വന്ധ്യംകരണം: 25കാരിയ്ക്ക് നാനോ കാര്‍!

Insync

oi-Siji

By Lakshmi

Published: Wednesday, November 16, 2011, 11:23 [IST]

ജയ്പൂര്‍: വന്ധ്യംകരണശസ്ത്രക്രിയയ്ക്ക് വിധേയയായ ഇരുപത്തിയഞ്ചുകാരിയ്ക്ക് നറുക്കെടുപ്പിലൂടെ നാനോകാര്‍ സമ്മാനമായി ലഭിച്ചു. രണ്ടുകുട്ടികള്‍ ജനിച്ചതിനുശേഷമാണ് സുനിത വൈഷ്ണവ് എന്ന യുവതി വന്ധ്യംകരണം നടത്തിയത്.

രാജസ്ഥാനിലെ പാലി ജില്ലയിലെ സജോത് ബ്ലോക്കിലെ താമസക്കാരിയാണ് സുനിത. കര്‍ഷകനായ കണ്ണയ്യ വൈഷ്ണവ് ആണ് സുനിതയുടെ ഭര്‍ത്താവ്.

ഒരു കുടുംബത്തില്‍ രണ്ടു കുട്ടികള്‍ മതിയെന്നും കൂടുതല്‍ കുട്ടികളാകുമ്പോള്‍ അവര്‍ക്ക് മെച്ചപ്പെട്ട സൗകര്യങ്ങള്‍ നല്‍കാന്‍ കഴിയില്ലെന്നും അതിനാലാണ് താന്‍ വന്ധ്യംകരണം നടത്തിയതെന്നും സുനിത പറയുന്നു.

എപ്പോഴും ചെറിയ കുടുംബമാണ് നല്ലത്. ഞാന്‍ ആറ് കുട്ടികളുള്ള കുടുംബത്തിലെ അംഗമാണ്. എന്റെ ഭര്‍ത്താവിന് കൃഷിപ്പണിയാണ് ഇതിലെ ലാഭമാണെങ്കില്‍ കാലാവസ്ഥയെ ആശ്രയിച്ചാണിരിക്കുന്നത്. അതുകൊണ്ടുതന്നെ സാമ്പത്തിക ബുദ്ധിമുട്ട് ഇടക്കിടെയുണ്ടാകും. കൂടുതല്‍ കുട്ടികളുണ്ടായാല്‍ അവരെ വളര്‍ത്താനും ബുദ്ധിമുട്ടാകും- സുനിത പറയുന്നു.

വന്ധ്യംകരിണത്തിന് വിധേയരായ 3,003 സ്ത്രീകളുടെയും പുരുഷന്മാരുടെയും പേര് നറുക്കിട്ടപ്പോഴാണ് സുനിതയ്ക്ക്് കാര്‍ സമ്മാനം ലഭിച്ചത്. ഏപ്രില്‍ 1മുതല്‍ നവംബര്‍ 14വരെ വന്ധ്യംകരണം നടത്തിയവരാണ് ഇതില്‍ ഉല്‍പ്പെട്ടത്. നവംബര്‍ 30നാണ് ഈ കാര്‍ സുനിതയ്ക്ക് ലഭിയ്ക്കുക.