ഈ പെണ്ണുങ്ങളുടെ ഒരു കാര്യം

ഓരോ സ്ത്രീയുടെയും അലമാരയില്‍ ഉപയോഗിക്കാത്ത 22 വസ്ത്രങ്ങളെങ്കിലുമുണ്ടാകുമെന്നാണ് കണക്ക്. ഇതില്‍ ചിലത് വാങ്ങിയശേഷം ഒരു തവണപോലും ഉപയോഗിക്കാത്തവയായിരിക്കാനും സാധ്യതയുണ്ട്്. കാര്യമിങ്ങനെയാണെങ്കിലും അലമാരയില്‍ നിന്നും ഇവ എടുത്ത് ഒഴിവാക്കാന്‍ സ്ത്രീകള്‍ ഒരുക്കവുമല്ല.
ആവശ്യമില്ലാത്തതാണെങ്കിലും അത് സൂക്ഷിച്ചുവച്ചിരിക്കുമെന്ന് സാരം.

ബ്രിട്ടനില്‍ സ്ത്രീകള്‍ ലക്ഷക്കണക്കിന് രൂപയാണ് പ്രതിവര്‍ഷം വസ്ത്രങ്ങള്‍ വാങ്ങാന്‍ ചെലവാക്കുന്നത്. ബ്രിട്ടനില്‍ നടത്തിയ ഒരു സര്‍വ്വേയിലാണ് സ്ത്രീകളുടെ ഷോപ്പിങ് ഭ്രമവും വസ്ത്രങ്ങളുടെ ഉപയോഗവും സംബന്ധിച്ച രസകരമായ കാര്യങ്ങള്‍ കണ്ടെത്തിയത്.

എട്ടു സ്ത്രീകളില്‍ ഒരാള്‍ എന്ന നിലയില്‍ സ്ഥിരമായി കൃത്യമായ ഇടവേളകളില്‍ തങ്ങളുടെ വാഡ്‌റോബുകള്‍ വൃത്തിയാക്കുന്നവരാണ്. അതേസമയം അമ്പതില്‍ ഒരാള്‍ എന്ന നിലയില്‍ പത്തുവര്‍ഷത്തിലൊരിക്കല്‍ പോലും സ്വന്തം വസ്ത്രങ്ങളും മറ്റും സൂക്ഷിക്കുന്ന സ്ഥലം വൃത്തിയാക്കാത്തവരുമാണ്.

സര്‍വ്വേയില്‍ പങ്കെടുത്തവരെല്ലാം പൊതുവേ വാങ്ങിവച്ചിട്ടും ഒരുതവണപോലും ഉപയോഗിക്കാത്ത വസ്ത്രം ജീന്‍സ് ആണത്രേ. ഇവരുടെ എല്ലാവരുടെയും വസ്ത്രശേഖരത്തില്‍ ഇതുവരെ ഒരുതവണയെങ്കിലും ഉപയോഗിക്കാത്ത ഒരു ജീന്‍സുമുണ്ട്.

അഞ്ചുപേരില്‍ ഒരാള്‍ക്ക് എന്ന രീതിയില്‍ ഇതേവരെ ധരിക്കാത്ത ആറ് ജോഡി ഷൂസുകളാണുള്ളത്. ഇവരില്‍ കൂടുതല്‍പ്പേരും ഇത്തരത്തില്‍ വസ്ത്രങ്ങളും മറ്റും ഉപയോഗിക്കാതിരിക്കുകയും അവ വാങ്ങിക്കൂട്ടി കാശ് കളയുകയും ചെയ്യുന്നതില്‍ കുറ്റബോധം തോന്നുന്നവരുമാണെന്നതാണ് മറ്റൊരു രസകരമായ കാര്യം.

ചിലരെല്ലാം വസ്ത്രങ്ങള്‍ ഉപേക്ഷിക്കാതെ സൂക്ഷിച്ച് വയ്ക്കുന്നത് അതേ ഫാഷന്‍ തിരിച്ചുവരുമെന്ന പ്രതീക്ഷയിലാണ്. അപ്പോള്‍ ഇവയെല്ലാം ധരിക്കാമെന്നാണ് ഇത്തരക്കാരുടെ കണക്കുകൂട്ടല്‍.

പുരുഷന്മാരും ഇങ്ങനെ വസ്ത്രങ്ങള്‍ ഉപയോഗിക്കാതെ പണം പാഴാക്കിക്കളയുന്നകാര്യത്തില്‍ അത്ര പുറകിലല്ലെന്നാണ് സര്‍വ്വേ റിപ്പോര്‍ട്ട് നല്‍കുന്ന സൂചന.

പുരുഷന്മാരുടെ അലമാരയില്‍ ഒരു വട്ടം പോലും ഉപയോഗിക്കാത്ത 19 വസ്ത്രങ്ങളെങ്കിലുമുണ്ടെന്നാണ് സര്‍വ്വേയില്‍ കിട്ടിയ വിവരം. ഷോപ്പിങ് ചാനലായ ക്യുവിസിയാണ് ഈ രസകരമായ വിവരങ്ങള്‍ വെളിപ്പെടുത്തിയ സര്‍വ്വേ നടത്തിയത്.