ശര്‍മ്മിള ടാഗോര്‍ സെന്‍സര്‍ബോര്‍ഡ് അധ്യക്ഷ

ശര്‍മ്മിള ടാഗോര്‍ സെന്‍സര്‍ബോര്‍ഡ് അധ്യക്ഷ

ദില്ലി: സെന്‍സര്‍ ബോര്‍ഡിന്റെ അധ്യക്ഷയായി ശര്‍മ്മിള ടാഗോറിനെ നിയമിച്ചു. അധ്യക്ഷപദവിയില്‍ നിന്നും നിലവിലുള്ളഅധ്യക്ഷന്‍ അനുപം ഖേറിനെ മാറ്റിക്കൊണ്ട് കേന്ദ്രവാര്‍ത്താ-വിതരണ മന്ത്രാലയം നേരത്തെ ഉത്തരവിറക്കിയിരുന്നു.

എന്നാല്‍ താന്‍ ചെയര്‍മാന്‍ പദവി രാജിവയ്ക്കില്ലെന്ന് അനുപംഖേര്‍ വ്യക്തമാക്കിയിട്ടുണ്ട്. ഇത്തരം രാഷ്ട്രീയക്കളികളില്‍ ഇനിയും എന്നെപ്പോലെയുള്ള ബലിയാടുകള്‍ ഉണ്ടായിക്കൂടാ. ഇടതുപാര്‍ട്ടികളുടെ സമ്മര്‍ദ്ദമുള്ളതിനാല്‍ ഉടനെ രാജിവയ്ക്കാന്‍ കേന്ദ്ര വാര്‍ത്താ-വിതരണ സെക്രട്ടറി നവീന്‍ ബി. ചാവ്ല എന്നോട് ആവശ്യപ്പെട്ടു. എന്നാല്‍ ഇതിന് വഴങ്ങില്ലെന്ന് ഞാന്‍ അദ്ദേഹത്തോട് പറഞ്ഞു. - അനുപം ഖേര്‍ വാര്‍ത്താലേഖകരോട് പറഞ്ഞു. പുതിയ നിയമനത്തിനെതിരെ നിയമയുദ്ധത്തിനൊരുങ്ങുകയാണ് അനുപം ഖേര്‍.

മുംബൈയില്‍ പോയി ജോലിചെയ്യാന്‍ അസൗകര്യമുള്ളതിനാല്‍ ശര്‍മ്മിള ടാഗോര്‍ ദില്ലി കേന്ദ്രമായിട്ടായിരിക്കും പ്രവര്‍ത്തിയ്ക്കുക. അനുപം ഖേറിനെ മാറ്റിയതിന് പിന്നില്‍ രാഷ്ട്രീയമൊന്നുമില്ലെന്ന് കേന്ദ്രവാര്‍ത്താവിതരണമന്ത്രാലയം വ്യക്തമാക്കിയിട്ടുണ്ട്.

ശര്‍മ്മിള ടാഗോര്‍

ചെറുപ്പത്തിലേ ബംഗാളി നാടകരംഗത്ത് തിളങ്ങിയിരുന്ന നടിയായിരുന്നു ശര്‍മ്മിള ടാഗോര്‍. പിന്നീട് ബോളിവുഡ് ലോകത്ത് സൂപ്പര്‍ താരമായി. രവീന്ദ്രനാഥ ടാഗോറിന്റെ ചെറുമകളാണ്. ക്രിക്കറ്റ് താരം മന്‍സൂര്‍ അലി പട്ടോഡിയാണ് ഭര്‍ത്താവ്.

രണ്ട് മക്കള്‍. ബോളിവുഡ് നടന്‍ സെയ്ഫ്അലി ഖാനും ഇപ്പോള്‍ ബോളിവുഡില്‍ അരങ്ങേറ്റം കുറിയ്ക്കുന്ന നടി സോഹ അലിഖാനും.