തടിച്ചികള്‍ ജാഗ്രതൈ!!

ശ്രദ്ധക്കുറവ്, കഴിവില്ലായ്മ എന്നിങ്ങനെയുള്ള കാരണങ്ങളാല്‍ ജോലി നഷ്ടപ്പെടുന്നത് പുതുമയല്ല. എന്നാല്‍ തടികാരണം ജോലി നഷ്ടപ്പെടുകയെന്ന് വന്നാലോ? തടിയും ജോലിയും തമ്മിലെന്ത്‌ ബന്ധമെന്നാണ്‌ ചിന്തിക്കുന്നതെങ്കില്‍ ബന്ധമുണ്ട്‌.

എല്ലാവരുടെയും കാര്യത്തിലല്ല സ്‌ത്രീകളുടെ തടിയും ജോലിയും തമ്മിലാണ്‌ ബന്ധമുള്ളത്‌. പൊണ്ണത്തടിച്ചികളുടെ ജോലി തെറിക്കാനുള്ള സാധ്യത കൂടുതലാണെന്നാണ്‌ ഒരു പഠനത്തില്‍ കണ്ടെത്തിയിരിക്കുന്നത്‌. പൊലീസ്‌ സ്റ്റേഷനില്‍ കയറാനും മെലിഞ്ഞവരെ അപേക്ഷിച്ച്‌ സാധ്യത കൂടുതല്‍ തടിച്ചികള്‍ക്കാണത്രേ.

കണക്ടിക്യൂട്ട്‌ സര്‍വ്വകലാശാലയിലെ ഗവേഷകരാണ്‌ ഇത്തരത്തിലൊരു പഠനം നടത്തിയത്‌. തടി കൂടുതലുള്ള സ്‌ത്രീകള്‍ ജോലി സ്ഥലത്ത്‌ അപമാനിക്കപ്പെടാനുള്ള സാധ്യത കൂടുതലാണ്‌. അതിനാല്‍ത്തന്നെ അവര്‍ മാനസികമായി തകര്‍ന്ന്‌ പോകുന്നു.

മാനസികമായി തകരുന്ന ഇവര്‍ക്ക്‌ പിന്നീട്‌ കൃത്യമായി ജോലി ചെയ്യാന്‍ കഴിയുന്നില്ല.ഈ അവസ്ഥ അവരുടെ ജോലി സ്ഥിരതയ്‌ക്ക്‌ ഭീഷണിയാകുന്നു- പ്രിവന്റീവ്‌ മെഡിസിന്‍ എന്ന ജേണലില്‍ പ്രസിദ്ധീകരിച്ച റിപ്പോര്‍ട്ടില്‍ വ്യക്തമാക്കുന്നു.

അവഹേളനം, കളിയാക്കല്‍ എന്നിവ മൂലമുണ്ടാകുന്ന മാനസിക സമ്മര്‍ദ്ദം ഇവരെ കൂടുതല്‍ തടിച്ചികളാക്കുമത്രേ. മാനസിക സമ്മര്‍ദ്ദം ഇവരെ കൂടുതല്‍ ആഹാരം കഴിയ്‌ക്കാന്‍ പ്രേരിപ്പിക്കുന്നതാണ്‌ ഇതിന്‌ കാരണം. തടിച്ച പ്രകൃതമുള്ള സ്‌ത്രീകളാണ്‌ കൂടുതലായും കുറ്റകൃത്യങ്ങള്‍ക്ക്‌ ഇരകളാവുന്നതെന്നും ഗവേഷകര്‍പറയുന്നു.

ഇങ്ങനെയൊക്കെയാണെങ്കിലും തടിച്ചികളെ കെട്ടുന്ന പുരുഷന്മാര്‍ പൊതുവേ ഭാഗ്യവാന്മാരായിരിക്കുമെന്നാണ്‌ ഗവേഷകര്‍ പറയുന്നത്‌. കാരണം ഇവര്‍ പൊതുവേ വഴക്കാളികളല്ലെന്നതുതന്നെ. ഇവരില്‍ ഭൂരിഭാഗവും ഭര്‍ത്താവിനൊപ്പം കഴിയാന്‍ അങ്ങേയറ്റം ആഗ്രഹിക്കുന്നവരുമാണ്‌. ഒരു വര്‍ഷത്തോളം നീണ്ട പഠനത്തില്‍ 41,000 സ്‌ത്രീകളെയും പുരുഷന്മാരെയും ഉള്‍പ്പെടുത്തിയിരുന്നു.