ലേഡീസ് കോച്ചില്‍ പുരുഷന്മാര്‍ക്ക് തല്ല്

Insync

oi-Siji KM

By Lakshmi

Published: Saturday, November 27, 2010, 15:16 [IST]

ദില്ലി: ദില്ലി മെട്രോ തീവണ്ടിയിലെ സ്ത്രീകളുടെ കംപാര്‍ട്‌മെന്റില്‍ കയറിയ പുരുഷന്മാര്‍ക്ക് മര്‍ദ്ദം. സ്ത്രീകളുടെ കംപാര്‍ട്ടുമെന്റില്‍ യാത്രചെയ്ത പുരുഷന്മാരെ പൊലീസിന്റെ സഹായത്തോടെ സ്ത്രീകള്‍ ഓടിച്ചിട്ട് തല്ലുകയായിരുന്നു.

സ്ഥിരമായി സ്ത്രീകളുടെ കംപാര്‍ട്‌മെന്റില്‍ പുരുഷന്മാര്‍ കയറി ശല്യപ്പെടുത്തുന്നുവെന്ന് പരാതി ഉണ്ടായതിനെത്തുടര്‍ന്നാണ് സ്ത്രീകളെ ഉള്‍പ്പെടുത്തി പൊലീസ് ഒരു സംഘത്തിന് രൂപം നല്‍കിയത്.

ഇവര്‍ സ്ത്രീകളുടെ കംപാര്‍ട്‌മെന്റില്‍ കയറിയ പുരുഷകേസരികളെ പിടികൂടി കണക്കിന് മര്‍ദ്ദിക്കുകയായിരുന്നു. തിരക്കുള്ള സമയത്താണത്രേ പുരുഷന്മാര്‍ ലേഡീസ് കംപാര്‍ട്‌മെന്റിലേയ്ക്ക് ഇരച്ചുകയറുക.

എന്തായാലും സ്ത്രീകളോട് കിട്ടിയതിന്റെ ബാക്കി പൊലീസിന്റെ കയ്യില്‍ നിന്നും പുരുഷന്മാര്‍ക്ക് കിട്ടിയിട്ടുണ്ട്. പരാതികള്‍ പരിഹരിക്കാനായി പൊലീസ് പുതിയൊരു സ്‌ക്വാഡിനും രൂപം നല്‍കി.

എന്തായാലും സ്ത്രീകള്‍ തലങ്ങും വിലങ്ങും മര്‍ദ്ദിക്കുന്ന ദൃശ്യങ്ങള്‍ കണ്ട പുരുഷപ്രജകളാരും ഇനി ലേഡി കംപാര്‍ട്‌മെന്റില്‍ കയറി റിസ്‌കെടുക്കാന്‍ മിനക്കെടില്ലെന്ന് പ്രതീക്ഷിക്കാം.