തമിഴ് വാസ്തുവിദ്യയുടെ പ്രൗഢി; തലയെടുപ്പോടെ നില്‍ക്കുന്ന ചിദംബരം നടരാജ ക്ഷേത്രം

ധാരാളം പൗരാണിക ക്ഷേത്രങ്ങള്‍ കൊണ്ട് സമ്പന്നമായ സംസ്ഥാനമാണ് തമിഴ്‌നാട്. ചരിത്രമുറങ്ങുന്ന, അത്ഭുതങ്ങള്‍ ഒളിപ്പിച്ച ധാരാളം ക്ഷേത്രങ്ങള്‍ നമുക്ക് ഇവിടെ കാണാന്‍ സാധിക്കും. അത്തരത്തിലുള്ള ഒരു ക്ഷേത്രമാണ് ചിദംബരം നടരാജ ക്ഷേത്രം. തല്ലൈ നടരാജ ക്ഷേത്രം എന്നും ഇത് അറിയപ്പെടുന്നു. തമിഴ്നാട്ടിലെ കടലൂര്‍ ജില്ലയില്‍ സ്ഥിതി ചെയ്യുന്ന ചിദംബരം, തലസ്ഥാന നഗരമായ ചെന്നൈയില്‍ നിന്ന് 200 കിലോമീറ്റര്‍ അകലെയാണ്.

പുരാതന ക്ഷേത്രങ്ങളുടെയും ആഘോഷങ്ങളുടേയും സമ്പന്നമായ സംസ്‌കാരത്തിന്റെയും പര്യായമാണ് ഈ നഗരം. ചരിത്രപരമായ പ്രാധാന്യത്തെക്കുറിച്ച് പറയുകയാണെങ്കില്‍, ചോളരും പാണ്ഡ്യരും മറാഠരും ഒടുവില്‍ ബ്രിട്ടീഷുകാരും ഭരിച്ചിരുന്ന ഈ നഗരം ഇപ്പോള്‍ ഒരു ആത്മീയ ടൂറിസം സെന്ററാണ്.

ചിദംബരം എന്ന നഗരത്തിന്റെ ആത്മാവാണ് ഇവിടത്തെ തല്ലൈ നടരാജ ക്ഷേത്രം. പഞ്ചഭൂത ഗുണങ്ങളാല്‍ ഏറ്റവും പവിത്രമായ അഞ്ച് ക്ഷേത്രങ്ങളില്‍ ഒന്നാണ് ഈ മഹത്തായ ക്ഷേത്രം. ബൃഹത്തായ ഘടനയും വാസ്തുവിദ്യാ വിസ്മയവുമായ ഈ ക്ഷേത്രം നിങ്ങള്‍ ജീവിതത്തില്‍ ഒരിക്കലെങ്കിലും സന്ദര്‍ശിക്കേണ്ട ക്ഷേത്രമാണ്. ചിദംബരം തല്ലൈ നടരാജ ക്ഷേത്രത്തെക്കുറിച്ച് കൂടുതല്‍ അറിയാല്‍ ലേഖനം വായിക്കൂ.

ഇന്ത്യയിലെ തന്നെ ഏറ്റവും പ്രശസ്തമായ ശിവക്ഷേത്രങ്ങളില്‍ ഒന്നാണ് ചിദംബരം. സാംസ്‌കാരികമായും ചരിത്രപരമായും ഈ സ്ഥലത്തിന് കാര്യമായ പ്രാധാന്യമുണ്ട്. ക്ഷേത്രത്തിന്റെ വാസ്തുവിദ്യ, കലയും ആത്മീയതയും തമ്മിലുള്ള ബന്ധത്തെ പ്രതിനിധീകരിക്കുന്നു. ചോള രാജവംശത്തിന്റെ തലസ്ഥാനമായിരുന്നു ചിദംബരം. പത്താം നൂറ്റാണ്ടിലാണ് ഈ ക്ഷേത്രം നിര്‍മ്മിച്ചത്. ചോളന്മാര്‍ ശിവനെ നടരാജായിട്ടാണ് തങ്ങളുടെ കുലദൈവമായി കണക്കാക്കിയിരുന്നത്.

രണ്ടാം സഹസ്രാബ്ദത്തിലുടനീളം നടരാജ ക്ഷേത്രം കേടുപാടുകള്‍ക്കും നവീകരണത്തിനും വികാസത്തിനും വിധേയമായിട്ടുണ്ട്. ക്ഷേത്രത്തിലെ പ്രധാന ദേവത ശിവനാണെങ്കിലും വൈഷ്ണവം, ശാക്തേയം, മറ്റുള്ളവ എന്നിവയെല്ലാം വളരെ ബഹുമാനത്തോടുകൂടി ഇവിടെ പ്രതിനിധീകരിക്കുന്നു. ചിദംബരം ക്ഷേത്ര സമുച്ചയം ദക്ഷിണേന്ത്യയിലെ ഏറ്റവും പഴക്കമേറിയ ക്ഷേത്ര സമുച്ചയങ്ങളിലൊന്നായി കണക്കാക്കുന്നു.

ലോകത്തിന്റെ കാന്തിക ഭൂമധ്യരേഖയുടെ മധ്യഭാഗത്തായാണ് ഈ ക്ഷേത്രം സ്ഥിതി ചെയ്യുന്നത്. പാശ്ചാത്യ ശാസ്ത്രജ്ഞര്‍, നടരാജ ഭഗവാന്റെ പെരുവിരലില്‍ ലോകത്തിന്റെ കാന്തിക ഭൂമധ്യരേഖയുടെ മധ്യ പോയിന്റാണെന്ന് തെളിയിച്ചിട്ടുണ്ട്. പുരാതന തമിഴ് പണ്ഡിതനായ തിരുമൂലര്‍ അയ്യായിരം വര്‍ഷങ്ങള്‍ക്ക് മുമ്പ് ഇത് തെളിയിച്ചിട്ടുണ്ട്. അദ്ദേഹത്തിന്റെ തിരുമന്ദിരം എന്ന ഗ്രന്ഥം ലോകത്തിനാകെ ഒരു അത്ഭുതകരമായ ശാസ്ത്ര വഴികാട്ടിയാണ്.

ചിദംബരം നടരാജ ക്ഷേത്രം തില്ലൈ നടരാജ ക്ഷേത്രം എന്നും അറിയപ്പെടുന്നു. ഈ ക്ഷേത്രം ശിവനാണ് സമര്‍പ്പിച്ചിരിക്കുന്നത്. ക്ഷേത്രത്തിന് ആഴത്തിലുള്ള ഐതിഹ്യ ബന്ധമുണ്ട്. പട്ടണത്തിന്റെ പേര് തില്ലൈ എന്നായിരുന്നപ്പോഴാണ് തില്ലൈ നടരാജ ക്ഷേത്രം എന്ന പേര് വന്നത്‌. ഇപ്പോള്‍ ക്ഷേത്രം സ്ഥിതി ചെയ്യുന്ന നഗരത്തിന്റെ പേരാണ് ചിദംബരം.

'പഞ്ചഭൂത' ക്ഷേത്രങ്ങളില്‍ ചിദംബരം ആകാശത്തെ സൂചിപ്പിക്കുന്നു. കാളഹസ്തി കാറ്റിനെ സൂചിപ്പിക്കുന്നു. കാഞ്ചി ഏകാംബരേശ്വരന്‍ ഭൂമിയെ സൂചിപ്പിക്കുന്നു. ഈ 3 ക്ഷേത്രങ്ങളും 79 ഡിഗ്രി 41 മിനിറ്റ് രേഖാംശത്തില്‍ ഒരു നേര്‍രേഖയിലാണ് സ്ഥിതി ചെയ്യുന്നത്. ഇത് ഒരു അത്ഭുതകരമായ വസ്തുതയും ജ്യോതിശാസ്ത്രപരമായ ഒരു അത്ഭുതവുമാണ്.

ചിദംബരം ക്ഷേത്രം മനുഷ്യന്റെ 9 പ്രവേശന കവാടങ്ങളെ അടിസ്ഥാനമാക്കിയുള്ളതാണ്. ഇത് ശരീരത്തിന്റെ 9 പ്രവേശനങ്ങളെ അല്ലെങ്കില്‍ ദ്വാരങ്ങളെ സൂചിപ്പിക്കുന്നു. ക്ഷേത്ര മേല്‍ക്കൂര 21600 സ്വര്‍ണ്ണ ഷീറ്റുകള്‍ കൊണ്ടാണ് നിര്‍മ്മിച്ചിരിക്കുന്നത്. ഇത് ഒരു മനുഷ്യന്‍ പ്രതിദിനം എടുക്കുന്ന 21600 ശ്വാസങ്ങളെ സൂചിപ്പിക്കുന്നു.

ഇവിടെയുള്ള മണ്ഡപത്തിലെ 18 തൂണുകള്‍ 18 പുരാണങ്ങളെ പ്രതിനിധീകരിക്കുന്നു. കനകസഭ, സിറ്റിസഭ, നൃത്തസഭ, ദേവസഭ, രാജസഭ എന്നിങ്ങനെ അഞ്ച് പ്രധാന ഹാളുകള്‍ ക്ഷേത്രത്തിലുണ്ട്. പരമശിവനായി സമര്‍പ്പിച്ചിരിക്കുന്ന തല്ലൈ നടരാജ ക്ഷേത്രം ശൈവമതത്തിന്റെ അനുയായികള്‍ക്ക് വളരെയധികം പ്രാധാന്യമുള്ള ക്ഷേത്രമാണ്.

സാധാരണയായി, ശിവനെ ഒരു 'ലിംഗ' രൂപത്തിലാണ് ചിത്രീകരിച്ചിരിക്കാറ്. എന്നാല്‍ നടരാജ ക്ഷേത്രത്തില്‍ ശിവനെ നൃത്തം ചെയ്യുന്ന രൂപത്തില്‍ ചിത്രീകരിച്ചിരിക്കുന്നു. രസകരമെന്നു പറയട്ടെ, ഇവിടെ കൂടുതല്‍ ആകര്‍ഷണീയമായ കാര്യം, ശൈവ, വൈഷ്ണവ ദേവതകള്‍ക്കായി സമര്‍പ്പിച്ചിരിക്കുന്ന അപൂര്‍വ ക്ഷേത്രങ്ങളിലൊന്നാണ് ചിദംബരം ക്ഷേത്രം. ഗോവിന്ദരാജ പെരുമാളിനെയും ഇവിടെ ആരാധിക്കുന്നു.

സമ്പന്നമായ ചരിത്രത്തിന്റെ പര്യായമായ ഈ പുരാതന ക്ഷേത്രം പല്ലവര്‍, ചോളര്‍, പാണ്ഡ്യന്മാര്‍, ചേരന്മാര്‍ തുടങ്ങിയ വിവിധ രാജവംശങ്ങളുടെ ഭരണകാലത്ത് നിരവധി പുനരുദ്ധാരണങ്ങള്‍ക്ക് വിധേയമായിട്ടുണ്ട്. ക്ഷേത്രത്തിന്റെ ഇന്നത്തെ ഘടന 12-13 നൂറ്റാണ്ടിലെ ഘടനയാണ്. തീര്‍ച്ചയായും ഒരു വാസ്തുവിദ്യാ വിസ്മയമാണ് നടരാജ ക്ഷേത്രം

കൂറ്റന്‍ ക്ഷേത്രത്തിന് ഒമ്പത് കവാടങ്ങളുണ്ട്. അവയില്‍ നാലെണ്ണം ഗോപുരങ്ങളാണ്. ഇവയില്‍ വളരെ വിശിഷ്ടവും സങ്കീര്‍ണ്ണവുമായ കൊത്തുപണികളുടെ അലങ്കാരമുണ്ട്. ക്ഷേത്രത്തില്‍ വിപുലമായ അഞ്ച് മണ്ഡപങ്ങളുണ്ട്, അതില്‍ രാജസഭ അല്ലെങ്കില്‍ 1000 തൂണുകളുള്ള ഹാള്‍ ക്ഷേത്രത്തിന്റെ ഏറ്റവും മനോഹരമായ സവിശേഷതകളില്‍ ഒന്നാണ്. തമിഴില്‍, ഗോപുര ദര്‍ശനം കോടി പുണ്യം എന്നൊരു പ്രസിദ്ധമായ ചൊല്ലുണ്ട്. ഒരു ക്ഷേത്ര ഗോപുരം കണ്ടാല്‍ ഒരു കോടി പുണ്യ പ്രവര്‍ത്തനങ്ങള്‍ ചെയ്യുന്നയത്രയും വിലയുണ്ട്.