അഭിനയമോഹം ചതിക്കുഴിയൊരുക്കുന്നു

അഭിനയമോഹം ചതിക്കുഴിയൊരുക്കുന്നു

തിരുവനന്തപുരം: ടി.വി, സിനിമാ രംഗങ്ങളില്‍ അവസരം നല്‍കാമെന്ന വാഗ്ദാനത്താല്‍ വഞ്ചിതരാകുന്ന പെണ്‍കുട്ടികളുടെ എണ്ണം കേരളത്തില്‍ വര്‍ദ്ധിക്കുന്നു.

സിനിമയില്‍ അവസരം നല്‍കാമെന്ന വാക്കു വിശ്വസിച്ച് കോടമ്പാക്കം പോലുള്ള സ്ഥലങ്ങളില്‍ വില്‍ക്കപ്പെട്ട പെണ്‍കുട്ടികളും എറെ.

സൂര്യനെല്ലി, വിതുര, മട്ടാഞ്ചേരി, കോതമംഗലം തുടങ്ങിയ പെണ്‍വാണിഭക്കേസുകളില്‍ ഭൂരിഭാഗം പെണ്‍കുട്ടികളും സിനിമാ-സീരിയല്‍ വാഗ്ദാനങ്ങളില്‍ വിശ്വസിച്ച് ഇറങ്ങിത്തിരിച്ചവരാണെന്ന് റിപ്പോര്‍ട്ടുകള്‍ സൂചിപ്പിക്കുന്നു.

പെണ്‍കുട്ടികളെ ആകര്‍ഷിക്കാന്‍ സാധിക്കുന്ന ഏറ്റവും നല്ല രംഗമാണ് അഭിനയവാഗ്ദാനമെന്ന് അറിഞ്ഞിട്ടാകണം ഇന്ന് ബസ് ഡ്രൈവര്‍മാര്‍ മുതല്‍ ഓട്ടോഡ്രൈവര്‍മാര്‍ വരെ സിനിമാസംവിധായകരാണെന്ന വേഷമണിയുന്നവരാണ്.

അടുത്തിടെ നടന്ന തിരുവാര്‍പ്പ് പീഡനക്കേസിലെ പെണ്‍കുട്ടിയെ സീരിയലില്‍ വേഷം നല്‍കാമെന്നു പ്രലോഭിപ്പിച്ച് ഒരു സംഘം ആളുകള്‍ പീഡിപ്പിക്കുകയായിരുന്നു.

കേരളത്തില്‍ സ്ത്രീപീഡനക്കേസുകള്‍ ദിനംപ്രതി വര്‍ദ്ധിച്ചു വരികയാണ്. ഐസ്ക്രീം പാര്‍ലര്‍, ബ്യൂട്ടി പാര്‍ലര്‍, മെസാജ് കേന്ദ്രങ്ങള്‍ എന്നിങ്ങനെ വിവിധരീതികളിലൂടെയാണ് സ്ത്രീപീഡനക്കഥകള്‍ അരങ്ങേറുന്നത്.

അഭിനയമോഹവുമായി നടക്കുന്ന പെണ്‍കുട്ടികളും മാതാപിതാക്കളും വ്യാജസംവിധായകരെ തിരിച്ചറിയുകയാണ് ചതിയില്‍ നിന്നു രക്ഷപ്പെടാനുള്ള പ്രധാനമാര്‍ഗം.