡെവലപ്മെന്റ് കോര്‍പ്പറേഷന്‍ (ഐടിഡിസി) ട്രാവല്‍ കൗണ്ടറുകള്‍, ഡല്‍ഹിയിലെ ഡിപ്പാര്‍ട്ട്മെന്റല്‍ സെയില്‍ കൗണ്ടറുകള്‍ എന്നിവയില്‍ നിന്ന് നിങ്ങള്‍ക്ക് ഓഫ്ലൈന്‍ റിപ്പബ്ലിക് ദിന ടിക്കറ്റുകള്‍ വാങ്ങാവുന്നതാണ്. കൂടാതെ, സേന ഭവന്‍, പ്രഗതി മൈതാനം, ജന്തര്‍ മന്തര്‍, ശാസ്ത്രി ഭവന്‍, പാര്‍ലമെന്റ് ഹൗസ് റിസപ്ഷന്‍ ഓഫീസ്, ജന്‍പഥിലെ ഗവണ്‍മെന്റ് ഓഫ് ഇന്ത്യ ടൂറിസ്റ്റ് ഓഫീസ് എന്നിവിടങ്ങളിലെ ബൂത്തുകളില്‍ നിന്നും ടിക്കറ്റ് വാങ്ങാന്‍ സാധിക്കും. ടിക്കറ്റുകള്‍ വാങ്ങാന്‍, നിങ്ങളുടെ വിശദാംശങ്ങളടങ്ങിയ ഒരു ഫോം പൂരിപ്പിക്കണം. ഒരു ഐഡന്റിറ്റി കാര്‍ഡിന്റെ ഫോട്ടോകോപ്പിയും നല്‍കണം.