സ്ത്രീപുരുഷ സമത്വത്തില്‍ ഇന്ത്യ പിന്നില്‍

Insync

oi-Staff

By Staff

Published: Thursday, November 26, 2009, 12:12 [IST]

ദില്ലി: ലോകത്ത് അതിവേഗം വളര്‍ന്നുകൊണ്ടിരിക്കുന്ന സാമ്പത്തിക ശക്തിയാണ് ഇന്ത്യയെന്ന് പറഞ്ഞ് നമ്മളോരോരുത്തരും ഊറ്റം കൊള്ളുന്നുണ്ട്.

എന്നാല്‍ സാമ്പത്തിക ശക്തിയായി വളരുമ്പോഴും ഇന്ത്യയില്‍ സ്ത്രീ പുരുഷ സമത്വം എന്ന ആശയം ഇതുവരെ കാര്യമായി നടപ്പായിട്ടില്ലെന്നാണ് പഠനങ്ങള്‍ സൂചിപ്പിക്കുന്നത്.

ലോക സാമ്പത്തിക ഫോറത്തിന്റെ ഒരു റിപ്പോര്‍ട്ടിലാണ് ഇക്കാര്യത്തില്‍ ഇന്ത്യ ഏറെ പിന്നിലാണെന്ന് വ്യക്തമാക്കുന്നത്. ഫോറത്തില്‍ പങ്കാളികളായ 134 രാജ്യങ്ങള്‍ക്കിയില്‍ 114ാം സ്ഥാനമാണ് ഇന്ത്യക്ക്.

സ്ത്രീകള്‍ക്ക് പുരുഷനൊപ്പം തന്നെ തുല്യത നല്‍കുന്ന കാര്യത്തില്‍ അയല്‍ രാജ്യങ്ങളായ ശ്രീലങ്ക, ബംഗ്ലാദേശ്, നേപ്പാള്‍ എന്നിവയേക്കാള്‍ പുറകിലാണ് ഇന്ത്യ.

ജനീവ ആസ്ഥാനമായി പ്രവര്‍ത്തിക്കുന്ന അന്താരാഷ്ട്ര സംഘടനയാണ് ലോകസാമ്പത്തിക ഫോറം. അടിസ്ഥാന സൗകര്യമേഖലയായ ആരോഗ്യ മേഖലയിലെ വിഭവങ്ങളുടെ വിതരണകാര്യത്തില്‍ പോലും ഇതാണ് ഇന്ത്യയിലെ സ്ഥിതിയെന്ന് റിപ്പോര്‍ട്ടില്‍ പറയുന്നു.

പ്രതിദിനം 300 ഇന്ത്യക്കാരികള്‍ പ്രസവസംബന്ധമായ അസുഖങ്ങളെത്തുടര്‍ന്ന് മരിക്കുന്നു. നവജാത ശിശുക്കളുടെ ലിംഗാനുപാതത്തിലും മോശമാണ് ഇന്ത്യയുടെ അവസ്ഥ.

ഇക്കാര്യത്തില്‍ ഇന്യ 131ാം സ്ഥാനത്താണ്. യുനെസ്‌കോയുടെയും മറ്റ് അന്താരാഷ്ട്ര ഏജന്‍സികളുടെയും വ്യാപക ബോധവല്‍ക്കരണമുണ്ടായിട്ടും പെണ്‍ഭ്രൂണഹത്യകളും പെണ്‍ശിശു ഹത്യകളും ഇന്ത്യയില്‍ തുടരുകയാണെന്നും റിപ്പോര്‍ട്ടില്‍ പറയുന്നു