മകള്‍ക്കുവേണ്ടി പ്രസവിയ്ക്കാനൊരുങ്ങുന്ന അമ്മ!!

Insync

oi-Siji KM

By Lakshmi

Published: Monday, May 24, 2010, 12:57 [IST]

കുട്ടികളില്ലാത്ത മകള്‍ക്കുവേണ്ടി അമ്മ പേരകുട്ടികള്‍ക്ക് ജന്മം നല്‍കാനൊരുങ്ങുന്നു. ഗുജറാത്തിലെ രാജ്‌കോട്ട് സ്വദേശിനി ശോഭന ചാവ്ദ(47)ആണ് മകള്‍ ഭാവിക(26)യുടെ മക്കള്‍ക്ക് ജന്മം നല്‍കാനൊരുങ്ങുന്നത്.

പൂര്‍ണഗര്‍ഭിണിയായ ചാവ്ദയുടെ ഉദരത്തില്‍ മൂന്നു കുട്ടികളുണ്ടെന്ന് പരിശോധനയില്‍ വ്യക്തമായിട്ടുണ്ട്. സൂറത്തിലെ ഡോക്ടര്‍ പൂര്‍ണിക നാദ്കര്‍ണിയുടെ നിര്‍ദ്ദേശപ്രകാരമാണ് ശോഭന മകളുടെ കുട്ടികള്‍ക്ക് ജന്മം നല്‍കുന്നത്.

ആറു വര്‍ഷം മുമ്പാണ് ഇരുപത്തിയെട്ടുകാരനായ സൗരവ് കാത് വാഡിയയുമായി ഭാവികയുടെ വിവാഹം നടന്നത്. ഭാവികയ്ക്ക് കുട്ടികളുണ്ടാവില്ലെന്ന് അറിഞ്ഞുകൊണ്ടുതന്നെയാണ് സൗരവ് ഇവരെ വിവാഹം ചെയ്തത്.

ഭാവികയുടെ ശരീരത്തില്‍ ഗര്‍ഭപാത്രമില്ലെന്ന് പ്രണയത്തിലായകാലത്തുതന്നെ തനിക്കറിയാമായിരുന്നുവെന്ന് സൗരവ് പറയുന്നു. ആദ്യം ഈ ദമ്പതികള്‍ ഒരു കുഞ്ഞിനെ ദത്തെടുക്കാനായിരുന്നു ആലോചിച്ചത്. എന്നാല്‍ രണ്ടുവര്‍ഷങ്ങള്‍ക്ക് മുമ്പാണ് സറോഗസി(ഗര്‍ഭപാത്രം വാടകയ്‌ക്കെടുക്കല്‍)യെക്കുറിച്ചറിഞ്ഞത്.

ഇതിന്റെ വിശദാംശങ്ങള്‍ അന്വേഷിച്ചാണ് ഇവര്‍ ഡോക്ടര്‍ പൂര്‍ണിമയെ കാണാനെത്തിയത്. ഡോക്ടറുടെ സഹായത്തോടെ ഇവര്‍ വാടയ്ക്കായി ഗര്‍ഭപാത്രം അന്വേഷിച്ചു. പക്ഷേ ആരിലും ദമ്പതികള്‍ തൃപ്തരായില്ല.

ഇതിനിടെയാണ് മകളുടെ കുട്ടികളെ പ്രസവിക്കാമെന്ന് ശോഭന ചാവ്ദ ഇവരോട് പറഞ്ഞത്. ഇതോടെ ഡോക്ടറുടെ നിര്‍ദ്ദേശങ്ങളോട് വൈദ്യപരിശോധനയും മറ്റുകാര്യങ്ങളും പുരോഗമിയ്ക്കുകയായിരുന്നു.

ഇപ്പോള്‍ ശോഭന പൂര്‍ണ ഗര്‍ഭിണിയാണ് പ്രസവത്തിനുള്ള തിയ്യതിയും ഡോക്ടര്‍ നല്‍കിക്കഴിഞ്ഞു. ഈ കുടുംബം സന്തോഷത്തോടെ ആ സുദിനത്തിനായി കാത്തിരുന്നു.