എമ്മി അവര്‍ഡ് ദക്ഷിണേന്ത്യക്കാരിയ്ക്ക്

ന്യൂയോര്‍ക്: പ്രശസ്ത ടെലിവിഷന്‍ വാര്‍ത്താ ലേഖികയും ചെന്നൈക്കാരിയുമായ സുകന്യ കൃഷ്ണന്റെ കിരീടത്തില്‍ ഒരു പൊന്‍തൂവല്‍കൂടി.

ഇതിനകം തന്നെ ഒട്ടേറെ പുരസ്കാരങ്ങള്‍ നേടിയ സുകന്യയെത്തേടി ഇത്തവണയെത്തിയിരിക്കുന്നത് ന്യൂയോര്‍ക് എമ്മി അവാര്‍ഡാണ്.

2007ലെ മികച്ച മോഡറേറ്റര്‍, അവതാരക തുടങ്ങി വിവിധ മേഖലകളിലെ മികച്ച പ്രകടനത്തിനാണ് അവാര്‍ഡ്. മുപ്പത്തിരണ്ടുകാരിയായ സുകന്യ ഒട്ടേറെ ടെലിവിഷന്‍ ചാനലുകള്‍ക്കുവേണ്ടി ജോലിചെയ്തിട്ടുണ്ട്.

ചിത്രീകരണം, എഴുത്ത്, എഡിറ്റിംഗ്, വാര്‍ത്താ ചിത്രീകരണം തുടങ്ങി ക്യാമറയ്ക്ക് മുന്നിലും പിന്നിലുമായി നിരവധി മേഖലകളില്‍ ഇവര്‍ തന്റെതായ വ്യക്തിമുദ്ര പതിപ്പിച്ചിട്ടുണ്ട്.

മുന്‍ അമേരിക്കന്‍ പ്രിസഡന്റ് ബില്‍ ിന്റണെതിരായ കോടതിനടപടികള്‍ റിപ്പോര്‍ട്ട് ചെയ്തത് സുകന്യയായിരുന്നു. ഇതുള്‍പ്പെടെ ഒട്ടേറെ പ്രസക്തമായ വാര്‍ത്തകള്‍ ദൃശ്യമാധ്യമ രംഗത്ത് സുകന്യയുടേതായി സംപ്രേഷണം ചെയ്യപ്പെട്ടിട്ടുണ്ട്.

ഇതിന് മുമ്പ് ഇന്ത്യന്‍ അമേരിക്കന്‍ പൊളിറ്റിക്കല്‍ അവേര്‍നസ് കമ്മറ്റിയുടെ ക്രിയേറ്റിംഗ് എ വോയ്സ് എന്ന പുരസ്താരവും സുകന്യ നേടിയിട്ടുണ്ട്. 2001 സെപ്റ്റംബര്‍ 11ല്‍ യുഎസിലുണ്ടായ തീവ്രവാദി ആക്രമത്തെത്തുടര്‍ന്നുണ്ടായ പ്രശ്നങ്ങള്‍ റിപ്പോര്‍ട്ട് ചെയ്തതിനും സുകന്യയ്ക്ക് അംഗീകാരം ലഭിച്ചിട്ടുണ്ട്.

സുകന്യയുടെ പ്രവര്‍ത്തനങ്ങളെ മുന്‍നിര്‍ത്തി വടക്കേ അമേരിക്കയിലെ ഫെഡറേഷന്‍ ഓഫ് തമിഴ് സംഘം 2006 ല്‍ അവരെ ആദരിച്ചിരുന്നു. ടെലിവിഷന്‍ രംഗത്തെ മികച്ച പ്രവര്‍ത്തനങ്ങല്‍ക്കായി അമേരിക്കയിലെ അക്കാദമി ഓഫ് ടെലിവിഷന്‍ ആര്‍ട്സ് ആന്റ് സയന്‍സാണ് എമ്മി അവാര്‍ഡ് നല്‍കുന്നത്.