ബോസ്സായി പുരുഷനെ മതിയെന്ന്‌ സ്‌ത്രീകള്‍

എന്തിനും എവിടെയും പുരുഷമേല്‍ക്കോയ്‌മയെക്കുറിച്ച്‌ സംസാരിക്കുന്നവരാണ്‌ സ്‌ത്രീകളില്‍ പലരും. എന്നാല്‍ ഇത്തരക്കാര്‍ക്ക്‌ അംഗീകരിക്കാന്‍ കഴിയാത്ത ചില ചിന്താഗതികള്‍ വച്ചുപുലര്‍ത്തുന്ന സ്‌ത്രീകളും നമ്മള്‍ക്കിടയിലുണ്ടെന്നതാണ്‌ സത്യം.

ബ്രിട്ടനില്‍ അടുത്തിടെ നടന്ന ഒരു പഠനത്തില്‍ കണ്ടെത്തിയ ചില കാര്യങ്ങള്‍ ഏതൊരു ഫെമിനിസ്റ്റിനെയും പ്രകോപിപ്പിക്കത്തക്കതാണ്‌. പഠനത്തിനായി നടത്തിയ സര്‍വ്വേയില്‍ പങ്കെടുത്ത ഭൂരിഭാഗം സ്‌ത്രീകളും തങ്ങളുടെ മേലുദ്യോഗസ്ഥരായി പുരുഷന്മാര്‍ വരണമെന്നാണത്രേ ആഗ്രഹിക്കുന്നത്‌.

പഠനത്തിനായി വിവരം ശേഖരിച്ച്‌ സ്‌ത്രീകളില്‍ 73ശതമാനത്തിനും താല്‍പര്യം പുരുഷ മേധാവിയോടാണത്രേ. 55 വയസ്സിന്‌ മുകളിലുള്ള സ്‌ത്രീകള്‍ക്കിടയിലാണെങ്കില്‍ 81ശതമാനവും മേലുദ്യോഗസ്ഥനെ ആഗ്രഹിക്കുന്നവരാണ്‌.

ടെലഗ്രാഫ്‌ പത്രത്തിന്‌ വേണ്ടി യുഗോവ്‌ ഗവേഷണ ഏജന്‍സിയാണ്‌ പഠനം നടത്തിയത്‌. പങ്കാളികളുടെ കാര്യത്തില്‍ സ്‌ത്രീകള്‍ കൂടുതല്‍ പ്രതീക്ഷ വച്ചു പുലര്‍ത്തുന്നവരാണെന്നും ഏറെ സ്‌ത്രീകളും നല്ല അസ്സല്‍ റൊമാന്റിക്‌ പങ്കാളിയെയാണ്‌ ഇഷ്ടപ്പെടുന്നതെന്നും റിപ്പോര്‍ട്ടില്‍ പറയുന്നു.

പഠനത്തില്‍ സ്‌ത്രീകളില്‍ അഞ്ചില്‍ ഒരാള്‍ എന്ന നിലയില്‍ പുകവലിക്കുന്നവരാണെന്നും പക്ഷേ മദ്യപാനത്തോട്‌ ഇവര്‍ക്ക്‌ അധികം താല്‍പര്യമില്ലെന്നും വ്യക്തമായിട്ടുണ്ട്‌. ആയിരത്തിലേറെ സ്‌ത്രീകളുമായി അഭിമുഖം നടത്തി വിവരങ്ങള്‍ ശേഖരിച്ചാണ്‌ ഇതു സംബന്ധിച്ച പഠനം നടന്നത്‌.

സ്‌ത്രീകളില്‍ പലരും അവരുടെ ശരീര സൗന്ദര്യത്തില്‍ സംതൃപ്‌തരല്ല. 25 വയസ്സിനും 29വയസ്സിനിടയിലുള്ള കാലമാണ്‌ വിവാഹത്തിന്‌ നല്ലതെന്നാണ്‌ ഭൂരിഭാഗം പേരും ചിന്തിക്കുന്നത്‌. കുട്ടികളുണ്ടാകുന്നതിന്‌ മുമ്പള്ള ദാമ്പത്യമാണ്‌ രസകരമെന്നാണ്‌ ഇവരില്‍ 51ശതമാനം പേരും അഭിപ്രായപ്പെട്ടത്‌.