ബുദ്ധിമതി വേണ്ട; സുന്ദരിയെ മതി

ബുദ്ധിയാണോ സൗന്ദര്യമാണോ പ്രധാന്യം? പുരുഷന്‍മാരോടാണ്‌ ചോദ്യമെങ്കില്‍ അവര്‍ക്ക്‌ വേണ്ടത്‌ സുന്ദരിമാരായ സ്‌ത്രീ പ്രജകള്‍ തന്നെ!! ബ്രിട്ടനില്‍ നടന്ന ഒരു സര്‍വെയില്‍ പങ്കെടുത്ത പുരുഷന്‍മാരില്‍ ബഹുഭൂരിപക്ഷവും ബുദ്ധിയെക്കാള്‍ സൗന്ദര്യത്തിനാണ് മുന്‍തൂക്കം നല്‌കുന്നതെന്ന കാര്യം തെളിഞ്ഞിരിയ്ക്കുന്നത്.

വണ്‍പോള്‍ ഡോട്ട്‌ കോം എന്ന പോര്‍ട്ടല്‍ നടത്തിയ സര്‍വെയില്‍ പങ്കെടുത്ത 73 ശതമാനം പുരുഷന്‍മാരും ബുദ്ധിമതികളെക്കാള്‍ സുന്ദരികളെയാണ്‌ ഇഷ്ടപ്പെടുന്നതെന്ന്‌ വെളിപ്പെടുത്തി.‌.

പെണ്‍കുട്ടി കാണാന്‍ കൊള്ളാവുന്നതാണെങ്കില്‍ അവരുടെ ബുദ്ധിപരമായ കഴിവുകള്‍ പരിഗണിയ്‌ക്കേണ്ട കാര്യമേ ഇല്ലെന്നാണ്‌ സര്‍വെയില്‍ പങ്കെടുത്ത പകുതി പുരുഷന്‍മാരും പറയുന്നത്‌. പങ്കാളിയുടെ സൗന്ദര്യം സുഹൃത്തുക്കളുടെ മുമ്പില്‍ ലേശം ഗമ കാട്ടാന്‍ ഉപകരിയ്‌ക്കുമെന്ന്‌ അവര്‍ വെളിപ്പെടുത്തുന്നു.

ഇതു മാത്രമല്ല ഇത്തിരി ബുദ്ധിയുള്ള കൂട്ടത്തിലാണ്‌ പെണ്‍കുട്ടിയെങ്കില്‍ അവള്‍ തങ്ങളെ ഭരിയ്‌ക്കുമോയെന്ന ഭയവും 80 ശതമാനം പുരുഷന്‍മാര്‍ക്കുണ്ട്‌. എന്നാല്‍ പുരുഷന്റെ സൗന്ദര്യത്തെക്കാള്‍ ബുദ്ധിയ്‌ക്കാണ്‌ പ്രാധാന്യം കൊടുക്കുന്നതെന്നാണ്‌ സര്‍വെയില്‍ പങ്കെടുത്ത മുക്കാല്‍ ശതമാനം പെണ്‍കുട്ടികളും പറഞ്ഞത്‌.

പെണ്‍കുട്ടികളില്‍ വെറും പത്ത്‌ ശതമാനം മാത്രമാണ്‌ പുരുഷ സൗന്ദര്യത്തിന്‌ പ്രാധാന്യം നല്‌കുന്നത്‌. ലൈംഗിക ജീവിതത്തില്‍ സൗന്ദര്യത്തിന്‌ പ്രധാന്യമുണ്ടെന്ന്‌ ഇക്കൂട്ടര്‍ പറയുന്നു.