ദൈവത്തിന്റെ വാസസ്ഥലം; വീട്ടില്‍ ഈശാന കോണ്‍ ശ്രദ്ധിച്ചില്ലെങ്കില്‍ ദോഷം ഈവിധം

ഈശാന കോണിന്റെ പ്രാധാന്യവും ദിശയും

ലളിതമായി പറഞ്ഞാല്‍, നിങ്ങളുടെ പ്ലോട്ടിന്റെയോ വീടിന്റെയോ വാണിജ്യ കെട്ടിടത്തിന്റെയോ ഏറ്റവും വടക്ക്-കിഴക്ക് മൂലയാണ് ഈശാന കോണ്‍. വടക്ക് ദിശയ്ക്കും കിഴക്ക് ദിശയ്ക്കും ഇടയില്‍ സ്ഥിതി ചെയ്യുന്ന വടക്കുകിഴക്ക് ദിശ എന്ന ഉപ ദിശയിലാണ് ഈശാന കോന്‍ സ്ഥിതി ചെയ്യുന്നത്. ഹിന്ദു പുരാണങ്ങളിലും വാസ്തു ശാസ്ത്രത്തിലും ഈശാന കോണിന് വളരെയധികം പ്രാധാന്യം നല്‍കിയിട്ടുണ്ട്. കാരണം ഈ ദിശ എല്ലാ ദൈവങ്ങളുടെയും ഭവനമാണെന്ന് വിശ്വസിക്കപ്പെടുന്നു. അതിനാല്‍, എല്ലാ മംഗളകരമായ ചടങ്ങുകളും ഈ ദിശയില്‍ ചെയ്യുന്നതാണ് അഭികാമ്യം.

ഈശാന കോണിലെ നിര്‍മാണം

നിങ്ങളുടെ വീടിന്റെയോ വാണിജ്യ കെട്ടിടത്തിന്റെയോ ഏറ്റവും മംഗളകരമായ ഭാഗങ്ങളില്‍ ഒന്നാണ് ഈശാന കോണ്‍. ആയതിനാല്‍, ഈ മൂലയിലോ ദിശയിലോ നിങ്ങളുടെ വീടിന്റെ ഏറ്റവും അനുകൂലമായ ഭാഗങ്ങള്‍ നിര്‍മ്മിക്കുന്നതിന് മികച്ചതാണ്. വാസ്തു ശാസ്ത്ര പ്രകാരം ഈ ദിശയില്‍ വളരെ അനുകൂലമായി കണക്കാക്കപ്പെടുന്ന നിങ്ങളുടെ വീടിന്റെ ചില മുറികളോ ഭാഗങ്ങളോ നിര്‍മിക്കാം.

പ്രധാന കവാടം

നിങ്ങളുടെ വീടിന്റെ പ്രധാന ഗേറ്റോ പ്രവേശന കവാടമോ വടക്കുകിഴക്ക് ദിശയില്‍ സ്ഥാപിക്കണം. പോസിറ്റീവ് എനര്‍ജിയും നല്ല വൈബ്രേഷനുകളും ഇതിലൂടെ നിങ്ങളുടെ വീട്ടിലേക്ക് നേരിട്ട് പ്രവേശിക്കുന്നു.

പൂജാമുറി

വിശുദ്ധമോ ദൈവികമോ ആയ കര്‍മ്മങ്ങളും ചടങ്ങുകളും നടക്കുന്ന സ്ഥലമാണ് പൂജാമുറി. ഈശാന കോണ്‍ ദൈവങ്ങളുടെ ഭവനമായതിനാല്‍ പൂജാമുറി നിര്‍മ്മിക്കുന്നതിന് ഈ സ്ഥലം വളരെ അനുകൂലമായി കണക്കാക്കപ്പെടുന്നു.

സ്റ്റഡി റൂം

വീട്ടിലെ അംഗങ്ങളുടെ ബൗദ്ധികവും ആത്മീയവുമായ ഉണര്‍വിനും ഈശാന കോണ്‍ വളരെ അനുകൂലമായി കണക്കാക്കപ്പെടുന്നു. ലക്ഷ്മി ദേവിയുടെ സന്താന ലക്ഷ്മി അവതാരം ഈ ദിശയിലേക്ക് നോക്കുന്നതായി വിശ്വസിക്കപ്പെടുന്നു. അതിനാല്‍ ഇത് നിങ്ങളുടെ കുട്ടികള്‍ക്ക് വളരെ പ്രധാനപ്പെട്ട ഒരു ദിശയായി മാറുന്നു. അതിനാല്‍ ഈ ദിശയില്‍ ഒരു പഠനമുറി ഉണ്ടാക്കുന്നത് നിങ്ങളുടെ കുട്ടിയുടെ വിദ്യാഭ്യാസ നേട്ടത്തിന് ഉത്തമമായിരിക്കും.

പൂന്തോട്ടം

ഈ ദിശയില്‍ നിന്നുള്ള പോസിറ്റീവ് സ്പന്ദനങ്ങളുടെ ഒഴുക്ക് വരുന്നതിനായി പല വാസ്തു വിദഗ്ധരും ഈ പ്രദേശം തുറന്നിടാന്‍ നിര്‍ദ്ദേശിക്കുന്നു. ഇത് നിങ്ങള്‍ ആഗ്രഹിക്കുന്നുവെങ്കില്‍, ഈ ദിശയില്‍ മനോഹരമായ പൂന്തോട്ടമോ പുല്‍ത്തകിടിയോ നിങ്ങള്‍ക്ക് നിര്‍മിക്കാം.

വാണിജ്യ സ്ഥലത്ത് റിസപ്ഷന്‍ ഏരിയക്ക് ഉത്തമം

നിങ്ങള്‍ക്ക് ഒരു വാണിജ്യസ്ഥാപനമോ ഓഫീസോ ഉണ്ടെങ്കില്‍, നിങ്ങളുടെ കെട്ടിടത്തിന്റെ ഈശാന കോണ്‍ ഭാഗത്ത് ഒരു റിസപ്ഷന്‍ ഏരിയയോ കാത്തിരിപ്പ് കേന്ദ്രമോ നിര്‍മിക്കാം. ഇത് നിങ്ങള്‍ക്ക് നല്ല ബിസിനസ്സ് അവസരങ്ങള്‍ കൊണ്ടുവരുന്നതിന് സഹായിക്കും.

വീടിന്റെ ഈശാന കോണില്‍ ശ്രദ്ധിക്കാന്‍

ഈശാന കോണ്‍ എല്ലായ്‌പ്പോഴും വൃത്തിയോടെയും ശുചിയോടെയും നിലനിര്‍ത്തണം. ഏതെങ്കിലും തരത്തിലുള്ള അഴുക്കും മാലിന്യവും ഈ ദിശയില്‍ കുന്നുകൂടുകയാണെങ്കില്‍, അത് ധാരാളം നെഗറ്റീവ് എനര്‍ജി ആകര്‍ഷിക്കും. നിങ്ങളുടെ വീട്ടിലോ വാണിജ്യ വസ്തുവിലോ ഏതെങ്കിലും തരത്തിലുള്ള ചരിവ് ഉണ്ടെങ്കില്‍ അത് വടക്കുകിഴക്ക് ദിശയിലോ ഈശാന കോണിലോ ആയിരിക്കണം, ഈ ചരിവ് ഒരിക്കലും എതിര്‍ദിശയിലാകരുത്. വടക്കുകിഴക്ക് ദിശയില്‍ വ്യാപിച്ചുകിടക്കുന്ന പ്രോപ്പര്‍ട്ടികള്‍ വളരെ ശുഭകരമായി കണക്കാക്കപ്പെടുന്നു, അതുകൊണ്ടാണ് ഇത്തരത്തിലുള്ള സ്ഥലങ്ങള്‍ക്ക് ആവശ്യക്കാര്‍ ഏറെയുള്ളത്. അഞ്ച് മൂലകങ്ങളില്‍ ഈശാന കോണുമായി ബന്ധപ്പെട്ട മൂലകം ജലമാണ്. കുഴല്‍ കിണര്‍, കിണര്‍ തുടങ്ങിയ പ്രകൃതിദത്ത ജലസ്രോതസ്സുകള്‍ ഈ ദിശയില്‍ വളരെ അനുകൂലമായി കണക്കാക്കപ്പെടുന്നു. ഈ ദിശയില്‍ നിന്ന് ഉത്ഭവിക്കുന്ന വെള്ളം വീടിന് ആരോഗ്യം, സമ്പത്ത്, ഐശ്വര്യം എന്നിവ കൊണ്ടുവരുമെന്ന് വിശ്വസിക്കപ്പെടുന്നു.

ഈ സ്ഥലത്ത് ശുചിമുറി നിര്‍മ്മിക്കരുത്

വീടിന്റെ വടക്ക് കിഴക്ക് മൂലയില്‍ കുളിമുറി ഉണ്ടാക്കരുത്. വീടിന്റെ ഈ മൂല ദൈവത്തിന്റെ വാസസ്ഥലമായതിനാല്‍, അതേ സ്ഥലത്ത് ഒരു ശുചിമുറി ഉണ്ടാക്കുന്നത് നിങ്ങള്‍ക്ക് ശാരീരിക പ്രശ്‌നങ്ങള്‍ ഉണ്ടാക്കുമെന്നും വിശ്വസിക്കപ്പെടുന്നു. ഇത് ചെയ്യുന്നതിലൂടെ, നിങ്ങളുടെ പണമെല്ലാം അനാവശ്യ രോഗങ്ങള്‍ മാറ്റാനായി ചെലവഴിക്കാന്‍ തുടങ്ങും. ഇത് വീടിന്റെ സാമ്പത്തിക സ്ഥിതിയെത്തന്നെ മോശമാക്കുകയും ചെയ്യും.

കിടപ്പുമുറി നിര്‍മ്മിക്കരുത്

ഒരിക്കലും വീടിന്റെ വടക്കുകിഴക്ക് മൂലയില്‍ ദമ്പതികള്‍ക്കായി കിടപ്പുമുറി ഒരുക്കരുത്. ഇത് ചെയ്യുന്നതിലൂടെ ബന്ധങ്ങളില്‍ പിരിമുറുക്കം ഉണ്ടാകുകയും അനാവശ്യ പ്രശ്‌നങ്ങള്‍ വര്‍ദ്ധിക്കുകയും ചെയ്യുന്നു. വീടിന്റെ ഈ മൂലയെ ശിവന്റെ സ്ഥലമായി നേരിട്ട് കണക്കാക്കുന്നു. ഈ സ്ഥലത്ത് ഒരു കിടപ്പുമുറി പണിയുന്നത് വീട്ടില്‍ നെഗറ്റീവ് എനര്‍ജി കൊണ്ടുവരും.

ഭാരമുള്ള സാധനങ്ങള്‍ ഈ ഭാഗത്ത് സൂക്ഷിക്കരുത്

വാസ്തു പ്രകാരം വീടിന്റെ വടക്കുകിഴക്ക് മൂലയില്‍ ഭാരമുള്ള വസ്തുക്കള്‍ സൂക്ഷിക്കരുത്. നിങ്ങള്‍ ഈ സ്ഥലത്ത് ഭാരമുള്ള ഒരു സാധനം സൂക്ഷിച്ചാല്‍, ഊര്‍ജ്ജം ഒഴുക്ക് തടഞ്ഞ് നിങ്ങള്‍ക്ക് സാമ്പത്തിക നഷ്ടം സംഭവിക്കുമെന്ന് വിശ്വസിക്കപ്പെടുന്നു. അതിനാല്‍ ഈ സ്ഥലത്ത് അലമാരകള്‍, സ്റ്റോര്‍ റൂമുകള്‍ തുടങ്ങിയവ ഒഴിവാക്കുക. ഭാരമുള്ള സാധനങ്ങള്‍ ഈ സ്ഥലത്ത് സൂക്ഷിക്കുന്നത് നെഗറ്റീവ് എനര്‍ജി വര്‍ദ്ധിപ്പിക്കും.

ചെരിപ്പ് വയ്ക്കരുത്

ചെരിപ്പ് ഒരിക്കലും വീടിന്റെ വടക്ക് കിഴക്ക് ഭാഗത്ത് വയ്ക്കരുത്. വീടിന്റെ ഈ മൂലയാണ് ഏറ്റവും പുണ്യം, അത് ദൈവത്തിന്റെ സ്ഥലമായി കണക്കാക്കപ്പെടുന്നു. അതിനാല്‍, നിങ്ങള്‍ ഒരിക്കലും ഈ സ്ഥലത്ത് ചെരിപ്പുകളോ മറ്റ് മലിന വസ്തുക്കളോ വയ്ക്കരുത്. ഇങ്ങനെ ചെയ്യുന്നതിലൂടെ വീട്ടില്‍ നെഗറ്റീവ് ഊര്‍ജം വരികയും വീടിന്റെ സാമ്പത്തിക സ്ഥിതി മോശമാകാന്‍ തുടങ്ങുകയും ചെയ്യുന്നു.