അമ്പരപ്പിക്കുന്ന സംസ്‌കാരവും വിശ്വാസങ്ങളും; ഇന്ത്യയിലെ ഏറ്റവും നിഗൂഢമായ ക്ഷേത്രങ്ങള്‍

പുരാതന ക്ഷേത്രങ്ങള്‍ക്ക് പേരുകേട്ട സ്ഥലമാണ് ഇന്ത്യ. സംസ്‌കാരത്തിനോ വിശ്വാസത്തിനോ ആയി പേരുകേട്ട ചെറുതും വലുതുമായ എണ്ണമറ്റ ക്ഷേത്രങ്ങള്‍ രാജ്യത്തുണ്ട്. ഇന്ത്യാ രാജ്യത്തുടനീളം നിങ്ങള്‍ക്ക് വിവിധ ദേവതകളുടെയും സംസ്‌കാരത്തിന്റെയും വിശ്വാസങ്ങളുടെയും പേരിലുള്ള ക്ഷേത്രങ്ങള്‍ കാണാന്‍ കഴിയും. ആയിരക്കണക്കിന് വര്‍ഷം പഴക്കമുള്ള നിരവധി നിഗൂഢമായ ക്ഷേത്രങ്ങള്‍ ഇന്ത്യയില്‍ ഉണ്ട്. നിഗൂഢമായ കാരണങ്ങളാല്‍ പ്രശസ്തമായ അത്തരം ചില ക്ഷേത്രങ്ങളെക്കുറിച്ചാണ് ഇന്ന് ഞങ്ങള്‍ നിങ്ങളോട് പറയാന്‍ പോകുന്നത്.

കൊടുങ്ങല്ലൂര്‍ ഭഗവതി ക്ഷേത്രം

കേരളത്തിലെ തൃശൂര്‍ ജില്ലയില്‍ സ്ഥിതി ചെയ്യുന്ന അതിപുരാതനമായ ഒരു ക്ഷേത്രമാണ് കൊടുങ്ങല്ലൂര്‍ ദേവീക്ഷേത്രം. ദക്ഷിണേന്ത്യയില്‍ ധാരാളം ക്ഷേത്രങ്ങള്‍ ഉണ്ടെങ്കിലും ഈ ക്ഷേത്രം ഏറ്റവും അത്ഭുതകരമാണ്. കൊടുങ്ങല്ലൂര്‍ ദേവീ ക്ഷേത്രം ശ്രീ കൂറുംബ ഭഗവതി ക്ഷേത്രം എന്നും അറിയപ്പെടുന്നു. ഈ ക്ഷേത്രത്തില്‍ ഭദ്രകാളി ദേവിയെ ആരാധിക്കുന്നു. ഇവിടെ വരുന്നവര്‍ ദേവിയെ കൂറുമ്പ അല്ലെങ്കില്‍ കൊടുങ്ങല്ലൂരമ്മ എന്നാണ് വിളിക്കുന്നത്. ഇവിടെ നടക്കുന്ന ആരാധനകളും ആചാരങ്ങളും ദേവിയുടെ നിര്‍ദ്ദേശപ്രകാരം മാത്രമാണെന്നാണ് വിശ്വാസം.

ലേപാക്ഷി ക്ഷേത്രം, ആന്ധ്രാപ്രദേശ്

ആന്ധ്രാപ്രദേശിലെ അനന്തപൂര്‍ ജില്ലയില്‍ ലേപാക്ഷി എന്ന പേരില്‍ ഒരു ശിവക്ഷേത്രമുണ്ട്. ഈ ക്ഷേത്രം ലോകമെമ്പാടും പ്രശസ്തമായത് ഇവിടെയുള്ള തൂണിന്റെ പേരിലാണ്. ഈ ക്ഷേത്രത്തില്‍ 70 തൂണുകള്‍ ഉണ്ട്. അതില്‍ ഒരു തൂണ് മുഴുവന്‍ ഭാരവും താങ്ങി വായുവിലാണ് നില്‍ക്കുന്നത്. ക്ഷേത്രത്തില്‍ നിലംതൊടാതെ നില്‍ക്കുന്ന ഈ തൂണാണ് ആകാശസ്തംഭമായി കണക്കാക്കപ്പെടുന്നത്. ഈ സ്തംഭം നിലത്തു നിന്ന് ഏകദേശം അര ഇഞ്ച് ഉയരത്തിലാണ് ഉള്ളത്. വായുവില്‍ തൂങ്ങിക്കിടക്കുന്ന ഈ തൂണിന്റെ അടിയിലൂടെ ഒരു തുണി വിരിച്ച് പുറത്തെടുത്താല്‍, ആ വ്യക്തിയുടെ വീട്ടില്‍ സന്തോഷവും ഐശ്വര്യവും എപ്പോഴും വസിക്കുമെന്ന് ഒരു വിശ്വാസമുണ്ട്.

കര്‍ണി മാതാ ക്ഷേത്രം, ബിക്കാനീര്‍

രാജസ്ഥാനിലെ ബിക്കാനീറിലെ കര്‍ണി മാതാ ക്ഷേത്രം വിനോദസഞ്ചാരികള്‍ക്കിടയില്‍ വളരെ പ്രസിദ്ധമാണ്. ഈ ക്ഷേത്രം കര്‍ണി മാതാവിന് സമര്‍പ്പിച്ചിരിക്കുന്നു. ജനങ്ങളെ സംരക്ഷിക്കുന്ന ദുര്‍ഗ്ഗാദേവിയുടെ അവതാരമാണ് കര്‍ണി മാതാവെന്നാണ് ഇവിടെ താമസിക്കുന്നവര്‍ വിശ്വസിക്കുന്നത്. ചരണ്‍ ജാതിയില്‍പ്പെട്ട ഒരു യോദ്ധാവായിരുന്നു കര്‍ണി മാത. കര്‍ണി മാതക്ക് സമര്‍പ്പിക്കപ്പെട്ട നിരവധി ക്ഷേത്രങ്ങള്‍ ഉണ്ടെങ്കിലും, ബിക്കാനീറില്‍ നിന്ന് 30 കിലോമീറ്റര്‍ അകലെ ദേഷ്നോക്ക് പട്ടണത്തില്‍ സ്ഥിതി ചെയ്യുന്ന ഈ ക്ഷേത്രമാണ് ഏറ്റവും പ്രസിദ്ധം. ബിക്കാനീറിലെ കര്‍ണി മാതാ ക്ഷേത്രം 25,000-ലധികം എലികളുടെ ആവാസ കേന്ദ്രമാണ്. അവ പലപ്പോഴും ഇവിടെ വിഹരിക്കുന്നത് കാണാം. അതുകൊണ്ടാണ് ഇന്ത്യയുടെ വിവിധ കോണുകളില്‍ നിന്നും വിദേശത്തുനിന്നും ആളുകള്‍ ഈ അത്ഭുതകരമായ കാഴ്ച കാണാന്‍ എത്തുന്നത്.

സ്തംഭേശ്വര മഹാദേവ ക്ഷേത്രം, ഗുജറാത്ത്

ഗുജറാത്തിന്റെ തലസ്ഥാനമായ ഗാന്ധിനഗറില്‍ നിന്ന് 175 കിലോമീറ്റര്‍ അകലെ ജംബുസാറിലെ കവി കംബോയ് ഗ്രാമത്തിലാണ് സ്തംഭേശ്വര മഹാദേവ ക്ഷേത്രം സ്ഥിതി ചെയ്യുന്നത്. അറബിക്കടലാലും ഖംഭട്ട് ഉള്‍ക്കടലാലും ചുറ്റപ്പെട്ട ഈ ക്ഷേത്രത്തിന് 150 വര്‍ഷം പഴക്കമുണ്ട്. ഈ ക്ഷേത്രത്തിന്റെ മഹത്വം കാണണമെങ്കില്‍ രാവിലെ മുതല്‍ രാത്രി വരെ ഇവിടെ തങ്ങേണ്ടി വരും. ഇന്ത്യയിലെ അവിശ്വസനീയവും നിഗൂഢവുമായ ക്ഷേത്രങ്ങളില്‍ ഒന്നാണ് ഈ ക്ഷേത്രം. പകല്‍ സമയങ്ങളില്‍ ഈ ക്ഷേത്രം പൂര്‍ണ്ണമായും അപ്രത്യക്ഷമാകുമെന്ന് പറയപ്പെടുന്നു. അപ്രത്യക്ഷമായതിന് ശേഷം ഈ ക്ഷേത്രത്തിന്റെ ഒരു ഭാഗം പോലും കാണാനാകില്ല. വേലിയേറ്റ സമയത്ത് ഇത് ദിവസവും വെള്ളത്തില്‍ മുങ്ങുന്നു. വെള്ളം നീക്കിയ ശേഷം വീണ്ടും ഭക്തര്‍ക്കായി ക്ഷേത്രം തുറന്നുകൊടുക്കും. ശിവന്റെ പുത്രനായ കാര്‍ത്തികേയനാണ് ഈ ക്ഷേത്രം പണികഴിപ്പിച്ചതെന്നാണ് വിശ്വാസം.

കാമാഖ്യ ദേവി ക്ഷേത്രം, ഗുവാഹത്തി

കാമാഖ്യ ദേവി ക്ഷേത്രം ഇന്ത്യയിലെമ്പാടും പ്രസിദ്ധമാണ്. 52 ശക്തിപീഠങ്ങളില്‍ ഒന്നാണ് ഈ ക്ഷേത്രം. അഘോരികളുടെയും താന്ത്രികരുടെയും ശക്തികേന്ദ്രമായാണ് ഇന്ത്യയിലെ ജനങ്ങള്‍ ഇതിനെ കണക്കാക്കുന്നത്. അസമിന്റെ തലസ്ഥാനമായ ദിസ്പൂരില്‍ നിന്ന് ഏകദേശം 10 കിലോമീറ്റര്‍ അകലെ നിലഞ്ചല്‍ പര്‍വതത്തിലാണ് ഇത് സ്ഥിതി ചെയ്യുന്നത്. ഇവിടെ മാതൃദേവതയുടെ വിഗ്രഹമോ ചിത്രമോ ഇല്ല എന്നതാണ് ക്ഷേത്രത്തിന്റെ പ്രത്യേകത. പകരം ഇവിടെ ഒരു കുളമുണ്ട്, അത് എല്ലായ്‌പ്പോഴും പൂക്കളാല്‍ മൂടപ്പെട്ടിരിക്കുന്നു. ഈ ക്ഷേത്രത്തില്‍ ദേവിയുടെ യോനിയാണ് ആരാധിക്കുന്നത്. പുരാണങ്ങള്‍ അനുസരിച്ച്, മഹാവിഷ്ണു തന്റെ ചക്രം ഉപയോഗിച്ച് സതിയെ 51 ഭാഗങ്ങളായി വിഭജിച്ചു. ഈ ഭാഗങ്ങള്‍ വീണ സ്ഥലമെല്ലാം ഒരു ശക്തിപീഠം രൂപപ്പെട്ടു എന്നാണ് വിശ്വാസം.

അസീര്‍ഗഡ് കോട്ടയില്‍ സ്ഥിതി ചെയ്യുന്ന ശിവക്ഷേത്രം

മധ്യപ്രദേശിലെ ബുര്‍ഹാന്‍പൂര്‍ ജില്ലയിലെ അസിര്‍ഗഡിലാണ് ഈ ശിവക്ഷേത്രം സ്ഥിതി ചെയ്യുന്നത്. അസീര്‍ഗഡ് കോട്ടയില്‍ സ്ഥിതി ചെയ്യുന്ന ശിവക്ഷേത്രത്തിന്റെ പ്രാചീന മഹത്വം പല മതഗ്രന്ഥങ്ങളിലും കാണാം. ഇത് മാത്രമല്ല, ഈ പുരാതന ശിവക്ഷേത്രത്തില്‍ സാന്നിദ്ധ്യമുള്ള ഭോലേനാഥിനെ ദര്‍ശിക്കുന്നതിനായി വിദൂരദിക്കുകളില്‍ നിന്നുള്ള ഭക്തര്‍ അസിര്‍ഗഡ് കോട്ടയിലെത്തുന്നു. എല്ലാ ദിവസവും വൈകുന്നേരം ക്ഷേത്രം അടച്ചിട്ടുണ്ടെങ്കിലും, രാവിലെ ക്ഷേത്രത്തിന്റെ വാതില്‍ തുറക്കുമ്പോള്‍, ശിവലിംഗത്തില്‍ പൂക്കളും ചന്ദനവും തെളിയുന്നു എന്നതാണ് ഈ ക്ഷേത്രത്തിന്റെ വലിയ രഹസ്യം. ക്ഷേത്രത്തിന്റെ വാതിലുകള്‍ രാത്രി അടച്ചിട്ടുണ്ടെങ്കിലും പുലര്‍ച്ചെ വാതിലുകള്‍ തുറന്നയുടന്‍ ശിവലിംഗത്തില്‍ ചാര്‍ത്താന്‍ പൂക്കളും ചന്ദനവും എവിടെ നിന്നാണ് വരുന്നതെന്നത് ഒരു രഹസ്യമാണ്.