Budget 2024: ഇടത്തരക്കാര്‍ക്ക് സന്തോഷം തരുന്ന ബജറ്റോ? എന്തിനൊക്കെ വില കുറയും

മൂന്നാം എന്‍ഡിഎ സര്‍ക്കാരിന്റെ ആദ്യ ബജറ്റിലെ പ്രഖ്യാപനങ്ങള്‍ സന്തോഷം നല്‍കുന്നതാണോ പേടിക്കേണ്ടതാണോ എന്നുള്ള വിലയിരുത്തലുകള്‍ വന്നുകൊണ്ടിരിക്കുകയാണ്. ബജറ്റില്‍ സാധാരണക്കാര്‍ ഉറ്റുനോക്കുന്ന ഒരു പ്രധാനകാര്യം വരുംദിനങ്ങളില്‍ എന്തൊക്കെ സാധനങ്ങള്‍ക്ക് വില കൂടുമെന്നും എന്തിനൊക്കെ വില കുറയുമെന്നതുമാണ്. കാരണം സാധാരണക്കാരുടെ സാമ്പത്തികസ്ഥിതി നിര്‍ണ്ണയിക്കുന്ന ഒരു പ്രധാനഘടകമാണ് അടിസ്ഥാന സാധനങ്ങളുടെയും സേവനങ്ങളുടെയും വില നിലവാരം.

ധനമന്ത്രി നിര്‍മ്മല സീതാരാമന്‍ അവതരിപ്പിച്ച ഇന്നത്തെ ബജറ്റില്‍ എന്തൊക്കെ സാധനങ്ങള്‍ക്ക് വില കൂടുമെന്നും എന്തിനൊക്കെ വില കുറയുമെന്നും നോക്കാം.

കാന്‍സര്‍ രോഗികള്‍ക്ക് ആശ്വാസമാകും

കാന്‍സര്‍ ചികിത്സയ്ക്ക് ഉപയോഗിക്കുന്ന മൂന്ന് മരുന്നുകളെകസ്റ്റംസ് തീരുവയില്‍ നിന്നും ഒഴിവാ്ക്കാന്‍ ധനമന്ത്രാലയം തീരുമാനിച്ചിട്ടുണ്ട്. ഇത് രാജ്യത്ത് കാന്‍സര്‍ ചികിത്സയ്ക്കുള്ള ചിലവ് കുറയാന്‍ സഹായകരമാകും. അതുപോലെ എക്‌സ്‌റേ യന്ത്രങ്ങളില്‍ ഉപയോഗിക്കുന്ന എക്‌സ്‌റേ ട്യൂബുകള്‍, ഫ്‌ളാറ്റ് പാനല്‍ ഡിറ്റക്റ്ററുകള്‍ എന്നിവയ്ക്കുള്ള ബിസിഡിയില്‍ (അടിസ്ഥാന കസ്റ്റംസ് തീരുവ) മാറ്റം വരുത്തുമെന്നും ബജറ്റില്‍ പ്രഖ്യാപിച്ചിട്ടുണ്ട്. എക്‌സ്‌റേ യന്ത്രങ്ങളുടെ പ്രാദേശികമായ നിര്‍മ്മാണം പ്രോത്സാഹിപ്പിക്കുയെന്ന ഉദ്ദേശ്യത്തോടെയുള്ള നടപടിയാണിത്.

രാജ്യത്തെ ആതുരചികിത്സാരംഗത്തെ സാധാരണക്കാര്‍ക്ക് താങ്ങാവുന്നതും എത്തിപ്പെടാനാകുന്നതുമായ നിലയിലേക്ക് വളര്‍ത്തുകയെന്ന ലക്ഷ്യത്തോടെയുള്ള പ്രഖ്യാപനങ്ങളാണ് ഇവ രണ്ടും.

സ്വര്‍ണ്ണം, വെള്ളി വില കുറയും

ഇറക്കുമതി ചെയ്യുന്ന സ്വര്‍ണ്ണം, വെള്ളി എന്നിവയുടെ കസ്റ്റംസ് തീരുവ വെട്ടിക്കുറയ്ക്കാനും സര്‍ക്കാര്‍ തീരുമാനിച്ചിട്ടുണ്ട്. സ്വര്‍ണ്ണത്തിന്റെയും വെള്ളിയുടെയും കസ്റ്റംസ് തീരുവ ആറുശതമാനമാക്കിയാണ് കുറച്ചിരിക്കുന്നത്. നിലവില്‍ സ്വര്‍ണ്ണത്തിനുള്ള ഡിമാന്‍ഡില്‍ രണ്ടാംസ്ഥാനത്തുള്ള ഇന്ത്യയില്‍ ഇതോടെ സ്വര്‍ണ്ണത്തിനുള്ള ഡിമാന്‍ഡ് ഇനിയും കൂടുമെന്നാണ് കരുതുന്നത്. അതുപോലെ സ്വര്‍ണ്ണക്കടത്ത് കുറയ്ക്കാനും ഈ പ്രഖ്യാപനം സഹായിച്ചേക്കും.

മൊബൈല്‍ ഫോണിന് വില കുറയും

മൊബൈല്‍ ഫോണുകളുടെയും ചാര്‍ജറുകളുടെയും കസ്റ്റംസ് തീരുവ വെട്ടിക്കുറയ്ക്കാനും സര്‍ക്കാര്‍ തീരുമാനിച്ചിട്ടുണ്ട്. ഇത് റീറ്റെയ്ല്‍ വിപണിയില്‍ മൊബൈല്‍ ഫോണുകളുടെ വില കുറയാന്‍ കാരണമാകും.