ടോപ് ലെസ്സായി അവകാശപ്രഖ്യാപനം

Insync

oi-Siji KM

By Lakshmi

Published: Tuesday, April 6, 2010, 12:17 [IST]

പോര്‍ട്ട്‌ലാന്റ് (മെയിന്‍): പൊതുസ്ഥലത്ത് പുരുഷന്മാരെപ്പോലെ മേല്‍വസ്ത്രമില്ലാതെ നടക്കാനുള്ള സ്വാതന്ത്ര്യത്തിനായി ഒരു കൂട്ടം സ്ത്രീകള്‍ മേല്‍വസ്ത്രമില്ലാതെ മാര്‍ച്ച് നടത്തി.

പോര്‍ട്ട്‌ലാന്റിലെ മെയിന്‍ ടൗണിലാണ് രണ്ടു ഡസന്‍ സ്ത്രീകള്‍ മേല്‍വസ്ത്രക്കാര്യത്തില്‍ തുല്യതയ്ക്കായി മാര്‍ച്ച് നടത്തിയത്. ടൈ മാക്‌ഡൊവല്‍ ആണ് ശനിയാഴ്ച നടന്ന മാര്‍ച്ചിന് നേതൃത്വം നല്‍കിയത്.

പുരുഷന്മാര്‍ മേല്‍വസ്ത്രമില്ലാതെ നടക്കുന്നത് പോലെതന്നെയാണ് സ്ത്രീയുടെ കാര്യവും, ഇതില്‍ അതിശയപ്പെടാനോ തറപ്പിച്ച് നോക്കാനോ ഒന്നുമില്ല- ടൈ പറഞ്ഞു.

സ്ത്രീകള്‍ ടോപ് ലെസ്സാവുന്നത് പുരുഷന്മാര്‍ ടോപ് ലെസ്സാവുന്നത് പോലെതന്നെയാണെങ്കിലും അല്ലെങ്കിലും ഈ ടോപ് ലെസ്സ് മാര്‍ച്ച് കാണാന്‍ പോര്‍ട്ട്‌ലാന്റ് നഗരത്തില്‍ അഞ്ഞൂറോളം പേരാണത്രേ തടിച്ച് കൂടിയത്. കയ്യില്‍ ക്യാമറ കരുതിയിരുന്നവരെല്ലാം ദൃശ്യങ്ങള്‍ പകര്‍ത്തി, അല്ലാത്തവര്‍ ടോപ് ലെസ്സായ തരുണീമണികളെ കണ്ടാസ്വദിച്ചു.

പോര്‍ട്‌ലാന്റില്‍ സ്ത്രീകള്‍ മേല്‍വസ്ത്രമില്ലാതെ നടക്കുന്നതിന് നിയമപരമായ വിലക്കുകളില്ല. എന്നാല്‍ ഇവിടത്തെ സമൂഹം ഇക്കാര്യത്തില്‍ യാഥാസ്ഥിതികരാണെന്നുമാത്രം. ഇതിന് മാറ്റം വരുത്തുകയായിരുന്നു ടൈയുടെ നേതൃത്വത്തിലുള്ള സ്ത്രീകളുടെ ലക്ഷ്യം, ഒപ്പും തങ്ങള്‍ക്കും ഇങ്ങനെ നടക്കാമെന്ന അവകാശപ്രഖ്യാപനവും.

എന്തായാലും സംഭവത്തില്‍ അറസ്റ്റോ കോലാഹലങ്ങളോ ഒന്നും ഉണ്ടായിട്ടില്ലെന്ന് റിപ്പോര്‍ട്ടുകള്‍ വ്യക്തമാക്കുന്നു.