അമ്മയെ കാറിടിച്ചു; ശേഷം കുട്ടി ചെയ്തത്‌ വൈറലായി

ഒരു കുട്ടിക്ക് അമ്മയോടുള്ള സ്‌നേഹം ശുദ്ധമാണെന്നതില്‍ സംശയമില്ല. ഒരു കൊച്ചു ആണ്‍കുട്ടിയുടെ അത്തരമൊരു പ്രവൃത്തിയാണ് ഇപ്പോള്‍ ആളുകളുടെ ഹൃദയം കീഴടക്കുന്നത്. റോഡ് മുറിച്ചുകടക്കുന്നതിനിടെ അമ്മയെ ഇടിച്ചിട്ട കാറിനോടും ഡ്രൈവറോടും അരിശം തീര്‍ക്കുന്ന ചൈനീസ് ബാലനാണ് സോഷ്യല്‍ മീഡിയയില്‍ താരമാകുന്നത്. ഒരു നിരീക്ഷണ കാമറാ ദൃശ്യമാണ് യൂ ട്യൂബില്‍ തരംഗമായി ഓടിക്കൊണ്ടിരിക്കുന്നത്. ചൈനയിലെ ചോങ്കിംഗില്‍ നിന്നാണ് സംഭവം റിപ്പോര്‍ട്ട് ചെയ്തത്.

തിരക്കേറിയ റോഡ് മുറിച്ചുകടക്കുന്നതിന് അമ്മയും ചെറിയ കുട്ടിയും സീബ്രാ ക്രോസിലൂടെ നടന്നു നീങ്ങുന്നതിനിടെ ഒരു കാര്‍ ഇരുവരെയും ഇടിച്ചിടുന്നു. റോഡില്‍ തെറിച്ചുവീണ അമ്മയെ പരിശോധിച്ച് അപകടം വലുതല്ലെന്ന് ഉറപ്പാക്കിയ കുട്ടി കാറിനടുത്തേക്ക് കുതിച്ച് കാറില്‍ തൊഴിച്ച് തനിക്കറിയാവുന്ന രീതിയില്‍ അരിശം തീര്‍ക്കുന്നു. സംഭവം കണ്ട് പുറത്തിറങ്ങിയ ഡ്രൈവറോടും കൈ ചൂണ്ടി ചൂടായി സംസാരിക്കുന്നതും വീഡിയോയില്‍ കാണാം.

ഉടന്‍ തന്നെ കരഞ്ഞുകൊണ്ട് കുട്ടി അമ്മയുടെ അടുത്തേക്കോടുന്നു. ഉടന്‍ തന്നെ ആളുകള്‍ ചുറ്റും കൂടി യുവതിയെ കാറിലേക്ക് കൊണ്ടുപോകുന്നു. ചൈനീസ് സോഷ്യല്‍ മീഡിയയില്‍ ഹിറ്റായി ഓടിക്കൊണ്ടിരിക്കുകയാണ് കൊച്ചു ബാലന്റെ ഈ ധീരപ്രവൃത്തി. സംഭവത്തില്‍ അമ്മയ്ക്കും മകനും ഗുരുതരമായി പരിക്കേറ്റിട്ടില്ല. അപകടത്തിന് ഡ്രൈവര്‍ തന്നെയാണ് ഉത്തരവാദിയെന്ന് പോലീസ് കണ്ടെത്തിയതായി റിപ്പോര്‍ട്ട് ചെയ്യപ്പെട്ടിട്ടുണ്ട്.