പാകിസ്ഥാനിലെ നാരായണമൂര്‍ത്തി

പാകിസ്ഥാനില്‍ ഒരു നാരായണമൂര്‍ത്തിയുണ്ട്. പക്ഷെ സ്ത്രീയാണെന്ന് മാത്രം. അവിടുത്തെ ഐടി വ്യവസായരംഗത്ത് പുതിയ തുടക്കങ്ങള്‍ക്കും മുന്നേറ്റങ്ങള്‍ക്കും നേതൃത്വം നല്കുകയാണ് ഇവര്‍. എനേബ്ളിംഗ് ടെക്നോളജീസ് എന്ന കമ്പനിയുടെ സിഇഒയും പാകിസ്ഥാന്‍ സോഫ്റ്റ്വെയര്‍ ഹൗസ് അസോസിയേഷന്‍ എന്ന സംഘടനയുടെ പ്രസിഡന്റുമായ ജെഹാന്‍ ആര ഇതിനകം ഐടി രംഗത്ത് വ്യക്തിമുദ്ര പതിപ്പിച്ചുകഴിഞ്ഞു.

ഒട്ടേറെ വര്‍ഷങ്ങള്‍ സിംഗപ്പൂരില്‍ പ്രവര്‍ത്തിച്ചിരുന്ന ആര എട്ട് വര്‍ഷം മുമ്പാണ് പാകിസ്ഥാനിലേക്ക് മടങ്ങിവന്നത്. സ്ത്രീകള്‍ക്ക് വ്യവസായം ആരംഭിയ്ക്കാന്‍ ആവില്ലെന്ന ധാരണ ജെഹാന്‍ ആര തിരുത്തി. സ്ത്രീകള്‍ അബലകളാണെന്ന കാഴ്ചപ്പാടിനെ ദൃഢനിശ്ചയത്തോടെ നേരിട്ടാല്‍ ഈ രംഗത്ത് വിജയം ഉറപ്പാണെന്നും അവര്‍ പറയുന്നു. അതിവേഗം ഐടി രംഗത്തെ പുരുഷന്മാരുടെ മേല്‍ക്കോയ്മയിലുള്ള കമ്പനികളെ ഇവര്‍ പിന്തള്ളി. വെറും എട്ടുവര്‍ഷത്തിനുള്ളില്‍ അവര്‍ക്ക് പാകിസ്ഥാന്‍ സോഫ്റ്റ്വെയര്‍ ഹൗസ് അസോസിയേഷന്റെ എക്സിക്യൂട്ടീവ് അംഗത്വപദവിയിലേക്ക് ഉയരാന്‍ കഴിഞ്ഞു. പിന്നീട് അവര്‍ പ്രസിഡന്റായി. ഇപ്പോള്‍ പാകിസ്ഥാനില്‍ കൂടുതല്‍ വനിതകള്‍ ഐടി വ്യവസായരംഗത്തേയ്ക്ക് കടന്നുവരുന്നുണ്ടെന്നും അവര്‍ പറഞ്ഞു. വിശദാംശങ്ങളില്‍ ശ്രദ്ധിയ്ക്കുന്നതില്‍ സ്ത്രീകള്‍ക്ക് പ്രത്യേക കഴിവുള്ളതിനാല്‍ ഡിസൈനിംഗ്, പ്രൊജക്ട് മാനേജ്മെന്റ് രംഗത്ത് കൂടുതല്‍ സ്ത്രീകള്‍ കടന്നുവരുന്നുണ്ട്. - ആര പറയുന്നു.

ഇപ്പോള്‍ പാകിസ്ഥാന്‍ സോഫ്റ്റ്വെയര്‍ ഹൗസ് അസോസിയേഷനില്‍ 200 കമ്പനികള്‍ അംഗങ്ങളായുണ്ട്. അടുത്ത അഞ്ച് വര്‍ഷത്തിനുള്ളില്‍ പാകിസ്ഥാന്‍ ഈ രംഗത്ത് വന്‍കുതിച്ചുചാട്ടമുണ്ടാക്കുമെന്ന് ആര വിലയിരുത്തുന്നു.