ഇവനെ കണ്ട് തുടങ്ങൂ പുതുവര്‍ഷം; സച്ചിന്റെ വീഡിയോ

പുതുവര്‍ഷത്തില്‍ പുത്തന്‍ പ്രതീക്ഷകള്‍ തേടാന്‍ നാമെല്ലാം ആഗ്രഹിക്കുന്നവരാണ്. അതിനായി നമ്മെ പ്രചോദിപ്പിക്കാന്‍ ഒരു സൂപ്പര്‍ താരം തന്നെ മുന്നോട്ടു വന്നാലോ? അതെ, അത്തരത്തില്‍ നമുക്കെല്ലാം പ്രോത്സാഹനവുമായി ഒരു വീഡിയോ പങ്കുവച്ച് ഞെട്ടിച്ചിരിക്കുകയാണ് ക്രിക്കറ്റ് ഇതിഹാസം സാക്ഷാല്‍ സച്ചിന്‍ ടെന്‍ഡുല്‍ക്കര്‍.

സച്ചിന്റെ പുതുവത്സരാശംസയെന്നോണം ട്വിറ്ററിലാണ് വീഡിയോ അദ്ദേഹം പങ്കുവച്ചത്. Start your 2020 with the inspirational video of this Kid Madda Ram playing cricket with his friends. It warmed my heart and I am sure it will warm yours too. എന്നൊരു തലക്കെട്ടും വീഡിയോക്ക് നല്‍കിയിട്ടുണ്ട്. കാലുകള്‍ തളര്‍ന്ന ഭിന്നശേഷിക്കാരനായ മദ്ദ റാം എന്ന കുട്ടി മറ്റു കുട്ടികള്‍ക്കൊപ്പം ക്രിക്കറ്റ് കളിക്കുന്നതാണ് വീഡിയോ. നോണ്‍ സ്‌ട്രൈക്കര്‍ എന്‍ഡില്‍ നില്‍ക്കുന്ന മദ്ദ തന്റെ സഹകളിക്കാരന്‍ ഷോട്ട് ഉതിര്‍ത്തപ്പോള്‍ കൈകള്‍ കുത്തി റണ്ണിനായി ഓടുന്ന വീഡിയോ ഏവരുടെയും മനസ്സു നിറയ്ക്കുന്നതാണ്. വീഡിയോ കണ്ട ആരാധകര്‍ ഈ കുട്ടിയുടെ അഭിനിവേശത്തെ പ്രശംസിക്കുകയും ചെയ്തു.

മാസ്റ്റര്‍ ബ്ലാസ്റ്റര്‍ നേരിട്ട് ഇത്തരമൊരു വീഡിയോ പങ്കുവച്ചതിനുശേഷം ട്വിറ്റര്‍ ആരാധകര്‍ ഇതേറ്റെടുത്തു. നിരവധി പേര്‍ ലൈക്കുകളും കമന്റുകളുമായി രംഗത്തെത്തിയതോടെ വീഡിയോ വൈറലായി. ഛത്തിസ്ഗഡ്ഡിലെ ദന്തേവാഡയിലെ ഒരു ഗ്രാമത്തിലാണ് കളി നടന്നതെന്ന് റിപ്പോര്‍ട്ടുകളുണ്ട്.

46 കാരനായ സച്ചിന്‍ 1989ല്‍ 16-ാം വയസ്സിലാണ് ഇന്ത്യയ്ക്കായി അരങ്ങേറ്റം കുറിക്കുന്നത്. ക്രിക്കറ്റിലെ ഫോര്‍മാറ്റുകളിലുടനീളം 34,357 റണ്‍സ് അദ്ദേഹം നേടിയിട്ടുണ്ട്. അന്താരാഷ്ട്ര ക്രിക്കറ്റില്‍ ഏറ്റവുമധികം റണ്‍സ് നേടിയ കളിക്കാരന്‍ എന്ന റെക്കോര്‍ഡും അദ്ദേഹത്തിന് സ്വന്തമാണ്. ഇപ്പോള്‍ ഇന്ത്യന്‍ പ്രീമിയര്‍ ലീഗില്‍ മുംബൈ ഇന്ത്യന്‍സിന് ഉപദേഷ്ടാവാണ് ടെന്‍ഡുല്‍ക്കര്‍