2021 നവംബറിലെ ആഘോഷ ദിനങ്ങളും വ്രതദിനങ്ങളും

നവംബര്‍ 2 ചൊവ്വ - ധന്തേരാസ്

കാര്‍ത്തിക മാസത്തിലെ കൃഷ്ണപക്ഷത്തിലെ ത്രയോദശി തിഥിയിലാണ് ധന്തേരസ് ഉത്സവം ആഘോഷിക്കുന്നത്. അഞ്ച് ദിവസത്തെ ദീപാവലി ആഘോഷം ആരംഭിക്കുന്നത് ഈ ദിവസം മുതലാണ്. ധന്വന്തരി ഭഗവാന്‍ സമര്‍പ്പിച്ചതാണ് ധന്തേരസ് ദിനം. വിശ്വാസമനുസരിച്ച്, ഈ ദിവസം വാങ്ങുന്നതെന്തും നിരവധി ഗുണങ്ങള്‍ നല്‍കുന്നു. സന്തോഷവും ഭാഗ്യവും ഐശ്വര്യവും നേടാന്‍ ഈ ദിവസം ധന്വന്തരിയോടൊപ്പം ലക്ഷ്മി ദേവിയെയും കുബേരനെയും ആരാധിക്കണം. കൂടാതെ, ഈ ദിവസം ശിവനെ ആരാധിക്കുന്ന ഭൗമ പ്രദോഷ വ്രതവും ആചരിക്കും.

നവംബര്‍ 3 ബുധനാഴ്ച - നരക ചതുര്‍ദശി, ഹനുമാന്‍ ജയന്തി

കാര്‍ത്തിക മാസത്തിലെ കൃഷ്ണപക്ഷത്തിലെ ചതുര്‍ദശി തിഥിയെ നരക ചതുര്‍ദശി എന്ന് വിളിക്കുന്നു. നരക ചതുര്‍ദശിയെ ചോതി ദീപാവലി എന്നും വിളിക്കുന്നു. ഈ ദിവസമാണ് ശ്രീകൃഷ്ണന്‍ നരകാസുരനെ വധിച്ചത്. ഹനുമാന്‍ ജയന്തിയും ഈ ദിവസം ആഘോഷിക്കും. ഈ ചതുര്‍ദശി തിഥിയില്‍ രാവിലെ എണ്ണ പുരട്ടി അപാമാര്‍ഗ ഇല വെള്ളത്തില്‍ കുളിച്ചാല്‍ നരകത്തില്‍ നിന്ന് മോചനം ലഭിക്കുമെന്നാണ് വിശ്വാസം.

നവംബര്‍ 4 വ്യാഴാഴ്ച - ദീപാവലി

കാര്‍ത്തിക മാസത്തിലെ കൃഷ്ണപക്ഷത്തിലെ അമാവാസി ദിനത്തിലാണ് ദീപാവലി ആഘോഷം. ഈ ഉത്സവം ഇരുട്ടിന്റെ മേല്‍ വെളിച്ചത്തിന്റെ വിജയത്തെ സൂചിപ്പിക്കുന്നു. ദീപാവലി ദിനത്തില്‍ അയോധ്യയിലെ രാജാവ് രാമന്‍ തന്റെ പതിനാലു വര്‍ഷത്തെ വനവാസത്തിനുശേഷം മടങ്ങിയെത്തി. ഇതിന്റെ സന്തോഷത്തില്‍ അയോധ്യയിലെ ജനങ്ങള്‍ അദ്ദേഹത്തെ വിളക്കുകള്‍ തെളിയിച്ച് സ്വീകരിച്ചു. ഈ ദിവസം മഹാലക്ഷ്മിയെ ആരാധിക്കുന്നു. ഇന്ത്യയില്‍ വളരെ പ്രാധാന്യത്തോടെയാണ് ദീപാവലി ആഘോഷിക്കപ്പെടുന്നത്. ഇന്ത്യയുടെ കിഴക്കന്‍ പ്രദേശമായ ബംഗാള്‍ ഭാഗങ്ങളില്‍ ഈ ദിവസം കാളിപൂജയായി ആഘോഷിക്കപ്പെടുന്നു.

നവംബര്‍ 5 വെള്ളിയാഴ്ച - ഗോവര്‍ദ്ധന പൂജ

കാര്‍ത്തിക മാസത്തിലെ ശുക്ല പക്ഷത്തിലെ പ്രതിപാദ തിഥിയിലാണ് ഗോവര്‍ദ്ധനെ ആരാധിക്കുന്നത്. ഈ ദിവസം ഗോവര്‍ദ്ധന്‍ ദേവനെ വീടുകളില്‍ ചാണകം കൊണ്ട് ഒരു പ്രതീക രൂപത്തില്‍ ഉണ്ടാക്കി ആരാധിക്കുന്നു. ഈ ദിവസമാണ് മഹാരാഷ്ട്രയില്‍ വാമനാവതാരത്തെ ആരാധിക്കുന്നത്. ഭഗവാന്‍ കൃഷ്ണന്‍ തന്റെ ചെറുവിരല്‍ കൊണ്ട് ഗോവര്‍ദ്ധന പര്‍വ്വതം ഉയര്‍ത്തി ജനങ്ങളെ ഇന്ദ്രന്റെ കോപത്തില്‍ നിന്ന് രക്ഷിച്ചു എന്നാണ് വിശ്വാസം. അന്നു മുതല്‍ ഗോവര്‍ദ്ധന പൂജ ആരംഭിച്ചു. കൃതജ്ഞതയുടെ പ്രതീകമായി ഈ ദിവസം ഭഗവാന്‍ കൃഷ്ണനു സമര്‍പ്പിക്കുന്നതിനായി ഭക്തര്‍ വൈവിധ്യമാര്‍ന്ന ഭക്ഷണങ്ങള്‍ ഉണ്ടാക്കുന്നു.

നവംബര്‍ 6 ശനിയാഴ്ച - ഭായ് ദൂജ്

ഗോവര്‍ദ്ധന പൂജയ്ക്ക് ശേഷം, കാര്‍ത്തിക മാസത്തിലെ ശുക്ല പക്ഷത്തിന്റെ രണ്ടാം ദിവസമാണ് ഭായ് ദൂജ് എന്ന ഉത്സവം ആഘോഷിക്കുന്നത്. യമരാജനെയും സഹോദരി യമുനയെയും ഈ ദിവസം ആരാധിക്കുന്നു, അതിനാല്‍ ഇതിനെ യമ ദ്വിതീയ എന്നും വിളിക്കുന്നു. ഈ ദിവസം സഹോദരിമാര്‍ തങ്ങളുടെ സഹോദരന്റെ ദീര്‍ഘായുസ്സിനായി പ്രാര്‍ത്ഥിക്കുന്നു, സഹോദരങ്ങള്‍ എപ്പോഴും സഹോദരിമാരെ പിന്തുണയ്ക്കുമെന്ന് വാഗ്ദാനം ചെയ്യുന്നു.

നവംബര്‍ 15, തിങ്കള്‍ - ദേവപ്രബോധിനി ഏകാദശി

കാര്‍ത്തിക മാസത്തിലെ ശുക്ല പക്ഷത്തിലെ ഏകാദശി തിഥിയെ ദേവപ്രബോധിനി ഏകാദശി എന്നു വിളിക്കുന്നു. ചാതുര്‍മാസ നിദ്രയ്ക്കുശേഷം മഹാവിഷ്ണു ഉറക്കത്തില്‍ നിന്നുണരുന്നത് ഈ ദിവസമാണ്. ലോകത്തിന്റെ നാഥന്‍ ഉണര്‍ന്നതിനുശേഷം മാത്രമേ മംഗള പരിപാടികള്‍ ആരംഭിക്കൂ. ദേവപ്രബോധിനി ഏകാദശി ദിനത്തിലാണ് തുളസി വിവാഹം നടത്തുന്നത്.

നവംബര്‍ 19, വെള്ളി - കാര്‍ത്തിക പൂര്‍ണിമ

സനാതന ധര്‍മ്മത്തില്‍ കാര്‍ത്തിക പൂര്‍ണിമയ്ക്ക് പ്രത്യേക പ്രാധാന്യമുണ്ട്. ജപം, തപസ്സ്, ദാനം തുടങ്ങിയ മതപരമായ പ്രവര്‍ത്തനങ്ങള്‍ ഈ ദിവസം നടത്തുന്നു. ഈ ദിവസമാണ് നാരായണന്‍ മത്സ്യാവതാരമെടുത്തത്. ഈ ദിവസം വിളക്ക് ദാനം ചെയ്യുന്നത് ആയിരക്കണക്കിന് യാഗങ്ങള്‍ക്ക് തുല്യമായ പുണ്യ ഫലം നല്‍കുന്നു. ഈ ദിവസമാണ് ലക്ഷ്മി ദേവിയുടെ ഭാഗമായ തുളസിയെ മഹാവിഷ്ണുവിന്റെ രൂപത്തില്‍ ശാലിഗ്രാമുമായി വിവാഹം കഴിച്ചതെന്ന് വിശ്വസിക്കപ്പെടുന്നു.

നവംബര്‍ 19 വെള്ളിയാഴ്ച - ഗുരുനാനാക്ക് ജയന്തി

ഈ ദിവസമാണ് സിഖുകാരുടെ ആദ്യ ഗുരുവും സിഖ് വിഭാഗത്തിന്റെ സ്ഥാപകനുമായ ഗുരു നാനാക് ദേവ് 1527-ലെ സംവത്ത്തിലെ കാര്‍ത്തിക് പൂര്‍ണിമ ദിനത്തില്‍ ജനിച്ചത്. അതിനാല്‍ ഈ ദിവസം നാനാക് ജയന്തി എന്നും അറിയപ്പെടുന്നു.