അറബിപ്പാട്ടിന്റെ ലഹരിയുമായി മഞ്ജരി

ഈയിടെ മസ്കറ്റിലെ ഗായകന്‍ യേശുദാസ് കൂടി പങ്കെടുത്ത സംഗീതപരിപാടിയില്‍ ഒരു പക്ഷെ ഗാനഗന്ധര്‍വനേക്കാള്‍ മഞ്ജരി ശ്രദ്ധേയയായി എന്ന് പറയുന്നതില്‍ തെറ്റില്ല. പ്രശസ്ത ലബനോണ്‍ ഗായിക ഡയാന ഹാദിദിന്റെ പോപ്പ് അറബിഗാനങ്ങള്‍ തനിമ ചോരാതെ മഞ്ജരി അവതരിപ്പിച്ചപ്പോള്‍ മസ്കറ്റിലെ ആംഫി തിയറ്ററിലേക്ക് അറബി യുവാക്കള്‍ ഒഴുകി.

അറബിപ്പാട്ടുകളോടുള്ള കമ്പം വെറും താല്ക്കാലികമല്ലെന്ന് മഞ്ജരി പറയുന്നു: വെറും അഞ്ച് വയസ്സുള്ളപ്പോള്‍ ഞാന്‍ അറബിപ്പാട്ടുകള്‍ പാടിത്തുടങ്ങി. ഇപ്പോള്‍ അറബിഗാനങ്ങള്‍ പുതിയ ലഹരിയാണ്. അറബി ഗാനങ്ങളോടുള്ള കമ്പം പെട്ടെന്നൊന്നും ഇല്ലാതാവാനും പോകുന്നില്ല. വിഷമകരമാണെങ്കിലും അറബിപ്പാട്ടുകള്‍ പാടുന്നത് നല്ല നേരമ്പോക്കാണ്. - മഞ്ജരി പറയുന്നു.

വാഡി കബീര്‍ സ്കൂളില്‍ നിന്നും അറബി ഭാഷയില്‍ ലഭിച്ച പ്രാവീണ്യമാണ് മഞ്ജരിയ്ക്ക് കൂട്ടായത്. ഇതു മൂലം വളരെയെളുപ്പം അറബി ഗാനങ്ങളുടെ ഉച്ചാരണവും ആലാപനശൈലിയും വശത്താക്കാന്‍ മഞ്ജരിയ്ക്ക് കഴിയുന്നു. ഒരു ഗാനം പല തവണ കേട്ട് അതിന്റെ ഉച്ചാരണവും മറ്റും വശത്താക്കുകയാണ് പതിവ്. പിന്നീട് അറബിക് ഭാഷയറിയുന്നവരോട് വാക്കുകളുടെ അര്‍ത്ഥം ചോദിച്ചുമനസ്സിലാക്കുകയും ചെയ്യും- മഞ്ജരി വിശദീകരിച്ചു.

അറബി ഗാനങ്ങളുടെ ശൈലി കൂടുതലായി മനസ്സിലാക്കി, പഠനത്തോടൊപ്പം അറബി ഗാനരംഗത്ത് ശ്രദ്ധകേന്ദ്രീകരിക്കാനാണ് മഞ്ജരിയ്ക്ക് ഇഷ്ടം.