ചില മരണ ചിന്തകള്‍

Insync

oi-Saritha

By Veena

Updated: Monday, July 9, 2012, 5:26 [IST]

ജനിച്ചാല്‍ മരണവും നിശ്ചയം. മരണം അടുത്തെത്തിയെന്ന് അറിയുന്നവരും അറിയാതെ പോകുന്നവരുമുണ്ടാകും. മരണം അടുത്തെത്തിയെന്ന് അറിയാതെ പോകുന്നവര്‍ അവസാനം വരെ ഇതെക്കുറിച്ചു പ്രത്യേക ചിന്തകളില്ലാതെ ജീവിക്കും. എന്നാല്‍ മരണം അടുത്തെത്തിയെന്നുള്ളവരെ വ്യാകുലപ്പെടുത്തുന്ന ചില ചിന്തകളുണ്ടത്രെ. ചില നഷ്ടബോധങ്ങള്‍.

സ്വന്തം ഇഷ്ടങ്ങള്‍ക്കുനുസരിച്ച് ജീവിക്കാനായില്ലെന്നത് പലരെയും അലട്ടുന്ന ചിന്തയായിരിക്കും. സമൂഹത്തിന്റെ കെട്ടുപാടുകളില്‍ പെട്ട് അത്തരം നിയമങ്ങള്‍ക്ക് വിധേയമായി ജീവിച്ചവര്‍ക്ക് പലപ്പോഴും സ്വന്തം ആഗ്രഹങ്ങളെ മറന്നു ജീവിക്കേണ്ടി വന്നിരിക്കും. സ്വന്തം ഇഷ്ടത്തിനനുസരിച്ച് ജീവിതം ജീവിച്ചില്ലെന്നത് നഷ്ടബോധം തന്നെയാണ്.

ജീവിതം കെട്ടിപ്പടുക്കാനുള്ള ശ്രമത്തിലും അധ്വാനത്തിലും ജീവിക്കാന്‍ മറന്നവരുണ്ട്. കുടുംബത്തിനു വേണ്ടിയും മറ്റുള്ളവരുടെ ഭാവി കണക്കാക്കിയും ജീവിച്ചവര്‍. ഇത്തരക്കാര്‍ക്ക് മരണമടുത്തെത്തിയെന്നറിയുമ്പോള്‍ ജീവിക്കാന്‍ മറന്നുപോയതോര്‍ത്ത് നഷ്ടബോധമുണ്ടായേക്കാം.

പല സന്ദര്‍ഭങ്ങളിലും സ്വന്തം അഭിപ്രായങ്ങള്‍ തുറന്നു പറയാന്‍ മടിച്ചവരുണ്ടാകാം. മറ്റുള്ളവരെ അലോസരപ്പെടുത്തരുത്, അവരുടമായുള്ള ബന്ധത്തില്‍ പ്രശ്‌നങ്ങളുണ്ടാക്കരുത് എന്നുള്ളവര്‍. ഇത് താന്‍ ഭീരുവായിരുന്നു, സത്യം പറയാന്‍ മടി കാണിച്ചു തുടങ്ങിയ ചിന്തകളുണ്ടാക്കാം.

തിരക്കില്‍ ബന്ധുക്കളെയും സൗഹൃദയങ്ങളേയും മനപൂര്‍വം അവഗണിച്ചവരും മറന്നു കളഞ്ഞവരുമുണ്ടാകാം. ഇത്തരം കാര്യങ്ങള്‍ മരണനേരത്ത് ആരേയും നഷ്ടബോധത്തിലാക്കും. ബന്ധങ്ങളുടേയും സൗഹൃദങ്ങളുടേയും വില അവസാന നിമിഷങ്ങളില്‍ മാത്രം മനസിലാക്കുന്നവരുമുണ്ട്.

ഒരു ജീവിതം മുഴുവന്‍ സന്തോഷിക്കാന്‍ മറന്നു പോയവരുണ്ട്. അവനവനെ സന്തോഷിപ്പിക്കാന്‍ ശ്രമിക്കാത്തവര്‍, സാഹചര്യം ലഭിക്കാത്തവര്‍. ഇത്തരക്കാര്‍ക്കും മരണത്തോടടുത്ത് നഷ്ടബോധം തോന്നും.