ശ്വാസകോശത്തെ ഗുരുതരമായി ബാധിക്കുന്ന രോഗം; ഇന്ന് ലോക ന്യുമോണിയ ദിനം

ലോക ന്യുമോണിയ ദിനം ചരിത്രവും പ്രാധാന്യവും

ഗ്ലോബല്‍ കോളിഷന്‍ ഗെയിന്‍സ്റ്റ് ചൈല്‍ഡ് ന്യുമോണിയയുടെ സംരംഭമായ 'സ്റ്റോപ്പ് ന്യുമോണിയ' യുടെ കീഴില്‍ 2009 നവംബര്‍ 12നാണ് ലോക ന്യൂമോണിയ ദിനം ആദ്യമായി ആചരിച്ചത്. അതിനുശേഷം, ന്യുമോണിയ തടയുന്നതിനും നിയന്ത്രിക്കുന്നതിനുമായി ലോകാരോഗ്യ സംഘടനയും യുണിസെഫും ഒരു സംയോജിത ആഗോള പ്രവര്‍ത്തന പദ്ധതിയായി ഇത് ആരംഭിച്ചു. ന്യുമോണിയ ശ്വാസകോശത്തെ സാരമായി ബാധിക്കും. ഇത് സാധാരണയായി വൈറല്‍ അല്ലെങ്കില്‍ ബാക്ടീരിയ അണുബാധ മൂലമാണ് സംഭവിക്കുന്നത്. അതിനാല്‍, സാധാരണക്കാരില്‍ ന്യുമോണിയ എന്ന രോഗത്തെക്കുറിച്ച് അവബോധം ഉണ്ടാക്കുക എന്നതാണ് ഈ ദിനം ആഘോഷിക്കുന്നതിന്റെ പിന്നിലെ ലക്ഷ്യം. 2030-ഓടെ ന്യുമോണിയ മൂലമുണ്ടാകുന്ന മരണം പൂജ്യമാക്കുക എന്നതാണ് ഈ ദിനാഘോഷത്തിലൂടെ ലക്ഷ്യമിടുന്നത്.

ലോക ന്യുമോണിയ ദിനം 2022 സന്ദേശം

ഓരോ വര്‍ഷവും ഓരോ സന്ദേശത്തോടെ ലോക ന്യുമോണിയ ദിനം ആചരിച്ചുവരുന്നു. 2022ലെ ലോക ന്യുമോണിയ ദിനത്തിന്റെ പ്രമേയം 'ന്യുമോണിയ തടയാനുള്ള പോരാട്ടത്തില്‍ വിജയിക്കുക' എന്നതാണ്.

ന്യുമോണിയ ലക്ഷണങ്ങള്‍

ന്യുമോണിയ ഒരു സാംക്രമിക അണുബാധയാണ്. രോഗലക്ഷണങ്ങള്‍ മിതമായത് മുതല്‍ ഗുരുതരമായത് വരെയാകാം. പനി, ചുമ, വരണ്ട ചുമ, കട്ടിയുള്ള മഞ്ഞ, പച്ച, തവിട്ട് അല്ലെങ്കില്‍ രക്തം കലര്‍ന്ന കഫം, ശ്വസിക്കാന്‍ ബുദ്ധിമുട്ട്, വിറയല്‍, വിശപ്പില്ലായ്മ, അലസത, കഫത്തില്‍ രക്തം, നെഞ്ച് വേദന എന്നിവ ന്യൂമോണിയ ലക്ഷണങ്ങളായി കണക്കാക്കാം.

ന്യുമോണിയ പ്രതിരോധവും ചികിത്സയും

സാധാരണയായി നേരിയ ന്യുമോണിയ ഉള്ള ഒരാള്‍ക്ക് വീട്ടില്‍ തന്നെ അവരുടെ രോഗം ചികിത്സിക്കാം. ധാരാളം വിശ്രമം എടുക്കുക, ആന്റിബയോട്ടിക്കുകള്‍ കഴിക്കുക, ധാരാളം വെള്ളം കുടിക്കുക എന്നിവ നിങ്ങള്‍ക്ക് ചെയ്യാം. അപകടസാധ്യതയുള്ളവര്‍ക്ക് ചിലപ്പോള്‍ ന്യുമോണിയ ഗുരുതരമായേക്കാം. ഇത്തരക്കാര്‍ക്ക് ഉടന്‍ തന്നെ ആശുപത്രി ചികിത്സ വേണ്ടിവരും.

ന്യൂമോണിയ തടയാന്‍

* നല്ല ശുചിത്വം പാലിക്കുക

* ചുമയ്ക്കുമ്പോഴും തുമ്മുമ്പോഴും വായും മൂക്കും പൊത്തിപ്പിടിക്കുക

* മറ്റ് ആളുകളിലേക്ക് രോഗം കൈമാറ്റം ചെയ്യാതിരിക്കാന്‍ നിങ്ങളുടെ കൈകള്‍ പതിവായി കഴുകുക

* ആരോഗ്യകരമായ ജീവിതശൈലി പിന്തുടരുക

* ന്യൂമോകോക്കല്‍ വാക്‌സിനും ഫ്‌ളൂ വാക്‌സിനും എടുക്കുക.