സ്ത്രീകളുടെ ജോലിഭാരം കൂടാന്‍ കാരണം ഭര്‍ത്താക്കന്മാര്‍ !!

ന്യൂയോര്‍ക്: വിവാഹിതരായ സ്ത്രീകള്‍ക്ക് കൂടുതല്‍ വീട്ടുജോലികള്‍ ചെയ്യേണ്ടിവരുന്നത് ഭര്‍ത്താക്കന്മാര്‍ കാരണമാണെന്ന് പറഞ്ഞാല്‍ അത് സമ്മതിക്കാന്‍ ഒട്ടുമിക്ക ഭര്‍ത്താക്കന്മാര്‍ക്കും ബുദ്ധിമുട്ടുണ്ടാകം. പക്ഷേ ഇക്കാര്യം സത്യമാണെന്നാണ് ഗവേഷകര്‍ പറയുന്നത്.

മിഷിഗന്‍ സര്‍വകലാശാലയില്‍ നടത്തിയ ഗവേഷണത്തിലാണ് ഇക്കാര്യം കണ്ടെത്തിയത്.

ഭര്‍ത്താക്കന്മാര്‍ കാരണം തന്നെയാണ് സ്ത്രീകള്‍ക്ക് കൂടുതല്‍ വീട്ട് ജോലികള്‍ ചെയ്യേണ്ടി വരുന്നതെന്നാണ് ഇവര്‍ പറയുന്നത്.

ജീവിതത്തിലേക്ക് ഭര്‍ത്താവ് കടന്ന് വരുന്നതോടുകൂടി ആഴ്ചയില്‍ ഏഴ് മണിക്കൂറാണ് സ്ത്രീകള്‍ക്ക് അധികം ജോലി ചെയ്യേണ്ടി വരുന്നത്. എന്നാല്‍, ഭാര്യ ഭര്‍ത്താവ് വീട്ടില്‍ ചെയ്യേണ്ട ജോലിയില്‍ ഒരു മണിക്കൂറെങ്കിലും ലാഭിച്ച് കൊടുക്കുന്നതായും പഠനത്തില്‍ കണ്ടെത്തി.

പുരുഷന്മാര്‍ വീടിന് പുറത്ത് കൂടുതല്‍ ജോലി ചെയ്യുന്നു. ചില സ്ത്രീകള്‍ വീട്ടു ജോലികളില്‍ കൂടുതല്‍ സമയം ഏര്‍പ്പെടുന്നു. ഇത് സാധാരണ പിന്തുടരുന്ന മാതൃകയാണ്- സര്‍വകലാശാലയിലെ ഇന്‍സ്ടിട്യൂട്ട് ഓഫ് സോഷ്യല്‍ റിസര്‍ച്ച് ഉദ്യോഗസ്ഥന്‍ ഫ്രാങ്ക് സ്റ്റാഫോര്‍ഡ് പറഞ്ഞു.

കുട്ടികളുണ്ടാകുന്നതോടു കൂടി സ്ത്രീകളുടെ ജോലി ഭാരം ഏറുമെന്നും പഠനത്തില്‍ കണ്ടെത്തി. വരുമാനവുമായി ബന്ധപ്പെട്ട 2005ലെ രേഖകളില്‍ നിന്നാണ് ഗവേഷകര്‍ ഈ വിലയിരുത്തല്‍ നടത്തിയത്.

പാചകം, വൃത്തിയാക്കല്‍, വീട്ടിലെ മറ്റ് ജോലികള്‍ എന്നിവ ചെയ്യുന്നതില്‍ എത്ര സമയം ചെലവഴിക്കുന്നുണ്ടെന്നത് സംബന്ധിച്ച് സ്ത്രീകളില്‍ നിന്നും പുരുഷന്മാരില്‍ നിന്നും വിവരങ്ങള്‍ ശേഖരിക്കുകയും ചെയ്തു .

അവിവാഹിതകളായ സ്ത്രീകളാണ് ഏറ്റവും കുറച്ച് വീട്ട് ജോലികള്‍ ചെയ്യുന്നത്. ആഴ്ചയില്‍ 12 മണിക്കൂര്‍ മാതമേ ഇവര്‍ വീട്ട് ജോലികള്‍ ചെയ്യുന്നുള്ളൂ. വിവാഹിതരായ സ്ത്രീകള്‍ ഇതിന്‍റെ ഇരട്ടി സമയം വീട്ട് ജോലികള്‍ ചെയ്യുന്നു. അതേസമയം, മൂന്ന് കുട്ടികളില്‍ കൂടുതലുള്ള സ്ത്രീകള്‍ ആഴ്ചയില്‍ 28 മണിക്കൂര്‍ വീട്ട് ജോലികളില്‍ ഏര്‍പ്പെടുന്നതായും കണ്ടെത്തിയിട്ടുണ്ട് .