ഇന്ത്യയില്‍ അമ്മമാര്‍ സന്തുഷ്ടരല്ല!

Insync

oi-Staff

By Lakshmi

Updated: Tuesday, May 4, 2021, 17:55 [IST]

അമ്മ ദൈവമാണെന്ന തത്വം ലോകത്തിന് സമ്മാനിച്ച ഇന്ത്യയില്‍ അമ്മമാര്‍ സന്തുഷ്ടരല്ലെന്ന് റിപ്പോര്‍ട്ട്. ശിശു അവകാശ സംഘടനായായ 'സേവ് ദ് ചില്‍ഡ്രന്‍' മാതൃദിനാഘോഷത്തോടനുബന്ധിച്ചു പുറത്തുവിട്ട റിപ്പോര്‍ട്ടിലാണ് ഇക്കാര്യം വ്യക്തമാക്കിയിരിക്കുന്നത്.

ഇടത്തരം വരുമാനമുള്ള രാജ്യങ്ങള്‍ക്കിടയില്‍ അമ്മമാരുടെ ആരോഗ്യപരിപാലന, സുരക്ഷാ കാര്യങ്ങളില്‍ ഇന്ത്യ വളരെ പിന്നിലാണെന്നു റിപ്പോര്‍ട്ട് പറയുന്നു. പരിശീലനം കിട്ടിയ ആരോഗ്യ പ്രവര്‍ത്തകരുടെ അഭാവമാണ് ഇന്ത്യയിലെ ഗ്രാമങ്ങളിലും മറ്റുമുള്ള ദുര്‍ബലമായ ആരോഗ്യ പരിരക്ഷയ്ക്ക് കാരണമെന്നും റിപ്പോര്‍ട്ട് ചൂണ്ടിക്കാട്ടുന്നു.

റിപ്പോര്‍ട്ടില്‍ 'അമ്മമാര്‍ക്കുള്ള മികച്ച സ്ഥലങ്ങള്‍' എന്ന ഭാഗത്തു പരാമര്‍ശിക്കുന്ന ഇടത്തരം രാജ്യങ്ങളുടെ 77 അംഗപട്ടികയില്‍ 73ാം സ്ഥാനത്താണ് ഇന്ത്യ. കലാപബാധിത ആഫ്രിക്കന്‍ രാജ്യങ്ങളായ കോംഗോ, കെനിയ തുടങ്ങിയ രാജ്യങ്ങള്‍ പോലും ഇന്ത്യക്കു മുന്നിലാണെന്നതാണ് കൗതുകകരം.

ക്യൂബയാണ് മാതൃസൗഹൃദ രാജ്യങ്ങളുടെ പട്ടികയില്‍ ഒന്നാമത്. ഇസ്രയേല്‍, അര്‍ജന്റീന, ബാര്‍ബഡോസ്, ദക്ഷിണ കൊറിയ, സൈപ്രസ്, ഉറുഗ്വായ്, കസാഖ്സ്ഥാന്‍, ബഹാമാസ്, മംഗോളിയ തുടങ്ങിയവയാണ് തുടര്‍ന്നുവരുന്ന സ്ഥലങ്ങള്‍

ഇന്ത്യയുടെ അയല്‍രാജ്യങ്ങളായ ചൈന പതിനെട്ടും ശ്രീലങ്ക നാല്‍പതും സ്ഥാനങ്ങളില്‍ ഇടം കണ്ടെത്തിയപ്പോള്‍ പാകിസ്താന്‍ എഴുപത്തഞ്ചാം സ്ഥാനത്തേക്കു തള്ളപ്പെട്ടു.

അവികസിത രാജ്യങ്ങളുടെ പട്ടികയില്‍ ബംഗ്ലാദേശ് പതിനാലാം സ്ഥാനത്തുണ്ട്. 166 രാജ്യങ്ങളില്‍ നടത്തിയ പഠനത്തില്‍ സ്വീഡനാണ് ഏറ്റവും കൂടുതല്‍ സംതൃപ്തരായ അമ്മമാരുള്ള രാജ്യം, അമ്മമാര്‍ക്ക് തീരെ വിലകല്പിക്കാത്തത് അഫ്ഗാനിസ്താനിലും.